ޣައްޒާގެ ޢުމްރާނީ ތަރައްޤީއާއި އެ ސަހަރު އާރާސްތު ކުރުމާ ބެހޭ މަސައްކަތްތައް ވިލަރެސް ކުރާ ޤަޠަރުގެ ކޮމިޓީގެ އޮފީސް ޢިމާރާތަށް ހަމަލަދީ އެ ތަން ސުންނާފަތި ކޮށްލައިފިއެވެ. ޤަޠަރުން ހިންގާ 'ކޮމިޓީ ފޯ ދަ ރީކޮންސްޓްރަކްޝަން އޮފް ޣައްޒާ' ޖަމުޢިއްޔާގެ އޮފީހަށް ބޮން އަޅައި އެ ތަން ސުންނާފަތި ކޮށްލާފައި މި ވަނީ، ޣައްޒާގެ މުސްލިމުންނާ ދެކޮޅަށް ފަށާފައިވާ ގަތުލުއާންމުގެ ތެރެއިން މެދުކެނޑުމެއް ނެތި އެ ސަހަރަށް ދެމުންދާ ހަމަލަތަކުގެ ތެރެއިންނެވެ.
ޤަޠަރުގެ ޖަމުޢިއްޔާގެ އޮފީހަށް ޔަހޫދީ ފައުޖުން ހަމަލަދިނުމުން ޢަރަބި ދުނިޔެއާއި މުސްލިމުން ޤައުމުތަކުން ދަނީ އެ ކަން އެންމެ ހަރުކަށި އިބާރާތުން ކުށްވެރި ކުރަމުންނެވެ. އަދި، ޣައްޒާގައި ހިންގަމުންދާ ގަތުލުއާންމާ އެކު ބައިނަލްއަޤުވާމީ ޤާނޫނުތައް މުގުރައި، އިންސާނީ ހައްޤުތަކަށް އަރައިގަންނަމުންދާ ކަމަށް ބުނެ، އެ ކަން ހުއްޓުވަން ފިޔަވަޅުތަކެއް އެޅުމަށް ބައިނަލްއަޤުވާމީ މުޖުތަމަޢަށް ގޮވައިލަމުންނެވެ.
ޤަޠަރުގެ ޖަމުޢިއްޔާގެ އޮފީހަށް ދީފައިވާ ހަމަލަ ކުށްވެރި ކޮށްފައިވާ ޤައުމުތަކުގެ ތެރޭގައި ސަޢޫދީ ޢަރަބިއްޔާއާއި އެހެން ޢަރަބި ޤައުމުތަކުގެ އިތުރުން ދިވެހިރާއްޖެ ވެސް ހިމެނެއެވެ. ސަޢޫދީ ޢަރަބިއްޔާއިން ބުނީ، ޤަޠަރުގެ އޮފީހަށް ދީފައިވާ ހަމަލައަކީ ބައިނަލްއަޤުވާމީ ޤާނޫނުތައް މުގުރުމަށް ޔަހޫދީން ހިންގަމުންދާ އުދުވާނުގެ ދަށުން ދީފައިވާ ހަމަލެއް ކަމުގައެވެ. އަދި، ޣާއްޒާގެ މުސްލިމުންނާ ދެކޮޅަށް ލާއިންސާނީ އުދުވާންތައް ހިންގުމުގައި ޒިންމާވާ ފަރާތްތައް އިންސާފުގެ ކުރިމައްޗަށް ގެނައުމަށް ގޮވައިލާ ކަމުގައެވެ.
ޤަޠަރުން ވެސް ވަނީ ޣައްޒާގައި ހުންނަ އެ ޤައުމުގެ 'ކޮމިޓީ ފޯ ދަ ރީކޮންސްޓްރަކްޝަން އޮފް ޣައްޒާ'ގެ އޮފީހަށް ދީފައިވާ ހަމަލަ އެންމެ ހަރުކަށި އިބާރާތުން ކުށްވެރި ކޮށްފައެވެ. އަދި، މިއީ ބައިނަލްއަޤުވާމީ ޤާނޫނުތަކާ ޚިލާފަށް ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކުގެ ތެރެއިން ދީފައިވާ ހަމަލައެއް ކަމުގައި ޤަޠަރުން ވެސް ވަނީ ސިފަ ކޮށްފައެވެ.
ޤަޠަރީ ކޮމިޓީ ފޯ ދަ ރީކޮންސްޓްރަކްޝަން އޮފް ޣައްޒާ ގާއިމު ކޮށްފައި ވަނީ 2012 ވަނަ އަހަރުއެވެ. އެ ޖަމުޢިއްޔާ އެކުލަވައިލުމުގައި އެންމެ އިސް ދައުރެއް އަދާ ކުރައްވާފައި ވަނީ ޤަޠަރުގެ އަމީރު ޝައިޚް ތަމީމް ބިން ޙަމަދް އަލް-ޘާނީގެ ބައްޕާފުޅު ޝައިޚް ޙަމަދް ބިން ޚަލީފާ އަލް-ޘާނީއެވެ.
އެ ޖަމުޢިއްޔާގެ މައިގަނޑު މަސައްކަތަކީ ޣައްޒާ އަލުން އާރާސްތު ކުރަން ބޭނުންވާ މާލީ އެހީތެރިކަން ހޯދައިދިނުމާއި، އެ މަސައްކަތްތައް ވިލަރެސްކުރުމާއި އެ ފަދަ މަޝްރޫޢުތައް ހިންގުމެވެ. އެ ޖަމުޢިއްޔާއިން މިހާތަނަށް ޢުމްރާނީ ތަރައްޤީގެ އެތަކެއް ހާސް މަޝްރޫޢެއް ހިންގާފައިވާއިރު، އޭގެ ތެރޭގައި ޣައްޒާގެ މުސްލިމުންގެ ގެދޮރު ބިނާކޮށްދިނުމާއި، އެހެނިހެން ޢުމްރާނީ ތަރައްޤީގެ މަޝްރޫޢުތައް ހިމެނެއެވެ.
ނަމަވެސް، ފާހަގަކޮށްލަން ޖެހޭ ކަމަކީ، އެ ޖަމުޢިއްޔާގެ އެހީތެރިކަމާ އެކު ބިނާކޮށް އާރާސްތު ކޮށްފައިވާ ގިނަ ޢިމާރާތްތައް މިހާރު ސުންނާފަތި ކޮށްލާފައިވާ ކަމެވެ. އަދި، އެންމެ ފަހުން އެ ޖަމުޢިއްޔާގެ އޮފީސް ހިންގާ ޢިމާރާތަށް ވެސް ޔަހޫދީން މި ވަނީ ބޮންއަޅައި، އެ ތަން ވެސް ސުންނާފަތި ކޮށްލާފައެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީން ޣައްޒާގައި ހިންގަމުންދާ އުދުވާންތަކުގައި ޝަހީދު ކޮށްލާފައިވާ މީހުންގެ ޢަދަދު ވަނީ 11,200 އަށް އުފުލިފައެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 29,000 އަރާއިރު، ޣައްޒާގެ ގެދޮރާއި އެހެން ޢިމާރާތްތަކުގެ 45 އިންސައްތަ މިހާރު ވަނީ ސުންނާފަތިކޮށް ބިނާ ހަމަކޮށްލާފައެވެ.