މިދިޔަ ހޮނިހިރު ދުވަހު ބޭއްވި އިންތިޚާބަށްފަހު ޕާޓީގެ މެމްބަރުންނަށާއި މުދަލަށް ގެއްލުންދެމުންދާތީ އެކަން ބަލާދިނުމަށް ދިވެހި ފުލުހުންގެ ހިދުމަތަށް ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގޮވާލައިފިއެވެ.
އެމްޑީޕީން ބުނީ ރިޔާސީ އިންތިހާބުގެ ދެވަނަ ބުރުގައި ޕާޓީގެ މަރަދޫ ދާއިރާގެ މެމްބަރާއި ފޭދޫ ދާއިރާގެ މެމްބަރުންނަށް ބަޔަކު ހަމަލާދީ ބޮޑެތި އަނިޔާތަކެއް ދީފައިވާކަމަށެވެ. އަދި އޭގެ ފަހުން އިންތިޚާބަށް ފަހު ދ. ކުޑަހުވަދޫ، ގއ. ކޮލަމާފުށީގައި ހުންނަ ޕާޓީގެ އޮފީސްތަކަށާއި ބައެއް ރަށްރަށުގައި ހުރި ކެމްޕެއިން ޕޯސްޓަރ ބިލްބޯޑު ފަދަ ތަކެއްޗަށް ބައެއް ފަރާތްތަކުން ގެއްލުން ދެމުން އަންނަކަށެވެ.
" އިންތިހާބަށްފަހު އިދިކޮޅު ޕީޕީއެމް ޕީއެންސީއަށް ތާއީދުކުރާ ފަރާތްތަކުން ކާމިޔާބީ ފާހަގަކުރުމުގެ ތެރޭގައި މިފަދަ އަމަލުތައް ހިންގުމަކީ ޑިމޮކްރެޓިކް އުސޫލަތަކާ ބީރަށްޓެހި ވަރަށް ނާތަހުޒީބު ދަށުދަރަޖައިގެ އަމަލުތަކެކެވެ." އެމްޑީޕީގެ ބަޔާނުގައި ވެއެވެ.
ޕާޓީގެ މެމްބަރުންނާއި މުދަލަށް ގެއްލުން ދިނުން ކުށްވެރިކޮށް އެމްޑީޕީން ނެރުނު ބަޔާނުގައި ވަނީ އެޕާޓީން ވަނީ މަޖިލިސް މެމްބަރުންނަށާއި މިޕާޓީގެ އެކިއެކި އޮފީސްތަކަށް ގެއްލުން ދިން ފަރާތްތައް ހޯދާ މިކަންކަން ތަކުރާރުވިޔަނުދިނުމަށް ފުލުހުންނަށް ގޮވާލާފައެވެ.
ކެމްޕެއިން ތެރޭގައިވެސް އަދި އިންތިހާބަށްފަހުވެސް ޒިންމާދާރު ސިޔާސީ ޕާޓީއަކުން އަމަލުކުރަންވާނީ ސުލްހަވެރިކަމާއި ޑިމޮކްރެޓިކް ހަމަތަކުގެ ތެރެއިން އިންތިޚާބުން ނިކުންނަ ނަތީޖާއަށް އިހްތިރާމްކުރުމާއެކު އެ ޕާޓީން ހިންގާ ހަރަކާތްތައް ހިންގުމަށްކަމަށްވެސް އެމްޑީޕީގެ ބަޔާނުގައިވެއެވެ.
ރިޔާސީ އިންތިޚާބުގެ ދެވަނަ ބުރުގެ ވޯޓްލުން ކުރިޔަށް ދަނިކޮށް ރައްޔިތުން މަޖިލީހުގެ ދެ މެމްބަރަކަށް ހަމަލާދިން މައްސަލައެއް ފެންމަތިވިއެވެ. އަދި މި މައްސަލަތައް ބަލަމުން އަންނަކަން ފުލުހުން ވަނީ ހާމަކޮށްފައެވެ.