ދުބާއީގެ ލަކީޑްރޯ ޕްރޮމޯޝަނެއްގައި ދިވެއްސަކަށް އެއް މިލިއަން ޑޮލަރު

ދުބާއީ ޑިއުޓީ ފްރީއިން ކުރިއަށްގެންދާ ލަކީ ޑްރޯ ޕްރޮމޯޝަނެއްގައި، އެއް މިލިއަން ޑޮލަރުގެ ނަސީބުވެރިއަކަށް ދިވެއްސަކު ހޮވިއްޖެއެވެ.

"ދުބާއީ ޑިއުޓީ ފްރީ މިލޭނިއަމް މިލިއަނަރ"އަކަށް ހޮވިފައިވަނީ އަޙްމަދު ނާސިރު ކިޔާ ދިވެއްސެކެވެ. ދުބާއީގެ ގަލްފް ނިއުސްގައި ލިޔެފައިވާ ގޮތުގައި ދިވެހި މީހާ ޕްރޮމޯޝަން ކާމިޔާބުކޮށްފައިވާކަން، އޭނައަށް އެންގޭނެ ގޮތެއް މިހާތަނަށް ވަނީ ނުވެފައެވެ.

އަގުބޮޑެތި އިނާމުތައް ހިމެނޭ އެ ލަކީޑްރޯ ޕްރޮމޯޝަންއަކީ 1999ވަނަ އަހަރުން ފެށިގެން ކުރިއަށްގެންދާ ޕްރޮމޯޝަންއެކެވެ. ނަމަވެސް މިއީ ދިވެއްސަކު އެ ލަކީޑްރޯއިން އިނާމު ހޯދި ފުރަތަމަ ފަހަރުކަމަށް، ގަލްފް ނިއުސްގައި ބުނެފައިވެއެވެ.

ގަލްފް ނިއުސްގައި ލިޔެފައިވާ ގޮތުން، 16 ނޮވެމްބަރުގައި އަޙުމަދު ނާސިރު ޓިކެޓް ގަނެފައިވަނީ އޮންލައިންކޮށެވެ. ޓިކެޓުގެ ނަންބަރަކީ 1174އެވެ. އަދި "މިލޭނިއަމް މިލިއަނަރ" ސީރީސް ނަންބަރަކީ 442 އެވެ.

މިއީ ކޮންމެ މަހަކުވެސް ބާއްވާ ޕްރޮމޯޝަނެކެވެ. ރާއްޖޭގެ އަޙުމަދު ނާސިރަކީ މި އަހަރު "ދުބާއީ ޑިއުޓީފްރީ މިލޭނިއަމް މިލިއަނަރ" ހާސިލްކުރި 33ވަނަ މީހާއެވެ.

އެ ލަކީޑްރޯގައި މި ނޫންވެސް ލަގްޒަރީ އަގުބޮޑެތި އިނާމުތައް ވަނީ ދޫކޮށްލާފައެވެ.