ރައީސް ހުވާކުރުމަށް ބާއްވާ ޖަލްސާ ނޮވެމްބަރު 17ވާ ހުކުރު ދުވަހު އޮންނާނެ: މަޖިލިސް

އަލަށް އިންތިޚާބުވެވަޑައިގަނެވި ރައީސުލްޖުމްހޫރިއްޔާއާއި، އެމަނިކުފާނުގެ ނާއިބު، ހުވާކުރެއްވުމަށް ބާއްވާ ރަސްމިއްޔާތު ނޮވެމްބަރު 17ގައި ބޭއްވުމުގެ ތައްޔާރީތައް ވަމުން އަންނަކަމަށް ރައްޔިތުންގެ މަޖިލީހުން ވިދާޅުވެއްޖެއެވެ.

ރައްޔިތުންގެ މަޖިލީހުގެ އިދާރާއިން ވިދާޅުވީ، ޤާނޫނު އަސާސީގައި ވާގޮތުގެމަތިން ރައީސުލްޖުމްހޫރިއްޔާކަމުގެ މަޤާމަށް އިންތިޚާބުވާ ބޭފުޅަކު އަދި ރައީސުލްޖުމްހޫރިއްޔާގެ ނައިބުކަމަށް ކަނޑައަޅާފައިވާ ބޭފުޅަކު، މަޤާމާ ޙަވާލުވުމުގެ ކުރިން މަޤާމުގެ ހުވާކުރަން އޮންނަނީ ރައްޔިތުންގެ މަޖިލީހުގެ ޖަލްސާއެއްގައިކަމުން، އެ ޖަލްސާ ނޮވެމްބަރު 17ވަނަ ދުވަހު ބޭއްވުމުގެ އިންތިޒާމްތައްއެ އިދާރާއިން ކުރިއަށް ގެންދަވާނެކަމަށެވެ.

ރައީސުލްޖުމްހޫރިއްޔާ ހުވާކުރުމުގެ ރަސްމިއްޔާތަކީ ވަރަށް ކުލަގަދަކޮށް، ކުރިއަށްގެންދާ ރަސްމިއްޔާތެކެވެ. އެގޮތުން ކުރީގެ ރައީސުންނާއި، ރައްޔިތުންގެ މަޖިލީހުގެ މެންބަރުންނާއި، ދަޢުލަތުގެ އިސް ބޭފުޅުންނާއި، ދައުވަތު އެރުވިގެން އެތައް ބަޔަކު ބައިވެރިވެވަޑައިގަންނަވައެވެ.

1968 ވަނަ އަހަރުން ފެށިގެން 2013 ވަނަ އަހަރާ ހަމައަށް ދިވެހިރާއްޖޭގެ ރިޔާސީ ދައުރު ފެށޭ ދުވަހެއްގެ ގޮތުގައި ކަނޑައަޅާފައި އޮތީ ނޮވެމްބަރު 11އެވެ. ނަމަވެސް 2013 ވަނަ އަހަރު ރިޔާސީ ދައުރު ފެށުނީ ނޮވެމްބަރު 17ގައެވެ. އެއީ އެއަހަރު ރިޔާސީ އިންތިޚާބުގައި ދިމާވި ކަންކަމާއި ގުޅިގެން އިންތިހާބުގެ ދެ ބުރެއް ސުޕްރީމް ކޯޓުން ބާތިލް ކުރުމުންނެވެ. އެ އަހަރުގެ އިންތިހާބުގެ ފުރަތަމަ ބުރު ބޭއްވީ ނޮވެމްބަރު 11 ވަނަ ދުވަހުއެވެ. އިންތިޚާބުގެ ދެވަނަ ބުރު ބޭއްވީ ނޮވެމްބަރު 16 ވަނަ ދުވަހުއެވެ. އަދި ރައީސުލްޖުމްހޫރިއްޔާ ހުވާ ކުރުން އޮތީ ނޮވެމްބަރު 17 ވަނަ ދުވަހުއެވެ.

މިހާރުގެ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވެރިކަމާއި ހަވާލުވެވަޑައިގަތީ 2018 ނިވެމްބަރު 17 ވަނަ ދުވަހުއެވެ. އެމަނިކުފާނު ރައީސުލްޖުމްހޫރިއްޔާކަމުގެ ހުވާ ކުރުމުގެ ރަސްމިއްޔާތު ބާއްވާފައިވަނީ ގަލޮޅު ދަނޑުގައެވެ.