އަންނަ އަހަރަށް މަޖިލިސް އިދާރާއަށް 186.9 މިލިއަން ރުފިޔާގެ ބަޖެޓެއް
-
މިއަހަރުގެ މަޖިލީހުގެ ބަޖެޓަކީ 182 މިލިއަން ރުފިޔާ
-
އަންނަ އަހަރަށް ލަފާކުރަނީ 186.9 މިލިއަން ރުފިޔާއަށް
-
މިއީ 4 މިލިއަނަށްވުރެ އިތުރު ޢަދަދެއް
-
މަޖިލީހުގެ އިދާރާގެ މުވައްޒަފުންގެ މުސާރަ ބޮޑުކުރުމަށް ނިންމި
ރައްޔިތުންގެ މަޖިލީހުގެ އިދާރާ ހިންގުމަށް އަންނަ އަހަރަށް 186.7 މިލިއަން ރުފިޔާގެ ބަޖެޓެއް ހުށައަޅައިފިއެވެ.
މިއަދު ބޭއްވި ޢާންމު ކޮމިޓީގެ ބައްދަލުވުމުގައި ވަނީ އަންނަ އަހަރަށް ލަފާކުރާ މަޖިލީހުގެ ބަޖެޓާގުޅޭގޮތުން މަޝްވަރާކުރައްވާފައެވެ. މިގޮތުން އަންނަ އަހަރަށް ލަފާކުރާ މަޖިލީހުގެ ބަޖެޓަކީ މި ހިނގަމުންދާ އަހަރުގެ ބަޖެޓަށްވުރެ ހަތަރު މިލިއަނެއްހާ ރުފިޔާގެ އިތުރު ބަޖެޓެކެވެ. މިއަހަރަށް މަޖިލީހުން ފާސްކޮށްފައިވަނީ 182 މިލިއަން ރުފިޔާގެ ބެޖެޓެކެވެ.
ކޮމިޓީގައި ވާހަކަފުޅު ދައްކަވަމުން މަޖިލީހުގެ ހެޑު އޮފް އެޑްމިނިސްޓްރޭޝަންސް އަޙްމަދު ފާއިޒް މުޙައްމަދު ވިދާޅުވީ، މިއަހަރަށްވުރެ އަންނަ އަހަރުގެ ބަޖެޓު ބޮޑުވާ މައިގަނޑު ސަބަބަކީ، އަންނަ 20 ވަނަ ރައްޔިތުންގެ މަޖިލީހުގައި ހިމެނިވަޑައިގަންނަވާނެ މެންބަރުންގެ ޢަދަދު އިތުވުމެވެ.
ހިނގަމުންދާ 19 ވަނަ ރައްޔިތުންގެ މަޖިލީހުގައި ހިމެނިވަޑައިގަންނަވަނީ 87 މެންބަރުންނެވެ. ނަމަވެސް އަންނަ އަހަރު ފެށޭ 20 ވަނަ މަޖިލީހުގައި 93 މެންބަރުން ހިމެނިވަޑައިގަންނަވާނެއެވެ.
ފާއިޒްވަނީ، މަޖިލީހުގެ ކޮމިޓީ އެކުލަވާލުމުގައި ލަސްތަކެއް އައުމުން މަޖިލީހުގެ ބަޖެޓުއެކުލަވާލާ، އެ އިދާރާއިން ފިނޭންސް މިނިސްޓްރީއަށް މިހާރު ފޮނުއްވާފައިވާކަމަށް ވިދާޅުވެފައެވެ.
ކޮމިޓީގައި ވާހަކަފުޅު ދައްކަވަމުން ހުޅުދޫ ދާއިރާގެ މެންބަރު އިލްޔާސް ލަބީބު ވަނީ މަޖިލީހުގެ އިދާރާގެ މުވައްޒަފުންގެ މުސާރަ ބޮޑުކުރުމަށް ހުށައަޅުއްވާފައެވެ. އެކަމަށް ތާޢިދުކޮށް، ގިންމެންބަރުން ވަނީ މަޖިލީހުގެ އިދާރާގެ މުވައްޒަފުންގެ މުސާރަ ބޮޑު ނުކުރާތާ 11 އަހަރުވެފައިވާކަން ފާހަގަކުރައްވާފައެވެ.
އެ ހުށައެޅުމާއި ގުޅިގެން ކޮމިޓީން ވަނީ މުވައްޒަފުންގެ މުސާރަ ބޮޑުކުރުމަށް ހިނގާނެ ޚަރަދު ބަލައި އެކަމުގެ ރިޕޯޓެއް ކޮމިޓީއަށް ހުށައެޅުއްވުމަށް ފާސްކުރައްވާފައެވެ.