ޣައްޒާއާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ އުދުވާންތައް ހުއްޓުމަކަށް ގެނައުމާ ގުޅޭ ގޮތުން މަޝްވަރާ ކުރުމަށް އދގެ ސަލާމަތީ މަޖިލީހުގެ އިތުރު ބައްދަލުވުމެއް ބާއްވަން ނިންމައިފިއެވެ. އެ މަޖިލީހުގެ ކުއްލި ބައްދަލުވުމެއް ބާއްވަން ނިންމާފައި ވަނީ އދގެ ޗާޓަރުގެ 99 ވަނަ މާއްދާގެ ދަށުން ސެކްރެޓަރީ ޖެނެރަލް އެންތޯނިޔޯ ގުތެރޭޝަށް ލިބިދޭ ބާރުގެ ދަށުން އެ މަޖިލީހުގެ ބައްދަލުވުމެއް ބޭއްވުމަށް އޭނާ އެދިވަޑައިގެންނެވުމުންނެވެ.
އޮކްޓޫބަރު 7 ވަނަ ދުވަހު ޣައްޒާއާ ދެކޮޅަށް ޔަހޫދީން ފެށި ލާއިންސާނީ އުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 17,177 އަށް އަރާފައެވެ. ޔަހޫދީންގެ ޙަމަލާތަކުގައި ސުންނާފަތި ކޮށްލާފައިވާ ޢިމާރާތްތަކުގެ ދަށުގައި އިތުރު 6,000 އެއްހާ މީހުންގެ ހަށިތައް ތާށިވެފައިވެއެވެ.
ގުތެރޭޝްގެ އެންގެވުމާ ގުޅިގެން އެކުވެރި ޢަރަބި އިމާރާތް (ޔޫއޭއީ)ން ވަނީ ޤަރާރެއް އެކުލަވައިލާފައެވެ. ޔޫއޭއީއަކީ 15 މެންބަރުންގެ މައްޗަށް އެކުލެވިގެންވާ ސަލާމަތީ މަޖިލީހުގައި ހިމެނޭ ހަމައެކަނި ޢަރަބި ޤައުމެވެ. މިއީ، މި މައްސަލައިގައި އެ މަޖިލީހަށް ހުށަހަޅާ ހަ ވަނަ ޤަރާރެވެ، ޔަހޫދީންގެ އުދުވާންތައް މެދުކަނޑަައިލާ، ޣައްޒާގައި ހާލުގައި ޖެހިފައިވާ މީހުންނަށް އިންސާނީ އެހީތެރިކަން ފޯރުކޮށްދިނުމަށް ޔޫއޭއީގެ ޤަރާރުގައި ގޮވައިލާފައިވާނެ ކަމަށުގައި އެ ޤައުމުން ބުނެއެވެ.
"ޣައްޒާގެ [ރައްޔިތުންގެ] ހާލަތު އޮތީ ވަރަށް ދަށު ދަރަޖައިގައި. ބަދަލު ނުކުރެވިދާނެ ހާލަތެއްގައި. އަޅުގަނޑުމެންނަށް މަޑުކޮށްގެން ތިބެވޭކަށް ނެތް. ކައުންސިލުން އަވަސް ފިޔަވަޅުތަކެއް އަޅައި، [ޣައްޒާއަށް] އިންސާނީ އެހީ ވައްދަން ބާރުއަޅަން ޖެހޭ،" އދގައި ހުންނަ ޔޫ.އޭ.އީގެ މިޝަނުން ނެރުނު ބަޔާނެއްގައި ބުނެފައިވެއެވެ. ޔޫ.އޭ.އީގެ ޤަރާރަށް ޢަރަބި ޤައުމުތަކާއި އޮގަނައިޒޭޝަން އޮފް އިސްލާމިކް ކޯޕޮރޭޝަން (އޯ.އައި.ސީ)ގެ މެންބަރު ޤައުމުތަކުގެ ތާޢީދު ވަނީ ލިބިފައެވެ.
ނަމަވެސް، މި ޤަރާރު ފާސްވާނީ ސަލާމަތީ މަޖިލީހުގެ 15 މެންބަރުންގެ އަޣުލަބިއްޔަތު ލިބިއްޖެ ނަމައެވެ. އަދި، އެ މަޖިލީހުގެ ދާއިމީ ފަސް މެންބަރުން ކަމުގައިވާ އެމެރިކާއާއި، ރަޝިޔާއާއި، ޗައިނާއާއި، ފަރަންސޭސިވިލާތުގެ އިތުރުން އިނގިރޭސިވިލާތުން އެ ޤަރާރު ވީޓޯ ނުކޮށްފި ނަމައެވެ. ޣައްޒާގެ މައްސަލައިގައި އެ މަޖިލީހަށް ހުށަހަޅާފައިވާ އެހެން ޤަރާރުތަކެކޭ އެއްފަދައިން އެމެރިކާއާއި އިނގިރޭސިވިލާތުން ޔޫ.އޭ.އީގެ ޤަރާރު ވެސް ވީޓޯ ކުރުމަކީ އެކަށީގެންވާ ކަމެކެވެ.
"ޔޫ.އޭ.އީން ހުށަހަޅާފައިވާ ޤަރާރު ވެސް އެމެރިކާއިން ވީޓޯ ކުރާނެ ކަމަށް ބެލެވޭ. [ޔަހޫދީންގެ] އުދުވާންތައް ހުއްޓައިލަން ގޮވައިލާ ހުރިހާ ޤަރާރެއް އެމެރިކާއިން ވީޓޯ ކުރާނެ. އިސްރާޢީލުގެ ބާރުތައް ހަނިކުރަން ހުށަހަޅާ ކޮންމެ ޤަރާރަކަށް އެމެރިކާއިން. ނޫނެކޭ ބުނާނެ. މުޅި ދުނިޔެއަށް ވެސް ފެނޭ ޔަހޫދީން ހިންގަމުންދާ ޤަތުލުޢާންމަށް އެމެރިކާއިން ރުހުން ދީފައިވާ މަންޒަރު. އެ ޤަތުލުޢާންމު ހިންގަމުން އެ ދަނީ އެމެރިކާއިން ފޯރުކޮށްދެމުންދާ ހަތިޔާރު ބޭނުންކޮށްގެން،" ޔޫއޭއީން ހުށަހަޅާފައިވާ ޤަރާރާ ގުޅޭ ގޮތުން ވާހަކަފުޅު ދައްކަވަމުން އޮސްޓްރޭލިޔާގެ މަރޑޮކް ޔުނިވަރސިޓީގެ ލެކްޗަރަރއެއް ކަމުގައި އިޔަން ވިލްސަން ވިދާޅުވިއެވެ.