ޔަހޫދީ ފައުޖުގެ ސިފައިން ޣައްޒާގެ އުތުރުގައި އޮންނަ ކަމާލް ޢަދްވާން ހޮސްޕިޓަލް ވަށައިލުމަށް ފަހު އެ ތަނަށް ވަރުގަދަ ހަމަލަތަކެއް ދީފިއެވެ. ފަލަސްޠީނުގެ ޞިއްޙަތާ ބެހޭ ވުޒާރާއިން ބުނީ، ޔަހޫދީ ސިފައިން ބަރުހަތިޔާރާ އެކު އެ ހޮސްޕިޓަލް ވަށައިލާފައިވާ ކަމަށާއި، އެ ތަނުގެ ތެރޭގައި ޢާންމުންގެ ގިނަ ޢަދަދެއްގެ ބަޔަކު ތާށިވެފައިވާ ކަމުގައެވެ. ހޮސްޕިޓަލް ދީފައިވާ ހަމަލަތަކުގައި 100 އަށްވުރެ ގިނަ މީހުން ޝަހީދު ކޮށްލާފައިވާ ކަމުގައި ވެސް އެ ވުޒާރާގެ އޮފިޝަލުން ވިދާޅުވިއެވެ.
"ހޮސްޕިޓަލުގެ ހަތަރު ފަރާތުން ޔަހޫދީ ސިފައިން ވަނީ މި ތަން ވަށައިލާފައި. އެ މީހުން ދަނީ ބަޑިންނާއި ބަރުހަތިޔާރު ބޭނުން ކޮށްގެން ހޮސްޕިޓަލަށް ހަމަލަދެމުން. މި ތަނުގައި ގިނަ ޢަދަދެއްގެ ބަލި މީހުން ވެސް އެބަތިބި. އެންމެން ތިބީ ފިތްކަނޑައިގެން ގޮސްފައި،" ޣައްޒާގެ ޞިއްޙަތާ ބެހޭ ވުޒާރާގެ ޑިރެކްޓަރ ޖެނެރަލް މުނީރް އަލް-ބަރްޝީ ވިދާޅުވިއެވެ. އޭނާ ވެސް މި ވަގުތު ހުރީ އެ ހޮސްޕިޓަލުގެ ތެރޭގައި ތާށިވެފައެވެ.
މީގެ ކުރިން ޣައްޒާގެ އަލް-ޝިފާ ހޮސްޕިޓަލާއި އިންޑޮނީޝިޔާ ހޮސްޕިޓަލަށް ދިން ފަދަ ރަޙުމު ކުޑަ ހަމަލަތަކެއް ކަމާލް ޢަދްވާން ހޮސްޕިޓަލަށް ވެސް ދިނުމަށް ޔަހޫދީ ފައުޖުން ތައްޔާރުވަމުންދާ ކަމަށް ބެލެވޭ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ. ޔަހޫދީންގެ ހަމަލަތަކުގައި ޝަހީދު ކޮށްލާފައިވާ މީހުންގެ ހަށިތައް އެ ހޮސްޕިޓަލުގެ ގޯތި ތެރޭގައި އަތުރާފައިވާ މަންޒަރު ފެންނަ ވީޑިޔޯއެއް، އެ ހޮސްޕިޓަލުގެ އޮފިޝަލުން ވަނީ ޢާންމު ކޮށްފައެވެ. ހޮސްޕިޓަލުން ބޭރަށް ނިކުންނަށް މަސައްކަތް ކުރާ ކޮންމެ މީހަކަށް އަމާޒުކޮށް ޔަހޫދީ ސިފައިން ހަމަލަދެމުންދާ ކަމުގައި އޮފިޝަލުން ވިދާޅުވިއެވެ.
އޮކްޓޫބަރު 7 ވަނަ ދުވަހު ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ފެށި ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 15,900 އަށް އަރާފައެވެ. ފަލަސްޠީނުގެ ޢާންމުން ދިރިއުޅޭ ޢިމާރާތްތަކަށް ހަމަލަ ނުދިނުމަށް ޔަހޫދީންނަށް ބައިނަލްއަޤުވާމީ މުޖުތަމަޢުން ގޮވައިލަމުން ދިޔަ ނަމަވެސް، ޝަހީދު ކޮށްލާފައިވާ ޢާންމުންގެ ޢަދަދު ކޮންމެ ދުވަހަކު ދަނީ އުފުލެމުންނެވެ.
ޣައްޒާގެ ޞިއްޙަތާ ބެހޭ ވުޒާރާއިން ބުނީ ނޮވެންބަރު 4 ވަނަ ދުވަހު ޔަހޫދީ ފައުޖުން ދީފައިވާ ހަމަލަތަކުގައި އެކަނިވެސް ފަލަސްޠީނުގެ 158 މީހުން ޝަހީދު ކޮށްލާފައިވާ ކަމުގައެވެ. އޭގެ ތެރެއިން 108 މީހުންނަކީ، ކަމާލް ޢަދްވާން ހޮސްޕިޓަލަށް ދިން ހަމަލަތަކުގައި ޝަހީދު ކޮށްލާފައިވާ މީހުންނެވެ. މީގެ އިތުރުން، ޚާނީޔޫނުސްގައި ހުންނަ ނާޞިރު ހޮސްޕިޓަލަށް ވެސް ޝަހީދު ކޮށްލާފައިވާ 40 މީހެއްގެ ހަށިގަނޑު ގެންގޮސްފައިވާ ކަމުގައި އޮފިޝަލުން ވިދާޅުވިއެވެ. އޭގެ ކުރީ ދުވަހު ޔަހޫދީން ވަނީ ފަލަސްޠީނުގެ 349 މީހުން ޝަހީދު ކޮށްލާފައެވެ.