ބަޖެޓު އެކުލަވާލުމުގެ މަސައްކަތުގައި އައު ސަރުކާރަށް ފުރިހަމަ އެއްބާރުލުން ދޭނަން: ޕީޖީ ލީޑަރު
-
އަސްލަމް ވިދާޅުވީ ދަތިކުރުމުގެ ރޫޙު އެމްޑީޕީގައި ނެތްކަމަށް
-
ބޭނުންވާ އެއްބާރުލުން ފުރިހަމައަށް ދެއްވާނެކަމަށް ވިދާޅުވި
-
އަދި އައު ރައީސް ހުވާކުރުމުގެ ރަސްމިއްޔާތަށްވެސް އެއްބާރުލުން ދެއްވާނެކަމަށް ވިދާޅުވި
ބަޖެޓުއެލަވާލުމުގެ ކަންކަމުގައި އިންތިޚާބީ ސަރުކާރަށް ބޭނުންވާ ފުރިހަމަ އެއްބާރުލުން، މޯލްޑިވްސް ޑިމޮކްރެޓިކް ޕާޓީގެ މެންބަރުންގެ ފަރާތުން މަޖިލީހުގައި ލިބޭނެކަމުގެ ފުރިހަމަ ޔަގީންކަން އެމްޑީޕީގެ ޕަރލިމެންޓްރީ ގްރޫޕްގެ ލީޑަރު މުޙައްމަދު އަސްލަމް ދެއްވައިފިއެވެ.
އެމްޑީޕީގެ ޕީޖީ ގްރޫޕުން ބޭއްވި ނޫސްވެރިންގެ ބައްދަލުވުމުގައި ޕީޖީ ލީޑަރު އަސްލަމް ވިދާޅުވީ، އެޕާޓީގެ މަސްޢޫލިއްޔަތަކީ އައު ސަރުކާރު ޒިންމާދާރުކުރުވުންކަމަށެވެ. ބަޖެޓު އެކުލަވާލުމުގެ މަރުހަލާގައި އައު ސަރުކާރުގެ މަސައްކަތްތަކަށް ދަތިކޮށް ހުރަސްއެޅުމަކީ، އެއްވެސް ޙާލެއްގައި އެމްޑީޕީގެ ރޫޙެއް ނޫންކަމަށް އަސްލަމް ވިދާޅުވެފައެވެ.
އަސްލަމް ވިދާޅުވީ ބަޖެޓު އެކުލަވާލުމުގައި އައު ސަރުކާރަށް ބޭނުންވާ ފުރިހަމަ އެއްބާރުލުން ދެއްވާނެކަމަށެވެ.
"ބަޖެޓު އެކުލަވަން ކުރާ މަސައްކަތުގައި އައު ސަރުކާރަށް ދަތިކުރުމުގެ ރޫހެއް ނެތް. ޖެއްސުންކޮށް ފުރައްސާރައެއް ނުކުރާނަން. ފުރިހަމަ އެއްބާރުލުން ލިބޭނެ." އަސްލަމް ވިދާޅުވިއެވެ.
އަސްލަމް ވިދާޅުވީ އެމްޑީޕީ އޮންނާނީ ސަރުކާރުން ޖަވާބުދާރީކުރުމަށް މަސައްކަތް ކުރާ، ވަރުގަދަ އޮޕޮޒިޝަން ޕާޓީއެއްގެ ގޮތުގައިކަމަށެވެ. މަޖިލީހުގެ ތެރެއިން އެމަސައްކަތް ފުރިހަމައަށް ކުރިއަށްގެންދަވާނެކަމުގެ ޔަގީންކަން ދެއްވާކަމަށް އަސްލަމް ވިދާޅުވިއެވެ.
މީގެއިތުރުން، އިންތިޚާބީ ރައީސުލްޖުމްހޫރިޔާ ހުވާ ކުރުމުގެ ރަސްމިއްޔާތަށް ބޭނުންވާ އެއްބާރުލުންވެސް ދެއްވާނެ ކަމަށް ނޫސްވެރިންގެ ބައްދަލުވުމުގައި އަސްލަމް ވިދާޅުވިއެވެ.
ބަޖެޓް އެކުލަވާލުމުގެ ކަންކަމުގައި އިންތިޚާބީ ރައީސުލްޖުމްހޫރިއްޔާގެ އޮފީހުންވެސް ވަނީ މަސައްކަތްތައް ފައްޓަވާފައެވެ. އެގޮތުން ދަޢުލަތުން މިހާރު ފަށައިގެން ކުރިއަށްގެންދާ މަސައްކަތްތަކާއި، މާލީ ތަފްސީލްތައް އެއްކުރުމުގެ މަސައްކަތް ވަނީ ފައްޓަވާފައެވެ. ބަޖެޓު އެކުލަވާލުމުގެ މަސައްކަތުގައި، ސަރުކާރުގެ މުއައްސަސާތަކުން ބޭނުންވާ އެއްބާރުލުން ލިބެމުންދާކަން، އިންތިޚާބީ ރައީސުލްޖުމްހޫރިއްޔާ އޮފީހުންވެސް ފާހަގަކުރައްވައެެވެ.