އައު ސަރުކާރު ތަމްސީލުކުރުމަށް މަޖިލީހުގެ ހުރިހާ ގޮޑިއަކަށް ވާދަކުރާނަން: ޕީޕީއެމް/ޕީއެންސީ

އަލަށް އިންތިޚާބުވާ ސަރުކާރު ތަމްސީލްކުރުމަށް ރައްޔިތުންގެ މަޖިލީހުގެ ހުރިހާ ދާއިރާތަކުގެ ގޮނޑިއަށްވެސް ކުރިމަތިލުމަށް ނިންމާފައިވާ ކަމަށް ޕީޕީއެމް/ޕީއެންސީން ކޯލިޝަނުން ބުނެފިއެވެ.

ޕީޕީއެމްގެ ސްޕޯކްސްޕަރސަން މުޙައްމަދު ޠަލާލު ވިދާޅުވީ، މިކޯލިޝަންގައި ޕީޕީއެމް ޕީއެންސީގެ އިތުރުން އެމްއެންޕީވެސް މިހާރު ހިމެނޭކަމަށެވެ. ނަމަވެސް ވާދަކުރަން ފުރުޞަތު ދޭނެ ގޮތަކާއިމެދު އަދި އެއްވެސް ވަރަކަށް ގޮތެއް ނިންމާފައި ނުވާކަމަށެވެ. މަޖިލިސް އިންތިޚާބާއި ގުޅޭ މަޝްވަރާތަކާއި މަސައްކަތްތައް އަދި މާބޮޑަށް ކުރިއަށް ނުގެންދާކަމަށްވެސް ޠަލާލް ވަނީ ވިދާޅުވެފައެވެ. ނަމަވެސް ކުރިއަށް އޮތް ދުވަސްތަކުގައި އެކަމާއި ގުޅޭ މަސައްކަތްތައް ފަށައިގަންނާނެކަމަށެވެ. ޠަލާލު ވިދާޅުވީ ސަރުކާރު ތަމްސީލްކުރުމަށް ހުރިހާ ދާއިރާތަކެއްގެ ގޮނޑިއަށްވެސް ވާދަކުރުމަށް ކުރިންވެސް ނިންމާފައިވާ ކަމަށެވެ.

ޕީޕީއެމް/ޕީއެންސީ އަދި އެމްއެންޕީ ހިމެނޭހެން އެއް ފިކުރެއްގައި މިހާރު ރައްޔިތުންގެ މަޖިލީހުގައި މަސައްކަތްކުރައްވަނީ 10 މެންބަރުންނެވެ. އެއީ ޕީޕީއެމްއަށް ނިސްބަތްވާ 4 މެންބަރުންނާއި، ޕީއެންސީއަށް ނިސްބަތްވާ 4 މެންބަރުން އަދި އެމްއެންޕީގެ 2 މެންބަރުންނެވެ.

މިދިޔަ މަހު ބޭއްވި ރިޔާސީ އިންތިޚާބުގެ ކާމިޔާބީއާއެކު މަޖިލިސް އިންތިޚާބުގައިވެސް ގިނަ ގޮނޑުތަކެއް ލިބޭނެކަމުގެ އުއްމީދު ޕީޕީއެމް/ޕީއެންސީ ކޯލިޝަނަށް ބޮޑެވެ.

ރައްޔިތުންގެ މަޖިލީހުގެ އިންތިޚާބު ބޭއްވުމަށް މަސައްކަތް ކުރަނީ އަންނަ އަހަރުގެ މަރޗް ނުވަތަ އޭޕްރިލް މަހުއެވެ. މި އިންތިޚާބަށް އިލެކްޝަން ކޮމިޝަނުން މިހާރު އަންނަނީ ތައްޔާރީތައް ވަމުންނެވެ.