އިބްރާހީމް ނާޞިރު އިންޓަރނޭޝަނަލް އެއަރޕޯރޓްގައި މުޒާހަރާކުރި ސާދަ މީހަކު ތިންމަސްދުވަހަށް ޖަލަށްލުމަށް ކުރިމިނަލް ކޯޓުން ޙުކުމްކުރައްވައިފިއެވެ.
އިދިކޮޅު އެމްޑީޕީއަށް ނިސްބަތްވާ 14 މީހަކު މިދިޔަ އަހަރުގެ މާރޗްމަހުގެ ތެރޭގައި އެއަރޕޯރޓްގައި މުޒާހަރާކޮށްފައިވަނީ ކުރީގެ ރައީސް މުޙައްމަދު ނަޝީދު މިނިވަންކުރުމަށް ގޮވާލައެވެ. މި މައްސަލާގައި އަމުރަށް ނުކިޔަމަންތެރިވުމުގެ ކުށުގެ ދަޢުވާ ދައުލަތުން އުފުއްލަވާފައިވަނީ 14 އަންހެނަކާއި 1 ފިރިހެނެއްގެ މައްޗަށެވެ. މި މައްސަލާގައި ހިމެނޭ 1 އަންހެނަކު ރާއްޖޭގައި ނޫޅޭތީ މިއަދު ޙުކުމްކުރައްވާފައިވަނީ ބާކީ ތިބި 14 މީހުންގެ މައްޗަށެވެ. މިމީހުންގެ މައްޗަށް ކްރިމިނަލް ކޯޓުން މިއަދު އިއްވެވި ޙުކުމްގައި ވަނީ އެމީހުންގެ މައްޗަށް ދައުލަތުން ހުށައެޅުއްވި ހެކި ނަފީކުރެވޭވަރުގެ އެއްވެސް ހެއްކެތް ހުށައެޅިފައި ނުވާކަމަށެވެ. އަދި މި އެންމެން އެއަރޕޯރޓްގެ ޑިޕާރޗަރ ޓާރމިނަލް ކުރިމަތީ މުޒާހަރާކޮށްފައިވާކަން ހެކިންގެ ހެކިބަހުން ސާބިތުވާކަމަށްވެސް ޙުކުމްގައިވެއެވެ.
ކްރިމިނަލް ކޯޓުން މި އެންމެންގެ މައްޗަށް 3 މަހަށް ޖަލަށްލުމަށް ޙުކުމްކުރެއްވި ނަމަވެސް އެ ހުކުމް ތަންފީޒުކުރުން 3 އަހަރަށް ފަސްކުރައްވާފައިވާކަމަށް ހުކުމްގައިވެއެވެ. އަދި މި މުއްދަތުގެ ތެރޭގައި މި މީހުންގެ ތެރެއިން މީހެއްގެ މައްޗަށް އިތުރުކުށެއް ސާބިތުވެއްޖެނަމަ ޖަލު ޙުކުމް ތަންފީޒުކުރަންޖެހޭނެއެވެ. އިބްރާހީމް ނާޞިރު އިންޓަރނޭޝަނަލް އެއަރޕޯރޓްގައި މުޒާހަރާކޮށްގެން ކޯޓުން މިއަދު ޙުކުމް އިއްވެވި މީހުންގެ ތެރޭގައި މާލޭ ސިޓީ ކައުންސިލްގެ ޑެޕިއުޓީ މޭޔަރ ޝިފާ މުޙައްމަދުވެސް ހިމެނިވަޑައިގަންނަވައެވެ.
އިބްރާހީމް ނާޞިރު އިންޓަރނޭޝަނަލް އެއަރޕޯރޓަކީ، މުޒާހަރާކުރުމާއި އެއްވުންތައް ބޭއްވުން ޤާނޫނީގޮތުން މަނާކޮށްފައިވާ، ގްރީން ޒޯންގެ ގޮތުގައި ކަނޑައަޅާފައިވާ ތަނެކެވެ.