މާލޭ މޭޔަރުގެ ކެމްޕޭން އެމްޑީޕީން ރަސްމީކޮށް ފަށައިފި

މާލޭ ސިޓީ މޭޔަރާއި ކައުންސިލްގެ ހުސްވެފައިވާ 3 ދާއިރާއަށް ވާދަކުރައްވާ އެމްޑީޕީ ކެންޑިޑޭޓުންގެ ކެމްޕޭން ރަސްމީކޮށް ފަށައިފިއެވެ.

މާލޭގެ މޭޔަރުގެ އިންތިޚާބު ބޭއްވުމަށް ހަމަޖެހިފައިވަނީ އަންނަ މަހުގެ 13 ވަނަ ދުވަހުއެވެ. އިންތިޚާބުގައި ވާދަކުރައްވާ ކެންޑިޑޭޓުންނާއި އެބޭފުޅުން ނިސްބަތްވާ ޕާޓީތަކުން ގެންދަނީ، މި އިންތިޚާބު ކާމިޔާބު ކުރުމަށްޓަކައި ތާއީދު ހޯދުމުގެ މަސައްކަތް ކުރަމުންނެވެ. މި އިންތިޚާބުގައި އިދިކޮޅު އެމްޑީޕީން ވާދަކުރާ ކެންޑިޑޭޓްގެ ކެމްޕޭން ރޭ ވަނީ ރަސްމީކޮށް ލޯންޗުކޮށްފައެެވެ. އެމްޑީޕީގެ ސޯސަން ޖަގަހާގައި ބޭއްވި މިޖަލްސާގައި ކުރީގެ ރައީސް އިބްރާހިމް މުހައްމަދު ޞާލިހާއި، އެމްޑީޕީގެ ޗެއަރޕާސަން ފައްޔާޟު އިސްމާއިލާއި، އެޕާޓީގެ ލީޑަރޝިޕްގެ ގިނަ ބޭފުޅުން ވަނީ ބައިވެރިވެވަޑައިގެންނެވިއެވެ.

މިވެންޓުގައި އެމްޑީޕީގެ ފަރާތުން މާލެ ސިޓީގެ ހުސްވެފައިވާ ތިން ދާއިރާއަށް ވާދަކުރައްވާ ކެންޑިޑޭޓުން ވަނީ ތަޢާރަފްކޮށްފައެވެ. މިއިވެންޓުގައި އެމްޑީޕީގެ ޓިކެޓްގައި މާލެ ސިޓީ މޭޔަރުގެ މަޤާމަށް ވާދަކުރައްވާ އާޒިމް ވަނީ މާލެ ސިޓީގައި ހުރި މައްސަލަތަކާއި، ހައްލު ގެނައުމަށް އޭނާ ހުށަހަޅުއްވާ ތަސައްވަރުތައް ހިއްސާ ކުރައްވާފައެވެ. އާޒިމް ވަނީ މާލޭގެ ރައްޔިތުންނަށް ދިމާވެފައިވާ މައްސަލަތައް ހައްލު ކޮށްދެއްވާނެ ކަމަށް ވިދާޅުވެފައެވެ.

މާލޭ މޭޔަރުކަމުގެ މަޤާމަށް ވާދަކުރައްވާނެކަން މިހާތަނަށް އިއުލާންކުރައްވާފައިވަނީ އެމްޑީޕީގެ ފަރާތުން އެމްޓީސީސީގެ ކުރީގެ ސީއީއޯ އާދަމް ޢާޒިމް، ޕީޕީއެމް، ޕީއެންސީގެ ފަރާތުން ކުރީގެ ބަންޑާރަ ނާއިބު އާއިޝަތު ޢާޒިމާ ޝަކޫރު، ދަ ޑިމޮކްރެޓްސްގެ ފަރާތުން މާލޭ ސިޓީ ގަލޮޅު އުތުރު ދާއިރާގެ ކައުންސިލަރު މުޙައްމަދު ސައިފް ފާތިހްއެވެ. އަދި ރައީސް ޔާމީން އިސްކޮށް ހުންނަވާ އުފައްދަވަން މަސައްކަތްކުރާ، ޕީޕަލްސް ނެޝަަނަލް ޕްރަންޓުން، ކުރީގެ ކޮމިޝަނަރ އޮފް ޕޮލިސް ޙުސައިން ވަޙީދުއެވެ.

މާލެ ސިޓީގެ މޭޔަރުގެ ގޮނޑި ހުސްވެފައިވަނީ، އެމަޤާމުގައި ކުރިން ހުންނެވި މިހާރުގެ ރައީސުލްޖުމްހުރިއްޔާ ޑރ. މުޙައްމަދު މުޢިއްޒު ރައީސުލްޖުމްހޫރިއްޔާކަމުގެ މަޤާމަށް އިންތިޚާބުވެވަޑައިގަތުމުން، މޭޔަރުކަމުން އިސްތިއުފާދެއްވުމުންނެވެ.

މޭޔަރަކު އައްޔަންކުރެއްވުމަށް ބާއްވާ އިންތިޚާބަށް ކުރިމަތިލިމުގެ ފުރުޞަތު އިލެކްޝަން ކޮމިޝަނުން ހުޅުވާލެއްވީ މިދިޔަ މަހުގެ 28ވަނަ ދުވަހުއެވެ. ކުރިމަތިލުމުގެ މުއްދަތު ހަމަވާނީ މިހަފްތާގެ ބުދަ ދުވަހުއެވެ.