ރައީސް ނަޝީދުގެ މައްސަލަ އަނބުރާ ގެންދިއުމުގެ ރޫޙެއް މިފަހަރު ނެތް: އަސްލަމް

ރައީސް ނަޝީދުގެ އިތުބާރު ނެތްކަމުގެ މައްސަލައިގައި ވަކި ގޮތެއް ނުނިންމައި، މައްސަލަ އަލުން އަނބުރާ ގެންދިއުމުގެ ރޫޙު އެމްޑީޕީގައި މިފަހަރު ނެތްކަމަށް އެމްޑީޕީ ޕާލަމަންޓްރީ ގްރޫޕްގެ ލީޑަރު މުޙައްމަދު އަސްލަމް ވިދާޅުވެއްޖެއެވެ.

ރައީސް ނަޝީދުގެ އިތުބާރުނެތްކަމުގެ މައްސަލަ އަލުން މަޖިލީހަށް ވައްދާފައި މިވަނީ އެމްޑީޕީގެ 49 މެންބަރުންގެ ސޮޔާއެކުއެވެ. އަސްލަމް ވިދާޅުވީ މިމައްސަލަ ކުރިއަށްގެންދިއުމަށް އެހެން ޕާޓީތަކާއި އަދި އަމިއްލަ މެންބަރުންވެސް ބޭނުންވާކަމަށެެވެ.

ރައީސް ނަޝީދުގެ އިތުބާރުނެތްކަމުގެ މައްސަލަ ފުރަތަމަ މަޖިލީހަށް ވެއްދީ މިއަހަރުގެ ޖޫން މަހުއެވެ. ނަމަވެސް މިދިޔަ މަހު ރިޔާސީ އިންތިޚާބުގެ ދެވަނަ ބުރަށް ވަގުތު ކުޑަތަންވެފައިވަނިކޮށް ވަނީ، އެ މައްސަލަ އަނބުރާ ގެންގޮސްފައެވެ.

މިކަމާއި ގުޅޭގޮތުން އެމްޑީޕީގެ ޕީޖީ ލީޑަރު މުޙައްމަދު އަސްލަމް ވިދާޅުވީ، އެމައްސަލަ އޭރު ނަގަން ނިންމި އެންމެ ބޮޑު ސަބަބަކީ މަޖިލީހުގެ މަސައްކަތްތައް ހުއްޓުމަކަށް އައުންކަމަށެވެ. އޭރު މައްސަލަ ވެއްދީ، މަޖިލީހުގެ ރައީސްގެ އިތުރުން ނައިބު ރައީސްގެވެސް އިތުބާރު ނެތްކަމުގެ މައްސަލައާއެކުއެވެ.

އަސްލަމް ވިދާޅުވީ މިއާއި ގުޅިގެން މަޖިލީހުގެ ޖަލްސާތަކަށް ބުރޫއަރާ އަދި މަޖިލީހުގެ ކޮމިޓީގެ މަސައްކަތްތައްވެސް މުޅިންހެން ހުޓުމަކަށް އައިސް، ކޮމިޓީތައް އުވިގެންދިޔަކަށެވެ. މައްސަލަ ނެގުމަށް އޭރު ނިންމީ، ޑިމޮކްރެޓްސްއާއެކު މަސައްކަތްކޮށް އަލުން މަޖިލީހުގެ މަސައްކަތްތައް ހަމަޔަކަށް އެޅުވުމަށް ބޭނުންވެގެންކަން ފާހަގަކުރައްވާ އަސްލަމް ވިދާޅުވީ މައްސަލަ ނެގުމުންވެސް ޑިމޮކްރެޓްސްގެ ފަރާތުން އެކަން ނުފެނުނުކަމަށެވެ. މަޖިލީހުގެ މަސައްކަތަށްވުރެއް، އެ ޕާޓީގެ މެންބަރުން އިސްކުރީ އަމިއްލަ މަސްލަކަތުކަމަށް އަސްލަމް ވިދާޅުވިއެވެ.

މަޖިލީގުގެ ރައީސްގެ އިތުބާރުނެތްކަމުގެ މައްސަލަ އަލުން ހުށައަޅާފައި މިވަނީ، އެކަމަށް އެމްޑީޕީގެ ޕީޖީގެ މެންބަރުން އެދެމުންދާތީ ކަމަށް އަސްލަމް ވިދާޅުވިއެވެ.

"ޕީޖީ ގްރޫޕްގެ ރޫޙެއް ނެތް ދެން މި މައްސަލަ އަނބުރާ ގެންދާކަށް. މެންބަރުން ވަރަށް ސާފުކޮށް ބުނަމުންދަނީ މައްސަލަ ކުރިއަށް ގެންދަން ބޭނުންވާކަމަށް. 49 މެންބަރުންގެ ސޮޔާއާއެކު މައްސަލަ ލީ. އަދި އެހެން ޕާޓީތަކާއި އަމިއްލަ މެންބަރުންގެ ޝައުގުވެރިކަންވެސް މިމައްސަލައަށް އެބަހުރި." އަސްލަމް ވިދާޅުވިއެވެ.

ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު މަޤާމުން ވަކިކުރުމުގެ ޤަރާރެއް ރައްޔިތުންގެ މަޖިލީހުގެ އިދާރާއަށް ލިބިފައިވާ ކަމަށް މަޖިލީހުން ވަނީ ވިދާޅުވެފައެވެ. އަދި އެމައްސަލަ ޤާނޫނު އަސާސީއާއި ރައްޔިތުންގެ މަޖިލީހުގެ ޤަވާއިދުގައިވާ ގޮތުގެ މަތިން ކުރިއަށްގެންދެވޭނެކަމަށް މަޖިލީހުން ވަނީ އަންގާފައެވެ. އަސްލަމް ވިދާޅުވީ، މިމައްސަލަ ކުރިއަށްގެންދިއުމާއި ނުގެންދިއުމުގެ އިޚްތިޔާރު ލިބެނީ މަޖިލީހުގެ ރައީސަށް ނޫންކަމަށެވެ. އެކަމުގައި ގޮތެއް ނިންމަވާ، ތަޅުމަށް ހުށައަޅުއްވާނީ އަމީންއާމުކަމަށެވެ.

އެމްޑީޕީން ޖޫން މަހު ފުރަތަމަ މި މައްސަލަ ހުށައެޅުއްވީ 54 މެންބަރުންގެ ސޮޔާއެކުއެވެ.

މަޖިލީހުގެ ރައީސް މަގާމުގައި ހުންނަވާ ބޭފުޅަކު އެ މަޤާމުން ވަކިކުރަން ހުށައެޅޭނީ ރައްޔިތުންގެ މަޖިލީހުގެ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ މެންބަރުންގެ ސޮޔާއިއެކުއެވެ. އެއީ މިހާރު މަޖިލީހުގައި ތިއްބަވާ 87 މެންބަރުންގެ ތެރެއިން 22 މެންބަރުންގެ ސޮޔެއެވެ. މަޖިލީހުގައި އެމްޑީޕީގެ 55 މެންބަރުން ތިއްބަވައެވެ.