ހިޔާ ފްލެޓްގެ ކުލިން ލައްކައެއްހާ ރުފިޔާ މަޢާފްކޮށްދީފައިވާކަމަށް ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީގެ މެނޭޖިން ޑިރެކްޓަރ ފަޒުލް ރަޝީދު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު، ވަނީ ހިޔާ ފްލެޓްތައް މަރާމާތު ކުރުމަށް ރައްޔިތުންގެ އަތުން ދިޔަ ޚަރަދުތަކަށްވާ ދެލައްކައެއްހާ ރުފިޔާގެ ފައިސާ، 7 އަހަރަށް ބަހާލައިގެން ކުލިން ކުޑަ ކުރާ ގޮތަށް އިއްޔެ ނިންމަވާފައެވެ. އެގޮތުން އެމަނިކުފާނު ވިދާޅުވީ ހިޔާ ފްލެޓްތަކުން މަހުން މަހަށް ދައްކާ ކުލި 3984 ރުފިޔާއަށް ކުޑަކުރައްވަން ސަރުކާރުން ނިންމަވާފައިވާ ކަމަށެވެ. ހިޔާ ފްލެޓުގެ ކުލީގެގޮތުގައި ދައްކަމުން އައި 8000 ރުފިޔާ، 5700އަށް ކުޑަކުރީ ރިޔާސީ އިންތިޚާބަށް ކައިރިވެފައިވަނިކޮށެވެ.
ހިޔާ ފްލެޓުތަކުގެ ކުލި ކުޑަކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ނިންމެވުން ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީންގެ މެނޭޖިން ޑިރެކްޓަރ އިބްރާހީމް ފަޒުލް ރަޝީދު ވަނީ އިތުރަށް ތަފްސީލްކޮށްދެއްވާފައެވެ. އެގޮތުން 7 އަހަރަށް ކުލި ކުޑަކުރުމުން، ފައިސާ ދައްކަންޖެހޭ މުއްދަތުވެސް ކުޑަވެފައިވާކަމަށް ފަޒުލް ވިދާޅުވިއެވެ. މި ބަދަލުގެ ސަބަބުން ރައީސް ވިދާޅުވިގޮތަށް ޖުމްލަ ދެލައްކައެއްހާ ރުފިޔާގެ ޑިސްކައުންޓެއް މިހާރު ފްލެޓްތަކުގެ ވެރިންނަށް ލިބޭނެއެވެ.
ފަޒުލް ވިދާޅުވީ 7 އަރަށް ބަހާލައިގެން ކުލި ކުޑަކުރުމުން ހަމަވަނީ، ލައްކައެއްހާ ރުފިޔާކަމަށެވެ. އަދި އިތުރު އެއްލައްކަ ރުފިޔާ މަޢާފްކޮށްދިނީކަމަށް ފަޒުލް ވިދާޅުވިއެވެ.
"މި ބަދަލާއެކު އެގްރިމަންޓްތައް މުރާޖަޢާ ކުރުމުގެ މަސައްކަތް މިދަނީ ކުރަމުން. ކުރިން 27 އަހަރާއި އިތުރު މަސްތަކަކަށް ކުލި ދައްކަން ޖެހޭގޮތަށް އޮތީ. މިހާރު ގެނައި ބަދަލުން ދެން ކުލި ދައްކަންޖެހޭނީ 26 އަހަރާއި 3 މަހު. އެހެންވީމަ އެއީ ވަގުތުން ވަގުތަށް ލިބިގެންދިޔަ ޑިސްކައުންޓް." ފަޒުލް ވިދާޅުވިއެވެ.
ހިޔާ ފްލެޓްގެ މިހާރުގެ އަގަކީ 2.25 މިލިއަން ރުފިޔާއެވެ. ނަމަވެސް މި ގެނައި ބަދަލާއެކު ޖުމްލަ އަދަދުން ދެލައްކައެއްހާ ރުފިޔާ މަޢާފުވެގެންދެއެވެ.
ކުލި ކުޑަކުރި 7 އަހަރުގެ މުއްދަތު ހަމަވުމުން ދެން ގެންނާނެ ބަދަލުތައް، ދިރާސާ ކުރުމަށްފަހު ހާމަކުރައްވާނެކަމަށް ފަޒުލް ވަނީ ވިދާޅުވެފައެވެ. ފަޒުލް ވިދާޅުވީ ސަރުކާރުން ގެންނަ އެއްވެސް ބަދަލަކީ ރައްޔިތު މީހާއަށް ބުރައަކަށްވާނެ ބަދަލަކަށް ނުވާނެކަމުގެ ޔަގީންކަން ސަރުކާރުން ދެއްވާކަމަށެވެ.
ހިޔާ ފްލެޓްތަކުގެ ޖޫރިމަނާ މަޢާފުކޮށްދެއްވުމަކީވެސް ރައީސުލްޖުމްހޫރިއްޔާގެ ވެވަޑައިގެންފައިވާ ވަޢުދެކެވެ. އެ މަސައްކަތް ކުރިއަށްގެންދަވާނެ ގޮތަކާއި ގުޅޭ މަޝަވަރާތައްވެސް މިހާރު ފަށްޓަވާފައިވާކަމަށް އެޗްޑީސީގެ މެނޭޖިން ޑިރެކްޓަރ ފަޒުލް ރަޝީދު ވަނީ ވިދާޅުވިއެވެ.
މީގެއިތުރުން ހިޔާ ޓަވަރުތަކުގައި އިތުރު ލިފްޓް ހަރުކުރުމަށް ކުރަންޖެހޭ މަސައްކަތްތައްވެސް މިހާރު އެކި މަރުހަލާތަކުގައި ފަށާފައިވާކަމަށްވެސް ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީގެ މެނޭޖިންގ ޑިރެކްޓަރ ފަޒުލް ރަޝީދު ވަނީ ވިދާޅުވެފައެވެ.