ރައީސްގެ އަނބިކަބަލުންނަށް ޚާއްޞަ އުސޫލެއް ނުހަދަން، އެއީ ޢާންމު އުސޫލެއް: ސީއެސްސީ

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އަނބިކަނބަލުން ސާޖިދާ މުޙައްމަދު، އެކަމަނާ މިހާތަނަށް މަސައްކަތްކުރެއްވި ސިއްޙީ ދާއިރާއަކަށް ޚިދުމަތްކުރައްވަން ބޭނުންފުޅުވާތީ، ކޮންޓްރެކްޓެއް ހެދީ ޚާއްޞަ އުސޫލަކުންނޫންކަމަށާއި، އެއީ މީގެ ކުރިންވެސް ޢަމަލުކުރާ އުސޫލެއްކަމަށް ސިވިލް ސާރވިސް ކޮމިޝަން، ސީއެސްސީން ވިދާޅުވެއްޖެއެވެ.

ރައީސްގެ އަނބުކަނބަލުން ސާޖިދާ މިހާތަނަށް މަސައްކަތްކުރައްވަމުން ގެންދެވީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)ގެ ސީނިއާ ސައިންޓިފިކް އޮފިސަރެއްގެ ގޮތުގައެވެ. ސިއްޙީ ވުޒާރާއިން ރައީސްގެ އަނބިކަނބަލުން ސާޖިދާގެ ފަންނީ އެހީތެރިކަން ބޭނުންވާ ކަމަށް އަންގައި، ކޮންޓްރެކްޓް އުސޫލުން އެކަމަނާގެ ކޮންސަލްޓެންސީ ލިބޭނެގޮތް ހަދައިދޭން ސިވިލް ސާރވިސް ކޮމިޝަނުގައި އެދިވަޑައިގަތުމުން އެކަން އެކޮމިޝަނުން ވަނީ ހަމަޖައްސަވާފައެވެ. އެކޮމިޝަނުން ރައީސްގެ އަނބިކަނބަލުންނާއެކު ކޮންޓްރެކްޓެއް ހެދުމުން އެކަމުގެ މަޢުލޫމާތު ރައްޔިތުންގެ މަޖިލީހުގެމިނިވަން މުއައްސަސާތަކުގެކޮމިޓީން ވަނީ ހޯދާފައެވެ. އެގޮތުން އެކޮމިޓީއަށް ސިވިލް ސާރވިސް ކޮމިޝަން ޙާޒިރުކުރިއެވެ.

މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގައި ވާހަކަ ދައްކަވަމުން ސިވިލް ސާވިސް ކޮމިޝަންގެ ރައީސް މުހައްމަދު ނާސިހް ވިދާޅުވީ އެކަމަނާ އެންމެ ފުރަތަމަ އެދިވަޑައިގަތީ ދާއިމީ ވަޒީފާގައި ހުންނަވައިގެން ލުއިތަކެއް ދެއްވުމަށްކަމަށެއެވެ. އެހެން ނަމަވެސް، އެގޮތަށް ލުއިތަކެއް ދިނުމަށް ޤަވާއިދު ތަން ނުދޭތީ ހަމައެކަނި އޮތް ގޮތަކީ ވަޒީފާއިން މުސާރަ ނުލިބޭ ގޮތަށް، ކޮންޓްރެކްޓް އުސޫލުން ޚިދުމަތްކޮށް ދިނުން ކަމަށްވާތީ އެގޮތައް ލަފާ ދެއްވީކަމަށް ނާސިހު ވިދާޅުވިއެވެ.

ނާސިހް ވިދާޅުވީ އެކަމާ ގުޅިގެން ގާނޫނީގޮތުން އެކަން އޮތްގޮތް ބެލި އިރު، ރައީސުލްޖުމްހޫރިއްޔާގެ އަނބިކަނބަލުންނަށް ސިވިލް ސާވިސްގެ ވަޒީފާގައި މަސައްކަތް ނުކުރެވޭނެ ކަމަށް ރާއްޖޭގައި މިހާރު ހުރި އެއްވެސް ގާނޫނަކުން މަނާ ނުކުރާކަމަށެވެ. އެގޮތުން ކޮންޓްރެކްޓް އުސޫލުން ޚިދުމަތް ކުރެއްވުމަށް ސާޖިދާ ނިންމެވީ އެކަމަނާ އަދާކުރައްވަމުން ގެންދެވި ވަޒީފާ އެގޮތުގައި ކުރިއަށްގެންދެވުމަށް ދަތިތަކެއް ހުރުމުން ކަމަށްވެސް ނާސިހް ވިދާޅުވިއެވެ.

ނާސިހް ވިދާޅުވީ ރައީސްގެ އަނބިކަބަލުންނައެކު މިމަހުގެ 7 ވަނަ ދުވަހު ހެދި ކޮންޓްރެކްޓް ހަދާފައިވަނީ މަހަކު 40 ގަޑިއިރުގެ ޚިދުމަތް ލިބޭ ގޮތަށް އުޖޫރައެއްގެ ގޮތުގައި ގަޑިއަކު 75 ރުފިޔާގެ އުޖޫރައެއް ކަނޑައަޅައިގެން ކަމަށެވެ. އެއީ މަހަކަށް ބަލާނަމަ 3000 ރުފިޔާއެވެ. އަދި އެއީ ރައީސް ޑރ. މުހައްމަދު މުއިއްޒުގެ އަނބިކަނބަލުންކަމުގައި ވުމުން ހަމަޖެއްސި ހާއްސަ އުސޫލެއް ނޫން ކަމަށްވެސް ނާސިހް ވިދާޅުވިއެވެ. އޭނާ ވިދާޅުވީ އެ އުސޫލުގެ ދަށުން މީގެ ކުރިންވެސް ގިނަ މިނިސްޓްރީތަކަށް އެކި މީހުން ޚިދުމަތް ކޮށްދީފައިވާ ކަމަށާއި، މިހާރުވެސް ހިދުމަތް ކޮށްދެމުންދާ ކަމަށްވެސް ކޮމިޝަންގެ ރައީސް ވިދާޅުވިއެވެ.

"ދެން އުފެދޭ ސުވާލަކީ މީ ޚާއްސަ އުސޫލެއްގެ ތެރެއިން ފަސްލޭޑީއައް ވީމައި ހަމަ ޖައްސާދިން ކަމެއްތޯ ނޫންތޯ. އެހެންނެއްނޫން ސިވިލް ސާރވިސްގެ ތެރޭގައި އެހެން މިނިސްޓްރީތަކުގައިވެސް މި އުސޫލުން މަސައްކަތް ކުރާ މުވައްޒަފުންތަކެއް އެބައުޅޭ. އެއީ ހަމަ އެ މިނިސްޓްރީތަކުގައި ދާއިމީ މުވައްޒަފުންގެ ގޮތުގައި ތިއްބެވި މުވައްޒަފުން އެ މިނިސްޓްރީގެ ޕްރޮޖެކްޓްތަކަށް މުސާރަނުލިބޭ ގޮތައް އެ ހުރި ވަޒީފާއިން ވީއްލުމަށްފަހުގައި އެ ޕްރޮޖެކްޓެއްގައި މަސައްކަތްކުރުމަށް ކޮންޓްރެކްޓެއްގެ ދަށުން ވީއްލާފައި އެބަހުރި." ނާސިހް ވިދާޅުވިއެވެ.

ނާސިހް ވިދާޅުވީ ފިނޭންސް މިނިސްޓްރީގައިވެސް 2018 ގައި ފެށިގެން މިހާތަނަށް ފަސް މުވައްޒަފަކަށް މި ފުރުސަތު ދެއްވާފައިވާކަމަށާއި، އެންވަޔަރަމެންޓް މިނިސްޓްރީގެ ދެ މުވައްޒަފަކާއި ހައުސިން މިނިސްޓްރީގެ ވެސް ތިން މުވައްޒަފަކު މި އުސޫލުގެ ދަށުން މަސައްކަތްކޮށްފައިވާކަމަށްވެސް ނާސިޙް ވިދާޅުވިއެވެ.