ރައީސް ޞާލިޙް މިއަދު ނޫސްވެރިންނާ ބައްދަލުކުރައްވަނީ
-
ނޫސްވެރިންގެ ބައްދަލުވުން އޮތީ 11:00ގައި
-
މިއީ އިންތިޚާބަށްފަހު ބާއްވާ ފުރަތަމަ ނިއުސް ކޮންފަރެންސް
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު ނޫސްވެރިންނާ ބައްދަލުކުރައްވާގޮތަށް ހަމަޖެހިއްޖެއެވެ
ރައީސުލްޖުމްހޫރިއްޔާގެ އޮފީހުގައި ބާއްވަވާ މި ނޫސްވެރިންގެ ބައްދަލުވުން އޮންނާނީ ހެނދުނު 11:00 ގައެވެ. މި ނޫސްވެރިންގެ ބައްދަލުވުން ޕީއެސްއެމްގެ ޗެނަލްތަކުން ލައިވްކުރާނެއެވެ.
މިއީ ރިޔާސީ އިންތިޚާބުގައި އެމަނިކުފާނަށް ލިބިވަޑައިގެންނެވި ނާކާމިޔާބީ އަށް ފަހު، ނޫސްވެރިންގެ ބައްދަލުވުމެއް ބާއްވަވާ ފުރަތަމަ ފަހަރެވެ. ރިޔާސީ އިންތިޚާބަށްފަހު ސަރުކާރު ބަދަލުވުމުގެ މަރުހަލާގެ ކަންކަން ކުރިއަށް ގެންދިއުމަށް އެއްބާރުލުން ދެއްވާނެކަމުގެ ޔަޤީންކަން އެމަނިކުފާނު ވަނީ ދެއްވާފައެވެ.
ރައީސް ވަނީ އިއްޔެ އިންތިޚާބީ ރައީސްއާއިވެސް ބައްދަލުކުރައްވާފައެވެ. ރައީސް ވަނީ ރައްޔިތުންގެ ނިންމުން ގަބޫލުކުރައްވައި، ވެރިކަން ބަދަލުވުމުގެ މަރުޙަލާގައި ޢަމަލުކުރަންޖެހޭ އުޞޫލުތައް ބަޔާންކުރާ ޤާނޫނު ކަމަށްވާ "ވެރިކަން ބަދަލުވުމުގެ މަރުޙަލާގެ ޤާނޫނު" ގައިވާ ގޮތުގެ މަތިން ކުރައްވަންޖެހޭ އެންމެހައި ކަންކަން ކޮށްދެއްވާނެ ކަމަށް ވިދާޅުވެފައެވެ. އަދި ވެރިކަން ބަދަލުވުމުގެ މަރުޙަލާގައި ކުރައްވަންޖެހޭ ކަންކަން، ވީހާވެސް އޮމާންކަމާއެކު ގެންދެވުމަށް މަސައްކަތްޕުޅު ކުރައްވާނެ ކަމަށްވެސް ރައީސް ވިދާޅުވެފައިވެއެވެ.