ރާއްޖެއަށް ފަތުރުވެރިކަން ތަޢާރަފްކޮށް، އެ ސިނާއަތު ކުރިއެރުވުމަށް މުހައްމަދު އުމަރު މަނިކު (އެމްޔޫ މަނިކު) ކޮށްދެއްވާފައިވާ އިޚްލާސްތެރި ޚިދުމަތްތަކުގެ އަގު ވަޒަންކުރުމުގެ ގޮތުން، ސައުތު އޭޝިއަން ޓްރެވަލް އެވޯޑްސް، ސަޓާ އެވޯޑު ދީފިއެވެ.
ސަޓާ އެވޯޑު ހަފްލާ ބޭއްވީ މިދިޔަ އޮކްޓޯބަރު މަހު އިންޑިއާގެ ބެންގަލޫރުގައި ހުންނަ ޝެރެޓަން ގްރޭންޑް ހޮޓެލްގައެވެ. ނަމަވެސް އެ ހަފްލާގައި އެމްޔޫ މަނިކު ބައިވެރިވެވަޑައިގެންފައިނުވާތީ، ސަޓާއިން ވަނީ ކުރުނބާ މޯލްޑިވްސްގައި ޚާއްޞަ ހަފްލާއެއް ބާއްވަވާ މަނިކަށް އެވޯޑް އަރުވާފައެވެ. މި ހަފްލާގައި ސަޓޭގެ އިސްވެރިން ބައިވެރިވެވަޑައިގެންނެވިއެވެ.
މި ހަފްލާގައި ވާހަކަފުޅު ދައްކަވަމުން އެމްޔޫ މަނިކުވަނީ އެމަނިކުފާނު ފަތުރުވެރިކަމަށް ކޯށްދެއްވި ޚިދުމަތުގެ އަވުވަޒަންކުރެއްވީތީ އުފާކުރައްވާކަން ހާމަކުރައްވާ ޝުކުރު އަދާކުރައްވާފައެވެ. ރާއްޖޭގެ ފަތުރުވެރިކަމަށް 51 އަހަރު ފުރިފައިވާކަން ފާހަގަކުރައްވަމުން އެމްޔޫ މަނިކު ވިދާޅުވީ،އެ ސިނާއަތު ކުރިއަރައިގެން ދިޔައީ ވަރށް ބުރަ އަދި ބޮޑު މަސައްކަތްތަކަކުންކަމަށާއި، އުންމީދަކީ ފަތުރުވެރިކަމުގެ ސިނާއަތް ވީހާވެސް ބޮޑަށް ކުރިއަރައިގެން ދިއުންކަމަށެވެ. އަދި މި ސިނާއަތް ޑައިފަސިފައިކުރުން ނުވަތަ ސިންދަފާތުރުކުރުމުގެ މުހިންމުކަންވެސް އެމްޔޫ މަނިކު ފާހަގަކުރެއްވިއެވެ.
"ކުރިން އެއްގޮތަކަށް ވެސް ސައުތު އޭޝިއާގެ މީހުންނަކީ މާބޮޑަކަށް ފެނިފައި އޮތް ބައެއް ނޫން އެވޯޑު ދިނުމުގަ، މިކަހަލަ ކަންތަކަށް ކޮންޓްރިބިއުޓްކުރި ބައެއްގެ ގޮތުގަ. އެހެންވީމަ އަޅުގަނޑަށް މިވަރު އެއްޗެއް ލިބުނީމަ ފަހުރުވެރިވޭ." އެމްޔޫ މަނިކު ވިދާޅުވިއެވެ.
އެމްޔޫމަނިކަށް އެވޯޑު ދެއްވުމުމުގެ ހަފްލާ ކުރުނބާ މޯލްޑިވްސްގައި ބާއްވާފައިވާއިރު، އެއީ ރާއްޖޭގެ އެންމެ ފުރަތަމަ ރިސޯޓެވެ. ވިހަމަނާފުށީގެ ނަމުން ފުރަތަމަ ހުޅުވި އެރިސޯޓު ހުޅުވީ އެމްޔޫމަނިކު ކޯ ފައުންޑަރއެއްގެ ގޮތުގައި ހުންނަވައިގެންނެވެ.
ސައުތު އޭޝިއަން ޓްރެވަލް އެވޯޑްސް، ސަޓާއަކީ، ދެކުނު އޭޝިޔާ ސަރަހައްދުގައި ފަތުރުވެރިކަމުގެ ދާއިރާގެ ދޭ އެންމެ ޝަރަފުވެރި އެއް އެވޯޑެވެ. މިއަހަރުގެ އެވޯޑްގައި ރާއްޖެއިން ވަނީ 31 އެވޯޑެއް ހާސިލްކޮށްފައެވެ. މީގެތެރޭގައި 14 ގޯލްޑް އެވޯޑާއި، 17 ސިލްވަރ އެވޯޑް ހިމެނެއެވެ.