އޮޑިިޓް އޮފީހުން ހުށައެޅީ 123 މިލިއަން ރުފިޔާގެ ބަޖެޓެއް ދިނުމަށް

އަންނަ އަހަރަށް ލަފާކޮށް 123 މިލިއަން ރުފިޔާގެ ބަޖެޓެއް ފާސްކޮށްދިނުމަށް އޮޑިޓަރ ޖެނެރަލްގެ އޮފީހުން ރައްޔިތުންގެ މަޖިލީހަށް ހުށައަޅުއްވައިފިއެވެ.

މިއަދު ބޭއްވި މާލިއްޔަތު ކޮމިޓީއަށް އޮޑިޓަރ ޖެނެރަލްގެ އޮފީހުން ހުށައެޅުއްވި ބަޖެޓަކީ ހިނގަމުންދާ އަހަރުގެ ބަޖެޓަށްވުރެ 30 މިލިއަން ރުފިޔާ ބޮޑު ބަޖެޓެކެވެ. މިއަހަރަށް އޮޑިޓަރ ޖެނެރަލްގެ އޮފީހަށް ފާސްކޮށްފައިވަނީ 93 މިލިއަން ރުފިޔާގެ ބަޖެޓެކެވެ. އެ އޮފީހުގެ ބަޖެޓު ބޮޑުވުމުގެ މައިގަނޑު ސަބަބަކީ އޮފީސް ހިންގާ ޢިމަރާތް ބަދަލުވުމެވެ.

އޮޑިޓަރ ޖެނެރަލްގެ އޮފީސް މިހާތަނަށް ހިންގަމުން އައީ ޣާޒީ ބިލްޑިންގައެވެ. ނަމަވެސް އެ ޢިމާރާތް ގިނަދުވަސްވެ ބައު ވުމުގެ ސަބަބުން ވަނީ ޢިމާރާތް ތަޅާލާފައެވެ. މިހާރު އެ އޮފީސް ހިންގަނީ ކުއްޔަށް ތަނެއް ހިފައިގެންނެވެ.

އަންނަ އަހަރަށް ލަފާކުރާ އޮޑިޓަރ ޖެނެރަލްގެ އޮފީހުގެ ބަޖެޓުގައި ރިކަރަންޓު ޚަރަދުގެ ގޮތުގައި 82 މިލިއަން ރުފިޔާ ކަނޑައަޅާފައިވެއެވެ. އޭގެތެރޭގައި މުވައްޒަފުންގެ މުސާރައަށް ހިނގާނެކަމަށް ލަފާކުރާ 56 މިލިއަން އަދި އިދާރީ ޚިދުމަތްތަކަށް ލަފާކުރާ 15 މިލިއަން ރުފިޔާވެސް ހިމެނެއެވެ. މީގެ އިތުރުން ކެޕިޓަލް ޚަރަދުގެ ގޮތުގައި 3 މިލިއަން ރުފިޔާ އަދި ޕީއެސްއައިޕީއަށް 32 މިލިއަން ރުފިޔާގެ އަންނަ އަހަރުގެ ބަޖެޓުގައި ކަނޑައަޅާފައިވެއެވެ. ޕީއެސްއައިޕީގެ ބޮޑު ޚަރަދެއް ހިނގަނީ ހުޅުމާލޭގައި ހަދަމުންދާ އެ އޮފީހުގެ އައު އޮފީސް ޢިމާރާތަށެވެ.

އަންނަ އަހަރުގެ ބަޖެޓުގައި އޮޑިޓަރ ޖެނެރަލްގެ އޮފީހުގެ މުވައްޒަފުންނަށް ޑިޕެންޑެންޓު އެލަވެންސެއްގެ ދޭން ހިމަނުއްވާފައިވެސްވެއެވެ. އެކަމަށް 10.4 މިލިއަން ރުފިޔާ ކަނޑައަޅާފައިވެއެވެ. އެއީ އެ އޮފީހުގެ މުވައްޒަފުންނަނީ ފަންނީ އަދި ތަޖުރިބާ ހުރި މުވައްޒަފުންނަށް ހެދުމަށެވެ.

އޮޑިޓަރ ޖެނެރަލްގެ އޮފީހުގެ ބަޖެޓަކީ ދައުލަތުގެ ބަޖެޓާއި ވަކިން މަޖިލީހަށް ހުށަހަޅައި ފާސްކުރަންޖެހޭ ބަޖެޓެކެވެ. ނަމަވެސް ދައުލަތުގެ ބަޖެޓް މަޖިލީހުން ފާސްކުރާއިރު އޮޑިޓް އޮފީހުގެ ބަޖެޓުވެސް ދައުލަތުގެ ބަޖެޓްގައި ހިމަނަންޖެހެއެވެ.