ޒާތީވުމާއި ސިޔާސީ ވިސްނުމުގެ މައްޗަށް އިސްކުރަންވީ އަޚުވަންތަކަން: ޑރ. މުޢިއްޒު

ޒާތީވުން ދޫކޮށްލާ، ސިޔާސީ ވިސްނުމުގެ މައްޗަށް އިސްކުރަންވީ އަޚުވަންތަކަންކަމުގައި އިންތިޚާބީ ރައީސް ޑރ.މުހައްމަދު މުޢިއްޒު ވިދާޅުވެއްޖެއެވެ.

ރާއްޖެ އިސްލާމްވި ދުވަހުގެ މުނާސަބަތުގައި ދީނީ ޢިލްމުވެރިންނާއި އުސްތާޛުންނާއި ބައްދަލުކުރެއްވުމަށް އިއްޔެ ބޭއްވެވި ބައްދަލުކުރެއްވުމެއްގައި ވާހަކަދައްކަވަމުން ޑރ.މުޢިއްޒު ވިދާޅުވީ ގުޅުންތައް އާލާކޮށް، މުޖުތަމަޢުގެ ރީތި އާދަތައް ފެތުރުމުގެ ޢަޒުމު އާކުރަންޖެހޭކަމަށެވެ. މީގެއިތުުރުން ދީނުގެ ރީތި ޢާދަކާދަ ދެމެހެއްޓޭނީ އެކަކު އަނެކަކަށް ބަދު ބަސް ބުނުން ދޫކޮށްލާ، ރިވެތި އަޙުލާހުގެ މަތީގައި ދެމިތިބެގެންކަންކަމަށާއި އެކަކު އަނެކަކަށް ޒާތީވެ، މީހުންގެ ވާހަކަ ފެތުރުމަކީ ދީނުގައި މަނާކުރައްވާފައިވާ ކަންކަންކަމުގައި އެމަނިކުފާނު ފާހަގަކުރެއްވިއެވެ.

"އެކަކު އަނެކަކަށް ޒާތީވެ ވާހަކަ ފެތުރުމަކީ ދީނުގައި ނަހީކުރައްވާފައިވާ ކަމެއް. ކެމްޕެއިން ނިންމައި މިހާތަނަށް އައިއިރުވެސް އެއްވެސް މީހަކަށް ޒާތީވެ ބަހެއް ނުބުނަން. އެކަން ރައްޔިތުން ބަލައިގަނެފައި ވަނީވެސް. ކިތަންމެވަރަކަށް އިމާރާތްތަކާއި، ބްރިޖާއި އުމްރާނީ ތަރައްޤީ ގެނަޔަސް، ސިކުނޑިއާއި ހިތުގެ މުއްސަނދިކަން ނެތި ޤައުމު ކުރި ނާރާނެ." ޑރ.މުޢިއްޒު ވިދާޅުވިއެވެ.

ދީނީ އިލްމުވެރިންނާއި އުޟްތާާޒުންނާއެކު ބޭއްވި ބައްދަލުކުރެއްވުމުގައި އިންތިހާބީ ރައީސް ވަނީ ދިވެހިންގެ ރީތި އާދަތަކާއި ދިވެހިންގެ ދިވެހިވަންތަ ސަޤާފަތް ދިރުވާ އާލާކުރުމަށް ބާރު އެޅުމަށް މަސައްކަތްކުރުމަށް ގޮވާލައްވާފައެވެ. ތުއްތުކުދިންނަށްވެސް އެ ވާހަކަތައް ކިޔައިދީ، ދިވެހިންގެ ދިވެހިވަންތަކަން ގެއްލުވާ ނުލާ ޙިމާޔަތްކުރުމަށް އެމަނިކުފާނު ގޮވާލެއްވިއެވެ. އަދި މި މައްސައްކަތުގައި ދީނީ ޢިލްމުވެރިންނާއި، ތަޢުލީމީ ދާއިރާއިން އާ ޢަޒުމަކާއެކު ނިކުމެ، މަސައްކަތްތައް ބާރަށް ފަށައިގަތުމަށް އިންތިހާބީ ރައީސްގެ ވާހަކަފުޅުގައި ވަރަށް ބޮޑަށް ބާރު އެޅުއްވިއެވެ.