ކޮންމެތާކުހުރެވެސް މިހާރު ވަގުތުން އެމްއައިބީން އެކައުންޓު ހުޅުވާނެ

އޮންލައިންކޮށް ވަގުތުން އެކައުންޓު ހުޅުވޭ ޚިދުމަތް، މޯލްޑިވްސް އިސްލާމިކް ބޭންކު، އެމްއައިބީން ތަޢާރަފުކޮށްދިއެވެ.

އޮންލައިންކޮށް އެކައުންޓް ހުޅުވަން އެދެވޭނެ ޚިދުމަތް އެމްއައިބީން ތަޢާރަފުކުރީ މިއަހަރުގެ ޖޫން މަހުއެވެ. ނަމަވެސް އަަލަށް ފެށި "އިންސްޓެންޓް އެކައުންޓް އޯޕަނިންގ ސަރވިސް"އަކީ އެޕްލައިކުރުމުން، ވަގުތުން އެކައުންޓް ހުޅުވޭ ޚިދުމަތެކެވެ. މިއީ ރާއްޖޭގައި އަލަށް ފެށި ޚިދުމަތެކެވެ.

ޚިދުމަތުގެ ތަފްސީލް ޙިއްސާކުރައްވަމުން އެމްއައިބީގެ ޗީފް ފައިނޭންސް އޮފިސަރ، ޢަލީ ވާސިފް ވިދާޅުވީ އެމްއައިބީން މަސައްކަތް ކުރަމުންދަނީ ދުނިޔޭގެ ކޮންމެ ތާކުހުރެވެސް ރައްޔިތުންނަށް ފަސޭހައިން ޚިދުމަތް ހޯދޭނެ މަގު ފަހިކުރުމަށްކަމަށެވެ. އެގޮތުން އަލަށް ތަޢާރަފުކުރި ޚިދުމަތާއެކު، ކޮންމެތާކު ހުރެގެންވެސް ވަގުތުން އެކައުންޓު ހުޅުވައި، އެކްޓިވޭޓްކޮށް ބޭނުންކުރަން ފެށޭނެކަމަށް ވާސިފް ވިދާޅުވިއެވެ.

"އަޅުގަނޑުމެން އަބަދުވެސް ބަލަނީ ރައްޔިތުންނަށް އެވަގުތަކަށް ބޭނުންވަނީ ކޮން ޚިދުމަތެއްތޯ. ވީހާވެސް ފުޅާކޮށް ޚިދުމަތް ދެވޭނީ ކިހިނެތްތޯ. މިއީ ބޭންކިން ދާއިރާއަށް ނަމޫނާ ޕްރޮޑަކްޓެއް." ވާސިފް ވިދާޅުވިއެވެ.

އެމްއައިބީގެ ހެޑް އޮފް މާރކެޓިން އެންޑް ޑިސްޓްރިބިއުޝަންގެ ހެޑް ހުސައިން ޢާލިމް ޝަކޫރު ވިދާޅުވީ، މި ޚިދުމަތަށް އެމްއައިބީގެ ޕޯޓަލް މެދުވެރިކޮށް ހުށައެޅޭނެކަމަށެވެ. މީގެ ރައްކާތެރިކަން ކަށަވަރުކުރުމަށް، ޚިދުމަތަށް އެދެވޭނީ އީފާސް މެދުވެރިކޮށްކަމަށް ޢާލިމް ވިދާޅުވިއެވެ.

ޢާލިމް ވިދާޅުވީ 18 އަހަރުން މަތީގެ ކޮންމެ މީހަކަށް އަމިއްލައަށް ޚިދުމަތަށް އެދެވޭނެކަމަށެވެ. އަދި އޮންލައިންކޮށް މަޢޫލޫމާތު ފުރުމަށްފަހު ސަބްމިޓްކުރާތާ ކުޑަ ވަގުތުކޮޅެއްގެ ތެރޭގައި، އެކައުންޓް ނަންބަރާއެކު ފޯނަށް މެސެޖު އަންނާނެކަމަށްވެސް ޢާލިމް ވިދާޅުވިއެވެ.

"އެކައުންޓް ނަންބަރާއި، ދެން ކުރިއަށް ދާނެ ގޮތުގެ މަޢުލޫމާތު އެސްއެމްއެސްއަކުން ލިބޭނެ. މެސެޖުގައި އިން ގޮތަށް އެމްއެމްއޭގެ ފަވަރައަށް ފައިސާ ދެއްކީމަ، ވަގުތުން އެކައުންޓް އެކްޓިވޭޓް ވާނެ. ދިވެހި ރުފިޔާ އެކައުންޓެއް ހަދާނަމަ 1000 ރުފިޔާ އަދި ޑޮލަރު އެކައުންޓެއް ހަދާނަމަ 100 ޑޮލަރު ފޮނުވީމަ، އެކައުންޓް އެކްޓިވް ވާނެ." އާލިމް ވިދާލުވިއެވެ.

ޢާއިލް ވިދާޅުވީ، އެކައުންޓް ނަންބަރާއެކު ލިބޭ މެސެޖުގައި، އިންޓަނެޓް ބޭންކިން ޚިދުމަތަށް ރެޖިސްޓަރ ވާނެ ގޮތުގެ މަޢުލޫމާތުވެސް ހިމަނާފައިވާނެކަމަށެވެ. އެކައުންޓް ހުޅުވުމަށް ފަހު ކޭޝް ކާޑު ނަގަން ބޭނުންވާނަމަ، އެންމެ ކައިރީގައި ހުރި އެމްއައިބީގެ ޚިދުމަތް ދޭ ސެންޓަރަކުން ވަގުތުން ކާޑު ލިބޭނެކަމަށް އެމްއައިބީން ބުންޏެވެ.

މި ޚިދުމަތަކީ، މުޅިންވެސް ދިވެހި ޑިވެލޮޕަރުން ހިމެނޭގޮތަށް ތަޢާރަފުކުރި ޕްރޮޑަކްޓެއްކަމަށް އެ ބޭންކުން ބުނެއެވެ.

މޯލްޑިވްސް އިސްލާމިކް ބޭންކަކީ ޒަމާނީ ޓެކްނޮލޮޖީގެ އެހީގައި ރައްކާތެރިކަމާއިއެކު ގިނަ ހިދުމަތްތަކެއް ކަސްޓަމަރުންނަށް ދެމުން އަންނަ ބޭންކެކެވެ.

އެބޭންކުގެ ބްރާންޗްތައް އައްޑޫސިޓީ، ފުވައްމުލަށް ސިޓީ، ތިނަދޫ ސިޓީ، ކުޅުދުއްފުށި ސިޓީގެ އިތުރުން ހުޅުމާލޭގައި ހުރެއެވެ. އަދި މާލެއާއި އެކި ރައްރަށުގައި އޭޓީއެމްގެ ޚިދުމަތްވެސް ދެމުންގެންދެއެވެ. ހުޅުމާލެ ފޭސް 2 ގެ ހަމައެކަނި އޭޓީއެމްވެސް އޮޕަރޭޓް ކުރަނީ އިސްލާމިކް ބޭންކުންނެވެ.