ރައީސް ނަޝީދުގެ އިތުބާރު ނެތްކަމަށް ހުށައަޅަން އެމްޑީޕީ ޕީޖީގެ އިއްތިފާޤުން ފާސްކޮށްފި

ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތްކަމަށް ނިންމާ، އެމަނިކުފާނު އެ މަޤާމުން ދުރުކުރަން ފެންނަކަމަށް އެމްޑީޕީގެ ޕާލިމަންޓްރީ ގްރޫޕުން ފާސްކޮށްފިއެވެ. މިއަދު ބޭއްވި އެމްޑީޕީގެ ޕާލިމަންޓްރީ ގްރޫޕުގެ ބައްދަލުވުމުގައި، ރައީސް ނަޝީދުގެ އިތުބާރު ނެތްކަމުގެ މައްސަލަ ހުށައެޅުމަށް ފާސްވީ އެ ބައްދަލުވުމުގައި ބައިވެރިވެވަޑައިގެންނެވި މެންބަރުންގެ އިއްތިފާޤުންނެވެ.

މަޖިލީހުގެ ރައީސްގެ މަޤާމުން ރައީސް ނަޝީދު ދުރުކުރެއްވުމަށް މަޖިލީހަށް ހުށައަޅުއްވާ މައްސަލާގައި މިހާތަނަށް 45 މެންބަރުން ވަނީ ސޮއިކުރައްވާފައެވެ. ރައީސް ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށައެޅުމަށް ނިންމެވީ އެމްޑީޕީއަށް އެމަނިކުފާނުގެ ފަރާތުން ގެއްލުން ދިނުމުންކަމަށް ތުހުމަތުކުރައްވައެވެ. އަދި އެމްޑީޕީގެ އަޣްލަބިއްޔަތު މަޖިލީހުގައި އޮވެ، މަޖިލީހުގެ ރައީސްގެ މަޤާމު އެޕާޓީއަށް މުހިންމުކަމަށްވެސް އެމްޑީޕީގެ މެންބަރުން ވިދާޅުވިއެވެ.

އެމްޑީޕީ ޕީޖީ ގްރޫޕުގެ މެންބަރުން ވަނީ މިފަހަރުގެ މައްސަލަ އަނބުރާ ނެގުމުގެ ވިސްނުމެއް ނެތްކަމަށް ވިދާޅުވެފައެވެ.

ރައީސް ނަޝީދުގެ އިތުބާރު ނެތްކަމުގެ މައްސަލަ އެމްޑީޕީން މީގެ ކުރިންވެސް މަޖިލީހަށް ހުށައެޅުއްވިއެވެ. ނަމަވެސް މަޖިލީހުގެ ރައީސްއާއި ނާއިބު ރައީސްގެ އިތުބާރު ނެތްކަމުގެ މައްސަލަ އެއް ވަގުތެއްގައި ވައްދާފައި އޮތުމުން އެ މައްސަލަ އެޖެންޑާނުކޮށް ބޭއްވުމަށްފަހު، އެ މައްސަލަ ފަހުން ވަނީ އަނބުރާ ނަންގަވާފައެވެ.

މަޖިލީހުގެ ރައީސް މަގާމުގައި ހުންނަވާ ބޭފުޅަކު އެ މަޤާމުން ވަކިކުރަން ހުށައެޅޭނީ ރައްޔިތުންގެ މަޖިލީހުގެ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ މެންބަރުންގެ ސޮޔާއިއެކުއެވެ. އެއީ މިހާރު މަޖިލީހުގައި ތިއްބަވާ 87 މެންބަރުންގެ ތެރެއިން 22 މެންބަރުންގެ ސޮޔެއެވެ. މަޖިލީހުގައި އެމްޑީޕީގެ 55 މެންބަރުން ތިއްބަވައެވެ.