ރައީސް ނަޝީދުގެ އިތުބާރު ނެތްކަމުގެ މައްސަލަ އަނެއްކާވެސް މަޖިލީހަށް ވައްދައިފި

ރައީސް ނަޝީދުގެ އިތުބާރު ނެތްކަމުގެ މައްސަލަ މޯލްޑިވްސް ޑިމޮކްރަޓިކް ޕާޓީ އެމްޑީޕީން އަނެއްކާވެސް މަޖިލީހަށް ވައްދައިފިއެވެ.

ޕީއެސްއެމްއަށް މަޢުލޫމާތު ދެއްވަމުން އެމްޑީޕީގެ ޕަލަމަންޓްރީ ގްރޫޕްގެ ލީޑަރު، ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ވިދާޅުވީ، މައްސަލަ ދެވަނަ ފަހަރަށް ހުށައަޅާފައި މިވަނީ 49 މެންބަރުންގެ ސޮޔާއެކުކަމަށެވެ. އެއީ މުޅިންވެސް އެމްޑީޕީގެ މެންބަރުންކަމަށް އަސްލަމް ވިދާޅުވިއެވެ.

އަސްލަމް ވިދާޅުވީ މެންބަރުންގެ ސޮޔާއެކު، ރޭގެ ވަގުތެއްގައި އެ މައްސަލަ މަޖިލީހަށް ވައްދާފައިވާކަމަށެވެ. މަޖިލީހުންވެސްވަނީ މިމައްސަލަ ލިބިފައިވާ ކަމަށް ވިދާޅުވެފައެވެ.

އަސްލަމް ވިދާޅުވީ މި މައްސަލައިގައި ދެން ކަންކަން ކުރިއަށް ގެންދިއުމަށް އެމްޑީޕީން ނިންމާފައިވާ ގޮތް މިއަދުގެ ވަގުތެއްގައި ރައްޔިތުންނާ ޙިއްސާކުރައްވާނެކަމަށެވެ.

ރައީސް ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ހުށައެޅުމަށް ނިންމެވީ އެމްޑީޕީއަށް އެމަނިކުފާނުގެ ފަރާތުން ގެއްލުން ދިނުމުން ކަމަށް ތުހުމަތުކުރައްވައެވެ. އަދި އެމްޑީޕީގެ އަޣްލަބިއްޔަތު މަޖިލީހުގައި އޮވެ، މަޖިލީހުގެ ރައީސްގެ މަޤާމު އެޕާޓީއަށް މުހިންމުކަމަށްވެސް އެމްޑީޕީގެ މެންބަރުން ވިދާޅުވެއެވެ.

ރައީސް ނަޝީދުގެ އިތުބާރު ނެތްކަމުގެ މައްސަލަ އެމްޑީޕީން މީގެ ކުރިންވެސް މަޖިލީހަށް ހުށައެޅުއްވިއެވެ. ނަމަވެސް މަޖިލީހުގެ ރައީސްއާއި ނާއިބު ރައީސްގެ އިތުބާރު ނެތްކަމުގެ މައްސަލަ އެއް ވަގުތެއްގައި ވައްދާފައި އޮތުމުން އެ މައްސަލަ އެޖެންޑާނުކޮށް ބޭއްވުމަށްފަހު، އެ މައްސަލަ ފަހުން ވަނީ އަނބުރާ ނަންގަވާފައެވެ. މައްސަލަ ނަގާފައިވަނީ، ރިޔާސީ އިންތިޚާބުގެ ދެވަނަބުރަށް ވަގުތު ކުޑަތަންވެފައިވަނިކޮށެވެ.

މަޖިލީހުގެ ރައީސް މަގާމުގައި ހުންނަވާ ބޭފުޅަކު އެ މަޤާމުން ވަކިކުރަން ހުށައެޅޭނީ ރައްޔިތުންގެ މަޖިލީހުގެ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ މެންބަރުންގެ ސޮޔާއިއެކުއެވެ. އެއީ މިހާރު މަޖިލީހުގައި ތިއްބަވާ 87 މެންބަރުންގެ ތެރެއިން 22 މެންބަރުންގެ ސޮޔެއެވެ. މަޖިލީހުގައި އެމްޑީޕީގެ 55 މެންބަރުން ތިއްބަވައެވެ.