ބާރުގަދަ ތޫފާނެއް ކަމުގައިވާ މައިޗަންގް އިންޑިޔާގެ ދެކުނުގެ ސަރަޙައްދުތަކަށް އެރުމާ ގުޅިގެން ހިނގި އެކި ހާދިސާތަކުގައި މަރުވި މީހުންގެ ޢަދަދު 13 އަށް އަރައިފިއެވެ. މި ތޫފާން އެންމެ ފުރަތަމަ އަރާފައި ވަނީ އަންދްރަ ޕްރަދޭޝް ސްޓޭޓަށެވެ. އެ ސްޓޭޓާ އިންވެގެން އޮންނަ ޓެމިލް ނާޑޫ ސްޓޭޓަށް ވެސް ތޫފާނުގެ އަސަރުކޮށް، ބޮޑު ސަރަޙައްދެއްގައި ވަނީ ފެންބޮޑުވެފައެވެ. މި ތޫފާނާ ގުޅިގެން ޖެހެމުންދާ ބާރު ވައިގެ ސަބަބުން އެ ދެ ސްޓޭޓްގެ އައްސޭރިފަށުގެ ރަށްތަކަށް ބޮޑެތި ގެއްލުންތަކެއް ލިބިފައިވާ ކަމުގައި ރިޕޯޓުތައް ބުނެއެވެ.
ތޫފާން މައިޗަންގާގެ ސަބަބުން ހިނގާފައިވާ އެކި ހާދިސާތަކުގައި އެންމެ ގިނަ ޢަދަދެއްގެ ބަޔަކު މަރުވެފައި ވަނީ 6 މިލިޔަނަށްވުރެ ބޮޑު އާބާދީއެއް ދިރިއުޅޭ ޓެމިލް ނާޑޫ ސްޓޭޓްގެ ވެރިރަށް ޗެންނާއީންނެވެ. ބޯކޮށް ވާރޭވެހި ޗެންނާއީގެ ބޮޑު ސަރަޙައްދެއްގައި ވަނީ ފެންބޮޑުވެފައެވެ. ފެންބޮޑުވުމުން ގެދޮރުގައި ތާށިވެފައިވާ މީހުން ސަލާމަތް ކުރުމަށް، ޑިންގީ ފަދަ ކުދި އުޅަނދުފަހަރު ބޭނުންކޮށްގެން އޮފިޝަލުން ދަނީ މަސައްކަތް ކުރަމުންނެވެ. މަރުވެފައިވާ މީހުންގެ ތެރޭގައި ކުޑަ ކުއްޖަކު ވެސް ހިމެނެއެވެ.
މި މަސައްކަތްތަކާ ގުޅޭ ގޮތުން މަޢުލޫމާތު ދެއްވަމުން ގްރޭޓަރ ޗެންނާއީ ކޯޕޮރޭޝަން ކޮމިޝަނަރު ޑރ ޖޭ. ރާދަކްރިޝްނާން ވިދާޅުވީ ގެދޮރުގައި ތާށިވެފައިވާ މީހުންނަށް ކާބޯތަކެތި ފޯރުކޮށްދިނުމަށް އިންޑިޔާގެ އަސްކަރިއްޔާގެ ހެލިކޮޕްޓަރުތައް ބޭނުން ކުރަމުންދާ ކަމުގައެވެ. އަދި، ޑިންގީ ފަދަ އުޅަނދުތައް ބޭނުންކޮށްގެން، ގެދޮރުގައި ތާށިވެފައިވާ މީހުން ސަލާމަތްކޮށް، ރައްކާތެރި ހިސާބުތަކަށް ބަދަލު ކުރަން މަސައްކަތް ކުރަމުންދާ ކަމުގައި އޭނާ ވިދާޅުވިއެވެ.
ޗެންނާއީއަކީ ބޭރު ޤައުމުތަކުގެ ގިނަ ޢަދަދެއްގެ ކާރުޚާނާތަކެއް ހުންނަ ސިނާޢީ މަސައްކަތްތައް ކުރާ ރަށަކަށްވާއިރު، ފެންބޮޑުވުމާ ގުޅިގެން ގިނަ ޢަދަދެއްގެ ކާރުޚާނާތައް ބަންދު ކޮށްފައިވާ ކަމުގައި ރިޕޯޓުތައް ބުނެއެވެ. އަންދްރަ ޕަރަދޭޝް ސްޓޭޓަށް ބަލައިލާއިރު، އެ ސްޓޭޓްގެ އައްސޭރިފަށުގެ ސަރަޙައްދުތަކަށް ވެސް ވަނީ ބޮޑެތި ގެއްލުންތަކެއް ލިބިފައެވެ. ބާރު ވަޔާއެކު ގިނަ ޢަދަދެއްގެ ގަސްގަހާގެހި ވެއްޓި، މަގުތަކަށް ވެސް ވަނީ ބޮޑެތި ގެއްލުންތަކެއް ލިބިފައެވެ.
މި ތޫފާނާ ގުޅިގެން ގިނަ ޢަދަދެއްގެ ބަޔަކު ހާލުގައި ޖެހިފައިވާއިރު، ޓެމިލް ނާޑޫ ސްޓޭޓްގެ ޗީފް މިނިސްޓަރު އެމް. ކޭ. ސްޓާލިން ވަނީ، ހާލުގައި ޖެހިފައިވާ މީހުންނަށް މާލީ އެހީތެރިކަން ފޯރުކޮށްދިނުމުގައި އެހީތެރިކަން ހޯދަން އިންޑިޔާގެ މައި ސަރުކާރަށް ސިޓީ ފޮނުއްވާފައެވެ. އޭނާ ވިދާޅުވީ، ހާލުގައި ޖެހިފައިވާ މީހުންނަށް އެހީތެރިކަން ފޯރުކޮށްދޭން 607 މިލިޔަން އެމެރިކާ ޑޮލަރު ބޭނުންވާނެ ކަމުގައެވެ.
ތޫފާން މައިޗަންގާ އެކު އަންދްރަ ޕްރަދޭޝް އަދި ޓެމިލް ނާޑޫގެ އައްސޭރިފަށުގެ ސަރަޙައްދުތަކަށް ގަޑިއަކު 100 ކިލޯމީޓަރުގެ ބާރުމިނުގައި ވައިޖެހެމުންދާ ކަމުގައި އިންޑިޔާގެ މޫސުމާ ބެހޭ އިދާރާއިން ބުނެއެވެ. އަދި، ފާއިތުވި 24 ވަރަކަށް ގަޑިއިރުގެ ތެރޭގައި އެ ސަރަޙައްދުތަކަށް 200 މިލިމީޓަރުގެ ވާރޭ ވެހިފައިވާ ކަމުގައި ވެސް އެ އިދާރާއިން ބުނެއެވެ.