ޣައްޒާ ހަނގުރާމައިގެ ސަބަބުން މުޅި ދުނިޔެއިން ގެދޮރު ގެއްލިފައިވާ މީހުންގެ ޢަދަދު ރެކޯޑު ޢަދަދަކަށް އިތުރުވެދާނެ ކަމުގެ ބިރު އެބައޮތް ކަމަށް އދގެ ރެފިއުޖީންނާ ބެހޭ ހައި ކޮމިޝަނަރ ފިލިޕޯ ގްރޭންޑީ ވިދާޅުވެއްޖެއެވެ. އޭނާ އެ ގޮތަށް ވިދާޅުވީ ދުނިޔޭގެ ރެފިއުޖީ ފޯރަމްގައި ވާހަކަފުޅުދައްކަވަމުންނެވެ.
ޔަހޫދީ ފައުޖުތަކާއި ޣައްޒާގެ ވެރިކަންކުރާ ޙަމާސް ޖަމާޢަތާއި ދެމެދު ކުރާ ހަނގުރާމައިގެ ސަބަބުން ގެދޮރު ގެއްލިފައިވާ މީހުން އިތުރުވެ، މެދުއިރުމަތީގައި ގެދޮރު ގެއްލިފައިވާ މީހުންގެ ޢަދަދު އިތުރުވުމުގެ ބިރުވެރިކަންވެސް އެބައޮތް ކަމަށް ފިލިޕޯ ވިދާޅުވިއެވެ. ހަނގުރާމަ ހުއްޓާލުމަށް ގޮވައިލައި އދގެ ޢާންމު މަޖިލީހުން ޤަރާރު ހުށަހެޅުމުގެ ކުރިން ވެސް ފިލިޕޯ ވަނީ ގެދޮރު ގެއްލިފައިވާ މީހުންގެ ޢަދަދު މަދުކުރުމަށް ހަނގުރާމަ ހުއްޓައިލުމަށް ގޮވައިލައްވައިފައެވެ.
ފަލަސްޠީނުގެ ރެފިޔުޖީންނާ ބެހޭ އދގެ އިދާރާއިން ބުނި ގޮތުގައި އޮކްޓޯބަރު މަހު ހަތް ވަނަ ދުވަހުން ފެށިގެން ޔަހޫދީ ފައުޖުތަކުން ޣައްޒާއަށް ދެމުންދާ ޢުދުވަނީ ޙަމަލާތަކުގައި ގާތްގަޑަކަށް 1.9 މިލިއަން މީހުންގެ ގެދޮރު ގެއްލިފައިވެއެވެ. އެއީ ޣައްޒާގެ އާބާދީގެ 85 އިންސައްތައެވެ. ޣައްޒާގެ އުތުރުގެ އިތުރުން ދެކުނުގައިވެސް ޔަހޫދީންގެ ޙަމަލާތައް ވަރުގަދަކޮށްފައިވުމުން، ޣައްޒާއިން ގެދޮރު ގެއްލޭ މީހުންގެ ޢަދަދު އަދިވެސް އިތުރުވާނެ ކަމަށް ބެލެވެއެވެ.