މެންބަރު ޒަރީރަށް ޙަމަލާދިން މައްސަލާގައި ތިން މީހަކަށް ދަޢުވާކޮށްފި

ރައްޔިތުންގެ މަޖިލީހުގެ މަތިވެރި ދާއިރާގެ މެންބަރު ޙަސަން ޒަރީރަށް ހަމަލާދިން މައްސަލާގައި ތިން މީހެއްގެ މައްޗަށް ދަޢުވާކޮށްފިއެވެ.

މެންބަރު ޒަރީރަށް ޙަމަލާދީފައިވަނީ މިއަހަރުގެ މެއި މަހުގެ ފުރަތަމަ ދުވަހުގެ ރޭ މާލެގެ، "ހަބީބީ" ކެފޭތެރޭގައި، އިންނަވަނިކޮށެވެ. ޒަރީރަށް ޙަމަލާދިފައިވަނީ ތޫނު ހަތިޔާރު ބޭނުންކޮށްގެންކަމަށް ފުލުހުން ވިދާޅުވެފައިވެއެވެ.

ޕްރޮސެކިއުޓަރ ޖެނެރަލްގެ އޮފީހުން ވިދާޅުވީ މެންބަރު ޒަރީރަށް ޙަމަލާދިން މައްސަލާގައި ދައުވާކުރަން ފޮނުވާފައިވަނީ މއ. ނައިޓްވިލާ، އިބްރާހީމް ޢަބްދުﷲއާއި، ތ. ކިނބިދޫ، ދީފުރަމްގެ، އަޙްމަދު އަވްޝަމްގެ އިތުރުން މ. ތާޖް، މުލާއިމް މުޙައްމަދުގެ މައްޗަށެވެ. އެމީހުންގެ މައްޗަށް ދައުވާކުރަން ކޯޓަށް ފޮނުވީ މިދިޔަ މަހުގެ 19ގައިކަމަށް ޕީޖީ އޮފީހުން ވިދާޅުވިއެވެ.

މި މައްސަލާގައި ތުހުމަތުވާ އިބްރާހީމް ޢަބްދުﷲގެ މައްޗަށް ދައުވާކޮށްފައިވަނީ، ބިރުދެއްކުމާއި، ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު ދަށުން، މީހަކަށް ނުރައްކާތެރި ހާނިއްކައެއްވާގޮތަށް ހަތިޔާރެއް ބޭނުންކޮށްގެން މާރާމާރީ ހިންގުމުގެ ދަޢުވާއެވެ. އަދި އަވްޝަމްއާއި، މުލާއިމްގެ މައްޗަށް ދަޢުވާކޮށްފައިވަނީ ހަމަ އެ ޤާނޫނުގެ ދަށުން މީހަކަށް ނުރައްކާތެރި ހާނިއްކައެއްވާގޮތަށް ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގެ ދަޢުވާއެވެ.