ޣައްޒާއިން ކާބޯތަކެތި ހުސްވެ އަމަން އަމާންކަމާއި ޢާންމު ނިޒާމު ރޫޅުމާ ގާތްވެފައިވާ ކަމުގައި ބައިނަލްއަޤުވާމީ އެހީދޭ ޖަމާޢަތްތަކުން ބުނެފިއެވެ. މި ކަމާ ގުޅިގެން ޣައްޒާއާއި މިޞްރު ގުޅޭ ރަފަޙް ހުރަސް ތެރެއިން ގިނަ ޢަދަދެއްގެ ބަޔަކު މިޞްރަށް ދަތުރު ކުރަން މަސައްކަތް ކޮށްފާނެ ކަމުގެ ބިރު އިތުރުވެފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ބުނެއެވެ. އޮކްޓޫބަރު 7 ވަނަ ދުވަހުން ފެށިގެން ޔަހޫދީން ޣައްޒާގެ ފުރަބަންދު ހަރުކަށި ކޮށްފައިވާއިރު، އެ ސަހަރުން ވަދެނިކުމެވެވެން މިހާރު އޮތް ހަމައެކަނި މަގަކީ ރަފަޙް ހުރަހެވެ.
އޮކްޓޫބަރު 7 ގައި ޔަހޫދީ ފެށި އުުދުވާނާ ގުޅިގެން ޣައްޒާގައި ދިރިއުޅޭ 2.3 މިލިޔަނެއްހާ މީހުންނަށް ވަނީ، އެ މީހުންގެ ގެދޮރު ދޫކޮށް އެހެން ހިސާބުތަކަށް ދަތުރު ކުރަން މަޖުބޫރުވެފައެވެ. ނަމަވެސް، މެދުކެނޑުމެއް ނެތި ޔަހޫދީ ފައުޖުން ޣައްޒާއަށް ބޮން އަޅަމުންދާއިރު، އެ ސަހަރުގައި ރައްކާތެރި އެންމެ އިންޗިއެއްހާ ތަންކޮޅެއް ވެސް ނެތެވެ. މި އުދުވާނުގައި ޝަހީދު ކޮށްލާފައިވާ މީހުންގެ ޢަދަދު 18,200 އަށް އަރާފައިވާއިރު، އެ ސަހަރުގެ ހުރިހާ ސަރަޙައްދަކުން ކާބޯތަކެތި ހުސްވެފައިވާ ކަމުގައި އެހީދޭ ޖަމާޢަތްތަކުން ބުނެއެވެ.
ދުނިޔޭގެ ކާބޯތަކެއްޗާ ބެހޭ ޕުރޮގުރާމް (ޑަބްލިޔު.އެފް.ޕީ)ގެ ޑެޕިޔުޓީ ޑިރެކްޓަރ ކޯލް ސްކައޫ ވިދާޅުވީ، ޣައްޒާގައި ދިރިއުޅޭ ރައްޔިތުންނަށް ގޮތްހުސްވެެ، ކާބޯތަކެތި ހިފައިގެން ދަތުރުކުރާ އެ ޖަމުޢިއްޔާގެ އުޅަނދުފަހަރު ހުއްޓުވަން ފެށުމަކީ ދުރުގައިވާ ކަމެއް ނޫން ކަމުގައެވެ. "ޣައްޒާގެ އާބާދީގެ ދެބައިކުޅަ އެއްބައި މީހުންނަށް ވަނީ ހައިހޫނުކަމާ ކުރިމަތިލާން ޖެހިފައި. ޣައްޒާގެ ކޮންމެ 10 މީހެއްގެ ތެރެއިން 9 މީހުންނަށް ދުވާލަކު ބަނޑުފުރާނަ މުއްތިވާ ވަރަށް ވެސް ކާއެތިކޮޅެއް ނުލިބޭ،" ސްކައޫ ވިދާޅުވިއެވެ.
އ.ދއިން ބުނީ، ޣައްޒާގައި ދިރިއުޅޭ 2.3 މިލިޔަން މީހުންގެ ތެރެއިން 1.9 މީހުންގެ ގެދޮރު ނެތް ކަމުގައެވެ. އަދި، އެ މީހުން ދިރުއުޅެމުން ދަނީ މަގުތަކާއި އދގެ މަރުކަޒުތަކުގައި ވަރަށް ނިކަމެތި ހާލުގައި ކަމުގައެވެ. "ޣައްޒާ އޮތީ އާންމު ނިޒާމު ގެއްލުމާ ވަރަށް ގާތުގައި. ނުރައްކާތެރި ބަލިމަޑުކަމެއް ފެތުރިދާނެ ހާލަތެއްގައި. އެތަކެއް ސަތޭކަ ހާސް ބަޔަކު މިޞްރަށް ދަތުރު ކުރަން ފަށާފާނެ ކަމުގެ ބިރު ވެސް ބޮޑު،" އދގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ވިދާޅުވިއެވެ.
ޔަހޫދީ ފައުޖުން މެދުކެނޑުމެއް ނެތި ޣައްޒާއަށް ދެމުންދާ ޙަމަލަތަކާ ގުޅޭ ގޮތުން ފަލަސްޠީނުގެ ރެފިޔުޖީންނާ ބެހޭ އދގެ އިދާރާ (ޔޫ.އެން.އާރް.ޑަބްލިޔު.އޭ)ގެ ކޮމިޝަނަރ ޖެނެރަލް ފިލީޕޯ ލަޓްޒަރީނީ ވިދާޅުވީ ޔަހޫދީންގެ ޙަމަލަތަކުގެ ބޭނުމަކީ ޣައްޒާގެ ރައްޔިތުން އެ މީހުންގެ ބިންތަކުން ބޭލުވުން ކަމުގައެވެ. އަދި، މިޞްރަށް ދަތުރު ކުރަން އެ މީހުންނަށް މަޖުބޫރު ކުރުވުން ކަމުގައެވެ. ނަމަވެސް، ޣައްޒާއާއި މިޞްރު ގުޅޭ ސަރަޙައްދީ ރޮނގު ކައިރީގައި މިޞްރުގެ ފައުޖުތަކުން ސަލާމަތީ ފިޔަވަޅުތައް ވަރުގަދަ ކޮށްފައިވާ ކަން ފާހަގަ ކޮށްލަން ޖެހެއެވެ. އަދި، ޣައްޒާގެ ޢާންމު ރައްޔިތުން މިޞްރަށް އެތެރެވުމުގެ ފުރުޞަތު ނުދޭނެ ކަމަށް ބުނެ މިޞްރުން މީގެ ކުރިން އިންޒާރު ދީފައިވާ ކަން ވެސް ފާހަގަ ކޮށްލަން ޖެހެއެވެ.