ޣައްޒާގައި ހަލުވިކަމާ އެކު ބަލިމަޑުކަމެއް ފެތުރެމުންދާ ކަމަށް ބުނެ ދުނިޔޭގެ ޞިއްޙަތު ޖަމުޢިއްޔާ [ވަރލްޑް ހެލްތް އޮގަނައިޒޭޝަން (ޑަބްލިޔު.އެޗް.އޯ)]ން ކަންބޮޑުވުން ފާޅުކޮށްފިއެވެ. އެ ޖަމުޢިއްޔާއިން ބުނީ، ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ އުދުވާނާ ގުޅިގެން އެތަކެއް ސަތޭކަ ހާސް ބަޔަކު ގެދޮރު ނެތިފައިވާއިރު، އޭގެ ތެރެއިން ގިނަ ޢަދަދެއްގެ ބަޔަކު މި ވަގުތު ދިރިއުޅެމުން ދަނީ ވަރަށް ނިކަމެތި ހާލުގައި ކަމުގައެވެ.
ހާލުގައި ޖެހިފައިވާ ގިނަ ޢަދަދެއްގެ ބަޔަކު ހޮސްޕިޓަލްތަކާއި، ސްކޫލްތަކާއި އެހެން ހިޔާތަކުގައި ތޮއްޖެހިފައިވާ ހާލުގައި ދިރިއުޅެމުންދާއިރު، އެ މީހުންނަށް ބޭނުންވާ މިންވަރަށް ކާބޯތަކެއްޗާއި ސާފު ބޯފެން ނުލިބޭ ކަމުގައި ޑަބްލިޔު.އެޗް.އޯން ބުނެއެވެ. އަދި، މި ކަމާ ގުޅިގެން ޣައްޒާގައި ބަލިމަޑުކަމެއް ފެތުރެމުންދާ ކަމުގައި އެ ޖަމުޢިއްޔާއިން ބުނެއެވެ.
"ކުރިއަށް އޮތީ ފިނި މޫސުން. ޣައްޒާގައި މިހާރު ވެސް ބަލިމަޑުކަމެއް ވަނީ ޢާންމުވެފައި. މިއީ ވަރަށް ބޮޑަށް ކަންބޮޑުވާ މައްސަލައެއް،" ފަލަސްޠީނުގައި ހުންނަވާ ޑަބްލިޔު.އެޗް.އޯގެ ރެޕްރެޒެންޓެޓިވް ރިޗަރޑް ޕީޕަރކޯން ވިދާޅުވިއެވެ.
ފާއިތުވި ހަފުތާތަކުގެ ތެރޭގައި ޣައްޒާގައި ނޭވާލާ ނިޒާމުގެ ބަލިތައް ޢާންމުވެފައިވާ ކަމަށާއި، އެ ފަދަ މައްސަލަތައް ކުރިމަތިވެފައިވާ މީހުންގެ ޢަދަދު 70,000 އަށް އަރާފައިވާ ކަމުގައި ޕީޕަރކޯން ވިދާޅުވިއެވެ. އަދި، ބޭރަށް ހިންގުން ޢާންމުވެފައިވާ ކަމަށާއި، މި ކަމުގެ އަސަރު ކޮށްފައިވާ މީހުންގެ ޢަދަދު 44,000 އަށް އަރާ ކަމުގައި ވެސް އޭނާ ވިދާޅުވިއެވެ. ބޭރަށް ހިންގުމުގެ ނުރައްކާ އެންމެ ބޮޑަށް ވަމުން ދަނީ ޣައްޒާގެ ކުޑަކުދިންނަށެވެ.
ޔަހޫދީން ޣައްޒާގައި ހިންގަމުންދާ ގަތުލުއާންމާ ގުޅިގެން އެ ސަހަރުގައި ބަލިމަޑުކަން ޢާންމުވެދާނެ ކަމުގެ އިންޒާރު ޑަބްލިޔު.އެޗް.އޯން ކުރިން ވެސް ކޮށްފައިވެއެވެ. އަދި، އުދުވާންތަކާ ގުޅިގެން ޣައްޒާގެ ޞިއްޙީ ޚިދުމަތުގެ ނިޒާމު ހުއްޓިފައިވާ ކަމަށާއި، ބަލިމަޑުކަމުގެ އަސަރު ކޮށްފައިވާ މީހުންނަށް ފަރުވާ ދިނުމަށް ހުރަސް އެޅިފައިވާ ކަމުގައި ވެސް އެ ޖަމުޢިއްޔާއިން ބުނެއެވެ. ޣައްޒާގައި ހިންގާ 35 ހޮސްޕިޓަލުގެ ތެރެއިން 18 ހޮސްޕިޓަލެއް މިހާރު ވެސް ވަނީ ބަންދު ކޮށްފައެވެ.
އެ ސަހަރަށް ވިއްސާރަ މޫސުން ލައިގަނެފައިވާއިރު، ބޯކޮށް ވާރޭވެހި ފެންބޮޑުވާން ފަށައިފި ނަމަ، އިތުރު ބަލިތައް ފެތުރުމުގެ ފުރުޞަތު ބޮޑުވާނެ ކަމުގައި ޞިއްޙީ ދާއިރާގެ މާހިރުން ބުނެއެވެ. އަދި، އެތަކެއް ސަތޭކަ ބަޔެއްގެ ފުރާނަ ގެއްލުމުގެ ފުރުޞަތު އޮތް ކަމުގައި ވެސް އެ ފަރާތްތަކުން އިންޒާރު ކުރެއެވެ. ޣައްޒާއިން ތެޔޮ ހުސްވެ ކަރަންޓުގެ ޚިދުމަތް ކެނޑުމާ ގުޅިގެން އެ ސަހަރުގެ ނަރުދަމާ ނިޒާމު މިހާރު ވެސް އޮތީ ހުއްޓިފައެވެ. އަދި، މަގުތަކަށް ނަޖިސް ފެން ފެތުރެމުންދާ ކަމުގައި ރިޕޯޓުތައް ބުނެއެވެ.
އިންސާނީ އެހީގެ ކަންކަން ވިލަރެސްކުރާ އ.ދގެ އިދާރާ [ޔުނައިޓެޑް ނޭޝަންސް އޮފީސް ފޯ ދަ ކޯޑިނޭޝަން އޮފް ހިޔުމެނިޓޭރިޔަން އެފެއާޒް (އޯ.ސީ.އެޗް.އޭ)]ން ބުނީ ޔަހޫދީންގެ އުދުވާނާ ގުޅިގެން ޣައްޒާގައި ގެދޮރު ނެތި، ހާލުގައި ޖެހިފައިވާ މީހުންގެ ޢަދަދު 813,000 އަށް އަރާ ކަމުގައެވެ. އޭގެ ތެރެއިން ގިނަ މީހުން މި ވަގުތު ތިބީ އ.ދިން ހިންގާ 154 ހިޔާއެއްގައެވެ. އެ ތަންތަން ހިންގަނީ ފަލަސްޠީނުގެ ރެފިޔުޖީންނާ ބެހޭ އ.ދގެ އިދާރާ [ޔޫ.އެން ރިލީފް އެންޑް ވަރކްސް އޭޖެންސީ (ޔޫ.އެން.އާރް.ޑަބްލިޔު.އޭ)]ންނެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީން ޣައްޒާގައި ހިންގަމުންދާ ގަތުލުއާންމުގައި ޝަހީދު ކޮށްލާފައިވާ މީހުންގެ ޢަދަދު ވަނީ 11,400 އަށް އުފުލިފައެވެ. އަދި، ޒަޚަމު ކޮށްލާފައިވާ މީހުންގެ ޢަދަދު މިހާރު 30,000 އަށް އަރައެވެ. ޝަހީދު ކޮށްލާފައިވާ މީހުންގެ ތެރޭގައި 4,700 އަށްވުރެ ގިނަ ޢަދަދެއްގެ މައުސޫމް ކުޑަކުދިން ހިމެނޭ ކަމުގައި ޣައްޒާގެ ޞިއްޙަތާ ބެހޭ އޮފިޝަލުން ހާމަކުރައްވައެވެ.