ޔަހޫދީންގެ ޖައްބާރުކަމަށް ނިމުމެއް ގެނެވޭތޯ އދގެ ޗާޓަރުން ލިބިދޭ ބާރުގެ ބޭނުން ގުތެރޭޝް ކުރައްވަނީ

އ.ދގެ ޗާޓަރުގެ 99 ވަނަ މާއްދާގެ ދަށުން ސެކްރެޓަރީ ޖެނެރަލަށް ލިބިދޭ ބާރުގެ ބޭނުން ކުރައްވައި، ޣައްޒާގެ މުސްލިމުންނަށް ކުރިމަތިކޮށްފައިވާ ނިކަމެތި ހާލަތުން އެ މީހުން ސަލާމަތް ކުރުމަށް އެންތޯނިޔޯ ގުތެރޭޝް މަސައްކަތްޕުޅު ފައްޓަވައިފިއެވެ. އ.ދގެ ޗާޓަރުގެ 99 ވަނަ މާއްދާއަކީ ސެކްރެޓަރީ ޖެނެރަލަށް ލިބިވަޑައިގަންނަވާ އެންމެ ބޮޑު ބާރެވެ. އަދި، އެންމެ ބާރުގަދަ 'ޑިޕްލޮމެޓިކް' ހަތިޔާރެވެ.

މާއްދާ 99ގެ ދަށުން ލިބިދޭ ބާރުގެ ދަށުން އަމަލު ކުރައްވަން ފައްޓަވާފައިވާ ކަން ގުތެރޭޝް އަންގަވާފައި ވަނީ އ.ދގެ ސަލާމަތީ މަޖިލީހަށް ފޮނުއްވި ސިޓީފުޅެއްގައެވެ. އެ މާއްދާގައި އޮންނަނީ، މުޅި ދުނިޔޭގެ ސުލްޙައާއި ސަލާމަތަށް ނުރައްކާވާ ފަދަ ހާލަތެއް ކުރިމަތިވެފައިވާ ކަމަށް ސެކްރެޓަރީ ޖެނެރަލަށް ޤަބޫލު ކުރެއްވިއްޖެ ނަމަ، އެ ކަމަކާ މެދު ވަގުތުން ފިޔަވަޅު އެޅުމަށް ސަލާމަތީ މަޖިލީހަށް އަމުރު ކުރެއްވުމުގެ ބާރު ސެކްރެޓަރީ ޖެނެރަލްގެ މަޤާމުގައި ހުންނަވާ ބޭފުޅަކަށް ލިބިގެންވާ ކަމުގައެވެ.

2017 ވަނަ އަހަރުގެ ޖަނަވަރީ މަހުގެ 1 ވަނަ ދުވަހު އ.ދގެ ސެކްރެޓަރީ ޖެނެރަލްގެ މަޤާމާ ގުތެރޭޝް ހަވާލުވެ ވަޑައިގަންނަވާފައިވީ ނަމަވެސް، މިއީ އޭނާ މާއްދާ 99ގެ ދަށުން ލިބިދޭ ބާރުގެ ބޭނުން ކުރައްވާ ފުރަތަމަ ފަހަރެވެ. ސަލާމަތީ މަޖިލީހަށް ފޮނުއްވި ސިޓީފުޅުގައި ގުތެރޭޝް ވަނީ، ޣައްޒާގެ މުސްލިމުންނާ ދެކޮޅަށް ހިންގަމުންދާ އުދުވާން ހުއްޓުވައި، ޣައްޒާގެ މުސްލިމުން އިންސާނީ މުސީބާތަކުން ސަލާމަތް ކުރަން އެޅެން ހުރި ހުރިހާ ފިޔަވަޅެއް އަޅައި، އެ މީހުންނަށް އިންސާނީ އެހީތެރިކަން ފޯރުކޮށްދެވޭނެ ގޮތްތަކެއް ހޯދަން ސަލާމަތީ މަޖިލީހަށް އަމުރު ކުރައްވާފައެވެ.

ޣައްޒާގެ ހާލަތު އަލުން އިޔާދަ ނުކުރެވޭ ފަދަ ހާލަތަކަށް ވެއްޓެމުންދާ ކަމުގެ އިންޒާރު ދެއްވަމުން ގުތެރޭޝް ވިދާޅުވީ ދުވަސްކޮޅެއްގެ ތެރޭގައި ޣައްޒާގެ އަމަން ގެއްލިދާނެ ކަމުގެ ބިރު އޮތް ކަމުގައެވެ. އަދި، ޣައްޒާގައި އިންސާނިއްޔަތަށް ޓަކައި ކުރަމުންދާ މަސައްކަތްތައް ފޭލުވެދާނެ ކަމުގައެވެ. އަދި، އެ ފަދަ ހާލަތެއް މެދުވެރިވިޔަ ނުދިނުމަކީ ބައިނަލްއަޤުވާމީ މުޖުތަމަޢުގެ ޒިންމާއެއް ކަން ވެސް އޭނާ ހަނދުމަ ކޮށްދެއްވިއެވެ.

މާއްދާ 99ގެ ދަށުން ލިބިދޭ ބާރުގެ ބޭނުން ކުރުމަކީ ސެކްރެޓަރީ ޖެނެރަލަކަށް ހުންނަވާ ބޭފުޅަކު އެންމެ ފަހު ފިޔަވަޅުގެ ގޮތުގައި ނަންގަވާނެ ފިޔަވަޅު ކަމުގައި މަސްރަޙު ދިރާސާ ކުރާ ފަރާތްތަކުން ދެކެއެވެ. އަދި، އެ މާއްދާގެ ބޭނުން ކުރައްވަން ގުތެރޭޝް ނިންމަވާފައި މި ވަނީ މި ކަމުގައި އިތުރު ދެވަނަ ގޮތެއް ނެތުމުން ކަމުގައި ވެސް އެ ފަރާތްތަކުން ޤަބޫލު ކުރެއެވެ.

އ.ދގެ ޗާޓަރުން ލިބިދޭ އެންމެ ބޮޑު ބާރުގެ ބޭނުން ކުރައްވަން ގުތެރޭޝް ނިންމަވާފައި މި ވަނީ، ޣައްޒާގެ މުސްލިމުންނަށް އިންސާނީ އެހީތެރިކަން ފޯރުކޮށްދިނުމުގެ ގޮތުން ޔަހޫދީން ހިންގަމުންދާ ލާއިންސާނީ ޖަރީމާ ވަގުތީ ގޮތުން މެދުކަނޑައިލަން ޖެހޭ ކަމަށް އ.ދގެ ސަލާމަތީ މަޖިލީހުގެ މެންބަރު ޤައުމުތަކުން އެއްބަސްވެފައިވާ ދަނޑިވަޅެއްގައެވެ. ނަމަވެސް، މި ކަމާ ގުޅޭ ގޮތުން އެ މަޖިލީހުން އަދި މިހާތަނަށް ޤަރާރެއް ފާސްކޮށްފައެއް ނުވެއެވެ.

މި ކަމަށް އޮތް އެންމެ ބޮޑު ހުރަހަކީ އެމެރިކާއެވެ. އ.ދގެ ސަލާމަތީ މަޖިލީހުގެ ދާއިމީ ފަސް މެންބަރުންގެ ތެރޭގައި ހިމެނޭ އެމެރިކާއަކީ ޒަޔަނިސްޓު އިސްރާޢީލުގެ އެންމެ ގާތް އެކުވެރިޔާއެވެ. މަދަދުވެރިޔާއެވެ. އަދި، އެހީތެރިޔާއެވެ. މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ އުދުވާންތައް ހިންގަމުން ދަނީ އެމެރިކާގެ އެހީތެރިކަމާއި އެއްބާރުލުމާ އެކުގައެވެ. އެމެރިކާއިން ފޯރުކޮށްދެމުންދާ ނުރައްކާތެރި، ބާރުގަދަ ހަތިޔާރުތައް ބޭނުން ކޮށްގެންނެވެ. ޒަޔަނިސްޓު އިސްރާޢީލާ ދެކޮޅަށް އ.ދގެ ސަލާމަތީ މަޖިލީހަށް ހުށަހަޅާ ކޮންމެ ޤަރާރެއް ވީޓޯކޮށް، ބޭރުކޮށްލާނެ ކަމުގައި އެމެރިކާއިން ދަނީ ބުނަމުންނެވެ.