މާލީ ވަޒީރުގެ އެޑްވައިޒަރުންނަށް މުނައްވަރާއި ނަޞީރު
-
ދެބޭފުޅުންވެސް އައްޔަންކުރެއްވީ މިނިސްޓަރުންގެ ފެންވަރުގަ
-
އިޤްތިޞާދީ އަދި މާލީ ދާއިރާގެ ތަޖުރިބާކާރު ދެ ބޭފުޅުން
-
ދައުލަތުގެ އިސް މަޤާމުތަކެއް ފުރުއްވި
އެޑްވައިޒަރ ޓު ދަ މިނިސްޓަރ އޮފް ފިނޭންސްގެ މަގާމަށް ދެބޭފުޅަކު ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު އައްޔަންކުރައްވައިފިއެވެ.
އެ މަޤާމަށް އައްޔަންކުރެއްވީ ކ.މާފުށީ މުސްތަރީގެ އަޙްމަދު ނަޞީރާއި، ދަފްތަރު ނަންބަރު ރސ 99031 އަޙްމަދު މުނައްވަރެވެ. އެ ދެބޭފުޅުން އެ މަޤާމަށް އައްޔަންކުރައްވައި މިއަދު ވަނީ މަގާމުގެ ފަތްކޮޅު ދެއްވާފައެވެ. މި ދެބޭފުޅުންނަށް މަގާމުގެ ފަތްކޮޅު ދެއްވާފައިވަނީ މިކަމަށްޓަކައި މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތެއްގައެވެ.
މި ދެބޭފުޅުން އެޑްވައިޒަރ ޓު ދަ މިނިސްޓަރ އޮފް ފިނޭންސްގެ މަގާމަށް ޢައްޔަނުކުރައްވާފައިވަނީ މިނިސްޓަރުންގެ ފެންވަރުގައެވެ. އަދި، ދެ ބޭފުޅުންގެ މަސްޢޫލިއްޔަތުތަކުގެ ތެރޭގައި ވަޒީރުންނަށް ބޭނުންވާ މާލީ އިރުޝާދު ދިނުން ހިމެނެއެވެ.
އަޙްމަދު މުނައްވަރު ވަނީ ޕީޕީއެމްގެ ކުރީގެ ސަރުކާރުގައި ފިނޭންސް މިނިސްޓަރުކަންކުރައްވާފައެވެ. އަދި އަޙްމަދު ނަޞީރު ވަނީ ވަނީ މަރުކަޒީ ބޭންކު، އެމްއެމްއޭގެ ގަވަރުނަރުކަން ކުރައްވާފައެވެ.