ސީޕީ ޙަމީދު ވަޒީފާއިން ރިޓަޔަރކުރައްވަން ނިންމަވައިފި

ކޮމިޝަނަރ އޮފް ޕޮލިސް މުޙައްމަދު ޙަމީދު ވަޒީފާއިން ރިޓަޔަރކުރައްވަން ނިންމަވައިފިއެވެ. ޙަމީދު ރިޓަޔަރކުރައްވަން ނިންމަވާފައިވަނީ އަންނަ ނޮވެމްބަރު މަހުގެ 11 ވަނަ ދުވަހުއެވެ.

ކޮމިޝަނަރ އޮފް ޕޮލިސް މުޙައްމަދު ޙަމީދު، ފުލުހުންގެ އިސްވެރިން ތިއްބަވާ ސޯޝަލް މީޑިއާ ގްރޫޕަކަށް ފޮނުއްވެވި މެސެޖުގައި ވަނީ އެމަނިކުފާނު ވަޒީފާއިން ރިޓަޔަރކުރައްވަން ތައްޔާރުވެވަޑައިގަންނަވަމުން އަންނަކަމަށާއި، އެކަން ކުރައްވަން ބޮޑަށް ގަސްތުކުރައްވަނީ ނޮވެމްބަރު 11 ގައިކަމަށެވެ.

ޢުމުރުފުޅުން 17 އަހަރުގައި ފުލުހުންގެ ޚިދުމަތާއި ގުޅިވަޑައިގެންނެވި ޙަމީދު ވަނީ، ދެވަނަ ފަހަރަށް ފުލުހުންގެ މުއައްސަސާއާއި ގުޅިވަޑައިގެން ޚިދުމަތްކުރައްވަން ލިބިވަޑައިގެންނެވިކަން ފާހަގަކުރައްވާފައެވެ. އަދި އެ މަސައްކަތުގައި ފުލުހުންގެ އިސްވެރިންނާއި ހުރިހާ ފުލުހުންގެ ފަރާތުން ލިބިވަޑައިގެންނެވި އެހީތެރިކަމާއި އެއްބާރުލެއްވުމަށް ޝުކުރުއަދާކުރައްވާފައިވެއެވެ.

ޙަމީދު ވަނީ އޭނާއަކީ ޕްރޮފެޝަނަލް މިންގަނޑުން އަމަލުކުރައްވާ ބޭފުޅެއްކަން ފާހަގަކުރައްވާ، އޭނާއާމެދު ގޯސްކޮށް ބައެއް ބޭފުޅުން ދެކެވަޑައިގަންނަވާކަން އެނގިވަޑައިގަންނަވާކަމަށް ވިދާޅުވެފައެވެ. ހަމީދު ވިދާޅުވީ ކޮމިޝަނަރގެ މަޤާމު އޭނާ ބޭނުންފުޅު ނުވިކަމަށާއި، އެހެން ބައެއް ސީނިއާ ބޭފުޅުންނަށް ދެއްވުމަށް ރައީސްއަށް ލަފާދެއްވިކަމަށެވެ. ނަމަވެސް ރައީސްގެ އެދިވަޑައިގަތުމަށް ފަހުން އެމަޤާމާއި ހަވާލުވެވަޑައިގަތީކަމަށްވެސް ހަމީދު ވިދާޅުވިއެވެ.

އޭނާ ފުލުހުންގެ ޚިދުމަތާއި ގުޅިވަޑައިގެންނެވިއިރު އެ މުއައްސަސާއޮތީ ކިލަނބުކޮށްކަމަށާއި، އެހެންކަމުން އެ މުއައްސަސާގެ ސަފުތައް އަލުން ބަދަހިކޮށް ކުރިމަގަށްޓަކައި ބޮޑެތި ކަންކަން ކުރައްވަން ޖެހިވަޑައިގެންނެވިކަމަށް ހަމިދު ވިދާޅުވެފައިވެއެވެ. އަދި ފުލުހުންގެ ޚިދުމަތަކީ ޢާންމު ބަލައިގަންނަ، ރައްޔިތުންގެ ޑިމާންޑްތަކާ އެއްވަރަށް މަސައްކަތްކުރާ މުއައްސަސާއަކަށް ހެދުމަށް ވަރަށް ބޮޑު ސަމާލުކަމެއް ދެއްވައިގެން މަސައްކަތްޕުޅު ކުރެއްވިކަމަށްވެސް ޙަމީދު ވިދާޅުވެފައިވެއެވެ.

ފުލުހުންގެ ޗީފް ސްޕްރިންޓެންޑެންޓެއްގެ ހައިސިއްޔަތުން ފުލުހުންގެ އިންޓެލިޖެންސްގެ ވެރިޔާގެ ގޮތުގައި ޙަމީދު ހުންނަވަނިކޮށް، ރައީސް ނަޝީދުގެ ސަރުކާރު ބަދަލުވެ، އޯގަސްޓު 2012ގައި، ރައީސް ޑރ.މުޙައްމަދު ވަޙީދު ޙަސަން މަނިކުގެ ވެރިކަމުގައި އޭނާ އެމަޤާމުން ވަކިކުރެއްވިއެވެ. އެ މަޤާމުން ހަމީދު ވަކިކުރެއްވީ ފުލުހުންގެ ސިއްރު ލިޔެކިޔުންތަކެއް ހާމަކުރެއްވުމުގެ ތުހުމަތުގައެވެ.

އެ މައްސަލާގައި 2018 ވަނަ އަހަރު ސުޕްރީމް ކޯޓުން ޙުކުމް ކުރެއްވީ ޙަމީދަށް އަލުން ވަޒީފާ ދެއްވުމަށެވެ. އެ ޙުކުމާއި ގުޅިގެން ފުލުހުންގެ ވަޒީފާ އަލުން ޙަމީދަށް ދެއްވައި، ޑެޕިއުޓީ ކޮމިޝަނަރ އޮފް ޕޮލިސްގެ މަޤާމަށް ޕްރޮމޯޓު ކުރެއްވިއެވެ. އަދި 2019 ވަނަ އަހަރުގެ މާރިޗު މަހުގެ ތެރޭގައި ކޮމިޝަނަރ އޮފް ޕޮލިސްގެ މަޤާމަށް އައްޔަން ކުރައްވަންދެން ޙަމީދު ހުންނެވީ އެކްޓިން ކޮމިޝަނަރ އޮފް ޕޮލިސްގެ މަޤާމުގައެވެ.