މަޖިލިސް އިންތިޚާބުގައި ހުރިހާ ގޮޑިއަކަށް އެމްޑީޕީން ވާދަކުރާނެ

އަންނަ އަހަރު ބާއްވާ މަޖިލިސް އިންތިޚާބުގައި، ހުރިހާ ދާއިރާއެއްގެ ގޮނޑިއަށް ވާދަކުރާނެ ކަމަށް އެމްޑީޕީން ބުނެފިއެވެ.

މަޖިލިސް އިންތިޚާބަށް ތައްޔާރުވުމުގެ މަސައްކަތްތައް އެޕާޓީން މިހާރުވަނީ ފަށާފައެވެ. އެގޮތުން އެކަމާއި ގުޅޭ މަޝްވަރާތައް އެކި މަރުހަލާތަކުގައި ކުރިއަށްދާއިރު، މަޖިލީހުގެ ހުރިހާ ދާއިރާތަކަށް ވާދަކުރާނެކަން އެމްޑީޕީންވަނީ ހާމަކޮށްފައެވެ.

19ވަނަ މަޖިލީހުގެ މެޖޯރިޓީވެސް އޮތީ، މިހާރު ވެރިކަން ކުރާ މައި ޕާޓީ މޯލްޑިވްސް ޑިމޮކްރެޓިކް ޕާޓީ އެމްޑީޕީގައެވެ. އެމްޑީޕީގެ ފަރާތުން 65 ގޮނޑި ކާމިޔާބުކުރިއެވެ. ނަމަވެސް އަލަށް އުފެއްދި ދަ ޑިމޮކްރެޓްސްއަށް ބަދަލުވި މެންބަރުންނާއެކު މިއަދަދު މިހާރު ވަނީ 55އަށް ދަށްވެފައެވެ. ނަމަވެސް އަދިވެސް މަޖިލީހުގެ މެޖޯރިޓީއަކީ އެމްޑީޕީއެވެ.

މިދިޔަ މަހު ބޭއްވި ރިޔާސީ އިންތިޚާބު ނާކާމިޔާބުވުމާއި ގުޅިގެން، އެމްޑީޕީގެ ޢަމާޒު މިހާރު ހުރީ ރައްޔިތުންގެ މަޖިލީހުގެ ގިނަ ގޮނޑިތަކެއް ހޯދުމަށެވެ. އެ ޕާޓީ ވެގެންދާނީ ސަރުކާރުގެ އިދިކޮޅު ޕާޓީއަށެވެ. އަދި ސަރުކާރު ޖަވާބުދާރީ ކުރުވުމުގައި ބޮޑު ދައުރެއް އަދާކުރާނެ ޕާޓީއަށެވެ.

ރައްޔިތުންގެ މަޖިލީހުގެ އިންތިޚާބު ބޭއްވުމަށް ހަމަޖެހިފައިވަނީ އަންނަ އަހަރުގެ މަރޗް ނުވަތަ އޭޕްރީލް މަހުއެވެ. އާބާދީއަށް އައި އިތުރުވުމާއެކު، މިފަހަރުގެ މަޖިލީހަށް އިތުރު 6 ގޮނޑި ވަނީ އިތުރުކޮށްފައެވެ. އެހެންކަމުން މި ދާއިރާތަކުންވެސް އެމްޑީޕީން ވާދަކުރުމަށް ވަނީ ހަމަޖެހިފައެވެ.

19 ވަނަ ރައްޔިތުންގެ މަޖިލީގައި ތިބި ޖުމްލަ މެންބަރުންގެ އަދަދަކީ 87އެވެ. ނަމަވެސް 20ވަނަ ރައްޔިތުންގެ މަޖިލީހުގައި ޖުމްލަ 93 ގޮނޑިއަށް މެންބަރުން އައްޔަންކުރާނެއެވެ. މިކަމާއި ގުޅޭ ވަގުތީ ރިޕޯޓް އިލެކްޝަން ކޮމިޝަނުން މިހާރު އާއްމުކޮށްފައިވާއިރު، ދާއިމީ ރިޕޯޓް އާއްމުކުރުމުގެ ކުރިން މިމަހުގެ 19ގެ ނިޔަލަށް އޮތީ ޝަކުވާއަށް ހުޅުވާލާފައެވެ.