އެމްޑީޕީ މަޖިލިސް މެންބަރުންނާ ރައީސް ޞާލިޙް ބައްދަލުކުރައްވައިފި

މޯލްޑިވިއަން ޑިމޮކްރެޓިކް ޕާޓީ، އެމްޑީޕީގެ ޕާލިމަންޓްރީ ގްރޫޕްގެ މެންބަރުންނާއި، އެޕާޓިގެ ވަގުތީ ރައީސް އަދި ކުރީގެ ރައީސް އިބްރާހީމް މުޙައްމަދު ޞާލިޙް ބައްދަލުކުރައްވާ މަޖިލީހުގެ މަސައްކަތްތަކައި ގުޅޭގޮތުން މަޝްވަރާކުރައްވައިފިއެވެ.

އެމްޑީޕީގެ އޮފީހުގައި ކުރިއަށް ގެންދިޔަ އެ ބައްދަލުވުމުގައި ކުރީގެ ރައީސް ޞާލިޙްގެ އިތުރުން، އެޕާޓީގެ ޗެއަރޕާސަން ފައްޔާޟް އިސްމާޢީލާއި، ޕާލިމަންޓްރީ ގްރޫޕްގެ ލީޑަރު މުޙައްމަދު ރަޝީދު ޙުސައިން ބައިވެރިވެވަޑައިގެންނެވިއެވެ.

އެމްޑީޕީގެ ތަރުޖަމާން އަނަސް ޢަބްދުއްޞައްތާރު ވިދާޅުވީ، އެ ބައްދަލުވުމަކީ ރައްޔިތުންގެ މަޖިލީހުގައި މިހާރު ކުރިއަށްދާ މަސައްކަތްތަކާއި ގުޅޭގޮތުން މަޝްވަރާކުރެއްވުމަށް ބޭއްވެވި ބައްދަލުވުމެއްކަމަށެވެ. އިތުރު ތަފްސީލް ނުދެއްވައެވެ.

ނަމަވެސް އެނގިފައިވާގޮތުގައި އެ ބައްދަލުވުމުގައި ވަނީ އައު ސަރުކާރުގެ ވަޒީރުންނަށް ރުހުން ދިނުމުގެ މައްސަލައަށްވެސް މަޝްވަރާކުރައްވާފައެވެ.

ރިޔާސީ އިންތިޚާބަށްފަހު އިދިކޮޅު ޕާޓީގެ ގޮތުގައި ސަރުކާރު ޒިންމާދާރުކުރުވުމުގެ މަސައްކަތް ކުރާނެކަމަށް އެޕާޓީން ވަނީ ބުނެފައެވެ. އަދި ރައީސް ޞާލިޙް އަންނަނީ އެޕާޓިގެ ހަރަކަތްތައް ފުޅާކުރެއްވުމުގެ ގޮތުން ޕާޓީގެ އެކި ކޮމިޓީތަކާއިވެސް ބައްދަލުކުރައްވާ މަޝްވަރާކުރައްވަމުންނެވެ.