ޔަހޫދީ ފައުޖުން ހިންގަމުންދާ ލާއިންސާނީ އުދުވާނުގެ ސަބަބުން ޣައްޒާގެ ޞިއްޙީ ނިޒާމު ރޫޅިފައިވާ ކަމަށާއި، އެ ސަރަޙައްދުގައި ދިރިއުޅޭ 2.3 މިލިޔަނެއްހާ މީހުންގެ ޞިއްޙީ ހާލަތު އިތުރަށް ގޯސްވަމުންދާ ކަމުގައި ދުނިޔޭގެ ޞިއްޙަތު ޖަމުޢިއްޔާ، ޑަބްލިޔުއެޗްއޯގެ ޑިރެކްޓަރ ޖެނެރަލް ޓެޑްރޯސް އަދަނޮމް ގެބްރިއޭސުސް ވިދާޅުވެއްޖެއެވެ. އޭނާ މި މޭރުމުން ވާހަކަފުޅު ދައްކަވާފައި ވަނީ، ޣައްޒާގެ ރައްޔިތުންގެ ޞިއްޙީ ހާލަތާ ގުޅޭ ގޮތުން މަޝްވަރާ ކުރުމަށް ޑަބްލިޔުއެޗްއޯގެ އެގްޒެކެޓިވް ބޯޑުން ބޭއްވި ކުއްލި ބައްދަލުވުމެއްގައެވެ.
"މި ހަނގުރާމައާ ގުޅިގެން ޣައްޒާގެ ރައްޔިތުންގެ ޞިއްޙީ ހާލަތު ވަނީ ދަށު ދަރަޖައަކަށް ވެއްޓިފައި. ކުދިކުދި ސަރަޙައްދުތެއްގައި އެތަކެއް ސަތޭކަ ބަޔަކު ތޮއްޖެހިގެން ދިރިއުޅެން މަޖުބޫރުވުމުގެ ސަބަބުން އެތަކެއް ޞިއްޙީ މައްސަލައެއް ދަނީ ކުރިމަތިވަމުން. އެ މީހުންނަށް ބޭނުންވާ މިންވަރަށް ކާބޯތަކެއްޗާއި ފެނެއް ނެތް. ސާފުތާހިރުވާން ބޭނުންވާ ސާމާނެއް ނެތް. ޣައްޒާ އޮތީ ނުރައްކާތެރި ބަލިތައް ފެތުރެން ފައްކާވެފައި،" ޓެޑްރޯސް ވިދާޅުވިއެވެ.
ކުރިއަށް އޮތީ ފިނި މޫސުން ކަމުގައިވާއިރު، ޣައްޒާގައި ޢާންމު ބަލިމަޑުކަމެއް ފެތުރިދާނެ ކަމުގެ ބިރުވެރި ކަން އިތުރުވެފައިވާ ކަމުގައި ވެސް އޭނާ ވިދާޅުވިއެވެ. "ޣައްޒާގެ ޞިއްޙީ ނިޒާމު އޮތީ ކުޑަކަކޫ މަތީގައި. ހުއްޓުމަކަށް އައުމާ ގާތުގައި،" ޓެޑްރޯސް ވިދާޅުވިއެވެ.
އޮކްޓޫބަރު 7 ވަނަ ދުވަހު ޔަހޫދީންގެ އުދުވާން ފެށުމުގެ ކުރިން ޣައްޒާގެ ހޮސްޕިޓަލްތަކުގައި 3,500 އެއްހާ އެނދުން ޚިދުމަތް ފޯރުކޮށްދެމުން ދިޔަ ނަމަވެސް، މިހާރު ބޭނުން ކުރެވޭ ހާލަތެއްގައި ހުރީ އެންމެ 1,400 އެނދު ކަމުގައި ޑަބްލިޔުއެޗްއޯއިން ބުނެއެވެ. ޣައްޒާގައި ދެކުނުގައި ހުރި އެންމެ ބޮޑު ދެ ހޮސްޕިޓަލް ވެސް މިހާރު އޮތީ ބަންދު ކުރަން ޖެހޭ ފަދަ ހާލަތެއްގައެވެ. ޞިއްޙީ ފަރުވާއަށް ބޭނުންވާ ސާމާނު ވަނީ ހުސްވެފައެވެ.
ޓެޑްރޯސް ވިދާޅުވީ، އޮކްޓޫބަރު 7 ވަނަ ދުވަހު ޔަހޫދީ ފައުޖުން ފެށި އުދުވާނުގައި އެ މީހުން ޣައްޒާއާއި ހުޅަނގު އައްސޭރީގައި ހުންނަ ޞިއްޙީ ފަރުވާދޭ ހޮސްޕިޓަލްތަކާއި މަރުކަޒުތަކަށް ތަފާތު 449 ފަހަރު ޙަމަލަ ދީފައިވާ ކަމުގައެވެ. "ޣައްޒާގައި ޞިއްޙީ ފަރުވާ ދިނުމަށް ވަނީ ހުރަސް އެޅިފައި. ޞިއްޙީ ޚިދުމަތްތެރިން ތިބީ ޙަމަލަތަކުގެ މެދުގައި. ޞުލްޙަ ގާއިމު ނުކޮށް، ޞިއްޙީ ފަރުވާ ފޯރުކޮށެއް ނުދެވޭނެ،" އެނާ ވިދާޅުވިއެވެ.
އޮކްޓޫބަރު 7 ވަނަ ދުވަހުން ފެށިގެން ޣައްޒާއަށް ދެމުންދާ ޙަމަލަތަކުގައި ޔަހޫދީ ފައުޖުން ވަނީ ޣައްޒާގެ 17,700 އަށްވުރެ ގިނަ މީހުން ޝަހީދު ކޮށްލައިފައެވެ. އަދި، ސުންނާފަތި ކޮށްލާފައިވާ ޢިމާރާތްތަކުގެ ދަށުގައި ޝަހީދު ކޮށްލާފައިވާ އިތުރު 6,000 އެއްހާ މީހުންގެ ހަށިތައް ތާށިވެފައިވާ ކަމުގައި ޣައްޒާގެ އޮފިޝަލުން ވިދާޅުވެއެވެ. މި އުދުވާންތަކުގައި ޝަހީދު ކޮށްލާފައިވާ މީހުންގެ ތެރޭގައި 6,500 އަށްވުރެ ގިނަ ޢަދަދަކަށް ކުޑަކުދިން ހިމެނޭއިރު، ޒަޚަމު ކޮށްލާފައިވާ މީހުންގެ ޢަދަދު ވަނީ 48,000 އަށްވުރެ އިތުރުވެފައެވެ.