ސޭޝެލްސްގައި ގޮވާތަކެތި ރައްކާކުރާ ގުދަނެއްގައި ބާރުގަދަ އެއްޗެއް ގޮވުމާއި، އެ ޤައުމަށް ކުރަމުންދާ ވިއްސާރައިގައި ބޯކޮށް ވާރޭވެހި، ބައެއް ސަރަޙައްދުތަކުގައި ފެންބޮޑުވުމުން ކުއްލި ހާލަތު އިޢުލާނު ކޮށްފިއެވެ. އެ ކަން އިޢުލާނު ކުރައްވާފައި ވަނީ އެ ޤައުމުގެ ރައީސް ވަވެލް ރަމްކަލަވަންއެވެ.
ބާރުގަދަ އެއްޗެއް ގޮވާފައި ވަނީ ސޭޝެލްސްގެ ރަށެއް ކަމުގައިވާ މާއޭގައެވެ. އެއީ ސިނާޢީ މަސައްކަތްތައް ކުރާ ގިނަ ޢަދަދެއްގެ ކާރުޚާނާތައް ހުންނަ ރަށެކެވެ. މި ހާދިސާ ހިނގާފައި ވަނީ ބޯކޮށް ވާރޭވެހި، އެ ރަށުގެ ބޮޑު ސަރަޙައްދެއްގައި ފެންބޮޑުވެފައިވާ ދަނޑިވަޅެއްގައެވެ. ސޭޝެލްސްގެ ރައީސްގެ އޮފީހުން ބުނީ، ފެންބޮޑުވުމާ ގުޅިގެން ހިނގާފައިވާ އެކި ހާދިސާތަކުގައި މިހާތަނަށް ތިން މީހަކު މަރުވެފައިވާ ކަމުގައެވެ. އަދި، ފެންބޮޑުވުމުގެ އިތުރުން، ގުދަނުގައި ހިނގި ހާދިސާއާ ގުޅިގެން އެ ރަށަށް ބޮޑެތި ގެއްލުންތަކެއް ލިބިފައިވާ ކަމުގައެވެ.
ކުއްލި ހާލަތު އިޢުލާނު ކުރުމާ ގުޅިގެން ސޭޝެލްސްގެ ރަށްތަކުގައި މަގުތަކަށް ނިކުމެ އުޅުން ވަނީ މަނާކޮށްފައެވެ. އަދި، ސްކޫލްތަކާއި އޮފީސްތައް ބަންދުކޮށް، ގޭގައި މަޑު ކުރުމަށް ޢާންމު ރައްޔިތުންނަށް ވަނީ އިލްތިމާސް ކޮށްފައެވެ. މަގުތަކަށް ނިކުމެ އުޅުމުގެ ހުއްދަ ދީފައި އޮތީ ކުއްލި ހާލަތްތަކާއި ޒަރޫރީ ޚިދުމަތްތައް ދިނުމުގައި ހަރަކާތްތެރިވާ މުވައްޒަފުންނަށް އެކަންޏެވެ.
ނަަމަވެސް، ފަތުރުވެރިންނަށް ދޭ ގިނަ ޚިދުމަތްތައް ހުއްޓައިލާފައި ނުވާ ކަމުގައި ސޭޝެލްސްގެ ފަތުރުވެރިކަން ކުރިއަރުވާ އިދާރާއިން ބުނެއެވެ. މި ގޮތުން، ފަތުރުވެރިން ބޭނުން ކުރާ ފެރީތަކާއި ބައިނަލްއަޤުވާމީ ވައިގެ ބަނދަރުގެ ޚިދުމަތްތައް މެދުކަނޑައިލާފައި ނުވާ ކަމުގައި އެ އިދާރާއިން ބުނެއެވެ.
ސޭޝެލްސްއަކީ ކުދި ޖަޒީރާ ރަށްތަކެއްގެ މައްޗަށް އެކުލެވިގެންވާ ކުޑަ ޤައުމެކެވެ. އެއީ، އެފްރިކާ ބައްރުގެ ޤައުމުތަކުގެ ތެރެއިން އެންމެ އާބާދީ ކުޑަ ޤައުމެވެ. އެ ޤައުމުގެ އާބާދީއަކީ އެންމެ 100,000އެވެ. އެފްރިކާ ބައްރުގެ އިރުމަތީ އައްސޭރިފަށުގައި އޮންނަ ސޭޝެލްސްއަކީ ފަތުރުވެރިންގެ މެދުގައި މަޤުބޫލު މަންޒިލެއް ކަން ވެސް ފާހަގަ ކޮށްލަން ޖެހެއެވެ.
ސޭޝެލްސްއަށް ބޯކޮށް ވާރޭވެހި ފެންބޮޑުވެފައި މި ވަނީ، އެފްރިކާ ބައްރުގެ ބައެއް ޤައުމުތަކުގައި މޫސުން ގޯސްވެ، މޫސުމީ ހާދިސާތަކެއް ހިނގަމުންދާ ދަނޑިވަޅެއްގައެވެ. މި ކަމުގެ އަސަރު ކުރަމުންދާ ޤައުމުތަކުގެ ތެރޭގައި ކެންޔާ، މޮރިޝަސް، މަޑަގަސްކަރަ، ސޮމާލިޔާ އަދި ޓެންޒެނިޔާ ހިމެނޭއިރު، އެ ޤައުމުތަކަށް ފެންބޮޑުވުމާއި، ބިންގަނޑު ކެނޑުމުގެ އިތުރުން ހަނަފަސް ކަމާ ވެސް ވަނީ ކުރިމަތިވެފައެވެ. މިއީ، މޫސުމީ ބަދަލުތަކުގެ ސަބަބުން އެ ޤައުމުތަކަށް ކުރިމަތިވަމުންދާ މޫސުމީ ކާރިސާތަކެއް ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ.