އިންތިޚާބީ ރައީސާއި ނައިބު ހުވާކުރުމުގެ އިންތިޒާމްތަކާއި ގުޅޭގޮތުން މަޝްވަރާކުރައްވައިފި

އިންތިޚާބީ ރައީސުލްޖުމްހޫރިއްޔާއާއި އެމަނިކުފާނުގެ ނައިބު މަގާމުގެ ހުވާކުރެއްވުމުގެ ޖަލްސާގެ އިންތިޒާމުތަކާ ގުޅޭގޮތުން، ރައްޔިތުންގެ މަޖިލީހާއި އިންތިޚާބީ ރައީސުލްޖުމްހޫރިއްޔާގެ އޮފީހުގެ އިސް ބޭފުޅުންނާ މަޝްވަރާކުރައްވައިފިއެވެ.

މި ބައްދަލުކުރެއްވުން ބާއްވާފައިވަނީ ރައްޔިތުންގެ މަޖިލީހުގެ އިދާރާގައެވެ.

މިބައްދަލުކުރެއްވުމުގައި ރައްޔިތުންގެ މަޖިލީހުގެ އިދާރާގެ ފަރާތުން އިސްކޮށް ބައިވެރިވެވަޑައިގަތީ މަޖިލީހުގެ އަމީން ޢާންމު ފާތިމަތު ލިއުޝާއެވެ. އަދި އިންތިޚާބީ ރައީސުލްޖުމްހޫރިއްޔާގެ އޮފީހުގެ އިސް ބޭފުޅެއްގެ ގޮތުން ބައިވެރިވެވަޑައިގަތީ، ޓްރާންސިޝަން ކޮމިޓީގެ އިސް ވެރިޔާ އަބްދުއްރަޙީމް އަބްދުﷲއެވެ. މީގެ އިތުރުން މަޖިލީހާއި، ޓްރާންސިޝަލް ކޮމިޓީގެ އިސް ބޭފުޅުން ބައިވެރިވެވަޑައިގެންނެވިއެވެ.

މިބައްދަލުކުރެއްވުމުގައި މައިގަނޑުގޮތެއްގައި މަޝްވަރާކުރައްވާފައިވަނީ، ޖަލްސާ ކުރިއަށްގެންދަވާނެ ތަނަކާއި، ބައިވެރިވެވަޑައިގަންނަވާ ބޭފުޅުންނަށް ދަޢުވަތުއެރުވުމާއި އަދި އިންތިޒާމްތައް ހަމަޖެއްސުމުގެ ކަންކަމާއި ގުޅޭގޮތުންނެވެ. މިއީ ދެފަރާތުގެ ދެމެދުގައި މިގޮތަށް ބޭއްވި ފުރަތަމަ ރަސްމީ ބައްދަލުކުރެއްވުމެވެ.

އިންތިޚާބީ ރައީސުލްޖުމްހޫރިއްޔާގެ އޮފީހުގެ ސްޕޯކްސްޕަރސަން މުޙައްމަދު ފިރްޒުލް އިއްޔެ ވިދާޅުވީ، އިންތިޚާބީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެދިވަޑައިގެންފައިވާގޮތަށް، ހުވާ ކުރެއްވުމުގެ ރަސްމިއްޔާތު ޖުމްހޫރީ މައިދާނުގައި ބާއްވާގޮތަށް ނިންމަވާފައިވާކަމަށެވެ. މިޖަލްސާ އޮންނާނީ ނޮވެމްބަރު މަހުގެ 17ވާ ހުކުރު ދުވަހުގެ ހަވީރުއެވެ. މިގޮތަށް ނިންމަވާފައިވަނީ މި ރަސްމިއްޔާތުގައި އާއްމުންނަށްވެސް ބައިވެރިވުމުގެ ފުރުޞަތު ދެއްވުމަށެވެ.

ނަމަވެސް މިދުވަސްވަރަކީ މޫސުން ގޯސް ދުވަސްވަރެއްކަމުން، ޖުމްހޫރީ މައިދާނުގައި ޖަލްސާ ކުރިއަށް ނުގެންދެވޭނަމަ ދެން ޢަމަލުކުރާނެ ގޮތްތަކާ ގުޅޭގޮތުންވެސް އަންނަނީ މަޝްވަރާކުރައްވަމުންނެވެ.

ޤާނޫނުގައިވާގޮތަށް ރާއްޖޭގައި ރައީސުން ހުވާކުރެއްވުމުގެ ޖަލްސާ ބާއްވަމުން އައިސްފައިވަނީ ނޮވެންބަރު މަހުގެ 11ވަނަ ދުވަހުއެވެ. ނަމަވެސް އިންތިޚާބު ކުރިއަށްގެންދިއުމުގައި ދިމާވި ކަންތަންތަކެއްގެ ސަބަބުން، 2013ވަނަ އަހަރު އެ ރަސްމިއްޔާތު ފަސްކުރައްވާ، ބޭއްވެވީ ނޮވެމްބަރު 17ގައެވެ. އޭގެފަހުން 2018ވަަނަ އަހަރު، މިހާރުގެ ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުއާއި، ނައިބު ރައީސް ފައިސަލް ނަސީމް ހުވާކުރެއްވުމުގެ ރަސްމިއްޔާތުވެސް ބޭއްވެވީ އެއަހަރުގެ ނޮވެމްބަރު 17ގައެވެ.