ޔަމަންގެ ހަނގުރާމަ ފެށިތާ އެއްއަހަރު ފުރުން ފާހަގަ ކުރުމުގެ ގޮތުން އެޤައުމުގެ އެތައް ހާސްބަޔަކު ވެރިރަށް ސަންއާގެ މަގުތަކަށް ނުކުމެ އެޤައުމަށް ހަމަލާތައް ދެމުންގެންދާ އަރަބި އެލަޔަންސާ ދެކޮޅަށް އަޑުއުފުލައި މުޒާހަރާކޮށްފިއެވެ.
މުޒާހަރާކުރި މީހުންވަނީ އަރަބި އެލަޔަންސުން ޔަމަނާ ދެކޮޅަށް ކުރަމުން ގެންދާ ހަނގުރާމަ ހުއްޓާލައި ޔަމަނަށް ސުލްޙަ ގެނައުމަށް ގޮވާލާފައެވެ. ޔަމަންގެ ރައީސް އަބްދު ރައްބު މަންސޫރު ހާދީގެ ސަރުކާރާ ދެކޮޅަށް އެޤައުމުގެ ހޫޘީ ޖަމާއަތުން ތެދުވުމާއެކު، ރައީސް ހާދީގެ ސަރުކާރުގެ ދިފާއުގައި ސައޫދީ އަރަބިޔާ އިސްކޮށް އޮވެގެން އަރަބި އެލަޔަންސެއް އުފެއްދުމަށްފަހު އެ އެލަޔަންސުން ޔަމަނަށް ހަމަލާތައް ދޭން ފަށާފައިވަނީ 2015 ވަނައަހަރުގެ މާޗް މަހުގެ 26 ވަނަ ދުވަހުއެވެ.
ޔަމަންގެ ހަނގުރާމައަށް އެއް އަހަރުވީއިރު އެޤައުމުގެ ބޮޑުބައެއް ސުންނާފަތިވެ ހަތްހާހަށްވުރެ ގިނަމީހުން މަރުވެ 2 މިލިޔަނަށްވުރެ ގިނަމީހުން ހާލުގައި ޖެހިފައިވާ ކަމަށް އދ. ން ބުނެއެވެ.