ޕްރޮސިކިއުޓަރ ޖެނެރަލް އަލްއުސްތާޛާ ޢާއިޝަތު ބިޝާމް އައްޑުއަތޮޅަށް ކުރައްވަމުން ގެންދަވާ ދަތުރުފުޅުގައި، އައްޑޫ ސިޓީގައި ޤާއިމްކުރައްވާފައިވާ މިނިވަން މުއައްސަސާތަކުގެ ގޮފިތަކުގެ ބޭފުޅުންނާ ބައްދަލުކުރައްވައިފިއެވެ.
ޕްރޮސިކިއުޓަރ ޖެނެރަލްގެ އޮފީހުގެ އައްޑުއަތޮޅު ގޮފީގައި ބޭއްވެވި މިބައްދަލުވުންތަކުގައި މީރާއާއި، އޭސީސީއާއި، އޮޑިޓަރ ޖެނެރަލްގެ އޮފީހާ އެޗްއާރުސީއެމްގެ ބޭފުޅުން ބައިވެރިވެޑައިގެންނެވި
މިބައްދަލުވުންތަކުގައި އެ މުއައްސަސާތަކުން ހުށަހަޅުއްވާ މައްސަލަތައް ޕްރޮސިކިއުޓަރ ޖެނެރަލްގެ އޮފީހުގައި މިހާރު ޤާއިމްކުރައްވާފައިވާ ޑިއުޓީ ޕްރޮސިކިއުޝަންގެ ނިޒާމް މެދުވެރިކުރައްވައި ހުށަހެޅުއްވުމާއި، މައްސަލަތައް ޕްރޮސިކިއުޓަރ ޖެނެރަލްގެ އޮފީހުގެ މާލޭގައި ހުންނަ މައި އޮފީހަށް ފޮނުއްވުމުގެ ބަދަލުގައި، އެ މުއައްސަސާތަކުގެ ގޮފިތަކުން ޕްރޮސިކިއުޓަރ ޖެނެރަލްގެ އޮފީހުގެ އައްޑޫ ގޮތްޕަށް ސީދާ ހުށަހެޅުމާ ގުޅޭގޮތުން މަޝްވަރާ ކުރައްވާފައިވެއެވެ.
ޕްރޮސިކިއުޓަރ ޖެނެރަލް ޢާއިޝަތު ބިޝާމް އައްޑުއަށް މިހާރު ކުރައްވަމުން ގެންދަވާ ދަތުރުފުޅުގައި އައްޑޫ ސިޓީ ހިތަދޫ ޕޮލިސް ސްޓޭޝަން އަދި އައްޑޫ ސިޓީ ހިތަދޫގައި ޤާއިމްކުރައްވާފައިވާ ޑްރަގް ޓްރީޓްމަންޓް ޑީޓޮކްސިފިކޭޝަން ސެންޓަރުގެ މުވައްޒަފުންނާވެސް ބައްދަލުކުރައްވާފައިވެއެވެ. މީގެ އިތުރުން ޕްރޮސިކިއުޓަރ ޖެނެރަލްގެ އޮފީހުގެ އައްޑޫ ގޮފީގެ އޮފީހުގެ ރަސްމީ ދިދަވެސް އެކަމަނާވަނީ ނަންގަވާދެއްވާފައެވެ.