އޭޕްރީލްގައި މަޖިލިސް އިންތިޚާބު އޮންނަނަމަ ފަރެސްމާތޮޑާގެ ބައި-އިލެކްޝަން ނޯންނާނެ
-
ފަރެސްމާތޮޑާ ދާއިރާގެ މެންބަރަކީ އިންތިޚާބީ ނާއިބު ރައީސް
-
ނޮވެމްބަރު 17ގައި ހުވާކުރެއްވުމުން އެ ދާއިރާގެ ގޮނޑި ހުސްވާނެ
-
އައު މަޖިލިސް އިންތިޚާބުކުރާނާނީ އޭޕްރީލްގައި
-
އެ މުއްދަތާ ދެމެދު 6 މަސް ދުވަހުގެ މުއްދަތެއް ނޯންނާނެ
ރައްޔިތުންގެ މަޖިލީހުގެ އިންތިޚާބު އަންނަ އަހަރުގެ އޭޕްރީލްމަހު ބާއްވަން މަސައްކަތްކުރައްވާކަމަށާއި، އެ ތާރީޚަށް ބާއްވާނަމަ ފަރެސްމާތޮޑާ ދާއިރާގެ ބައި-އިލެކްޝަން ބާއްވަން ނުޖެހޭނެކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.
ޤާނޫނު އަސާސީގައި ބަޔާންކޮށްފައިވަނީ، ރައްޔިތުންގެ މަޖިލީހުގެ މެންބަރަކު، މެންބަރުކަމުން ވަކިވުމުގެ ސަބަބުން ހުސްވާ ގޮނޑިއަށް އެ ގޮނޑި ހުސްވާ ތާރިީޚުން ފެށިގެން ފަސްދޮޅަސް ދުވަހުގެ ތެރޭގައި މެންބަރަކު އިންތިޚާބު ކުރަންވާނެކަމަށެވެ. ނަމަވެސް މެންބަރު ކަމުގެ ގޮނޑި ހުސްވާ ތާރިޚުން ފެށިގެން ރައްޔިތުންގެ މަޖިލީހުގެ ކުރިއަށްއޮތް ޢާންމު އިންތިޚާބާ ދެމެދު އޮތީ ހަމަސްދުވަސް ނުވަތަ އެއަށްވުރެ ކުރު މުއްދަތެއްކަމުގައި ވާނަ ހުސްވާ ގޮނޑިއަށް މެންބަރކު އިންތިޚާބު ކޮށްގެން ނުވާނެކަމަށް ޤާނޫނު އަސާސީގައި ބަޔާންކުރެއެވެ.
ފަރެސް ފަރެސްމާތޮޑާ ދާއިރާގެ ގޮނޑި ހުސްވާނީ، އެދާއިރާ ތަމްސީލްކުރައްވަމުން ގެންދަވާ މެންބަރު އަދި އިންތިޚާބީ ނާއިބު ރައީސް ހުސައިން މުޙައްމަދު ލަޠީފް، ނޮވެމްބަރު 17ގައި ރައީސުލްޖުމްހޫރިއްޔާގެ ނާއިބުކަމުގެ ހުވާ ކުރެއްވުމުންނެވެ.
ފަރެސްމާތޮޑާ ދާއިރާގެ ގޮނޑި ހުސްވެ، ޤާނޫނު އަސާސީގައި ބަޔާންކުރާ މުއްދަތު، މަޖިލިސް އިންތިޚާބު ބާއްވާ ތާރީޚާ ދެމެދު ނެތްނަމަ ބައި-އިލެކްޝަން ނޯންނާނެއެވެ. އިންތިޚާބީ ނާއިބު ރައީސް ޙުސައިން މުޙައްމަދު ލަޠީފް، ރައީސުލްޖުމްހޫރިއްޔާގެ ނާއިބު ކަމުގެ ހުވާ ކުރައްވާ މުއްދަތުން ފެށިގެން، ރައްޔިތުންގެ މަޖިލީހުގެ އިންތިޚާބު ބާއްވާ ތާރީޚާ ދެމެދު އޮތީ ފަސް މަސްދުވަހުގެ މުއްދަތެކެވެ. ނަމަވެސް އެއްވެސް ހާލަތެއް މެދުވެރިވެ، މަޖިލިސް އިންތިޚާބު ފަސްކުރަން ޖެހިއްޖެނަމަ ބައި-އިލެކްޝަން ބޭއްވުމުގެ ފުރުޞަތު އޮންނާނެއެވެ.
އިލެކްޝަންސް ކޮމިޝަނުން މަސައްކަތްކުރައްވަނީ ރައްޔިތުންގެ މަޖިލީހުގެ އިންތިޚާބު އަންނަ އަހަރުގެ އޭޕްރީލް މަހުގެ ތެރޭގައި ބޭއްވުމަށެވެ.