ޔަމަނުގައި ޙަރަކާތްތެރިވާ ހަތިޔާރު އެޅި ޖަމާޢަތެއް ކަމުގައިވާ ހޫޘީން ރަތް ކަނޑުގައި ދަތުރު ކުރަމުން ދިޔަ އާގުބޯޓަކަށް ޙަމަލާ ދީފިއެވެ. ހޫޘީ ޖަމާޢަތުން ޙަމަލާ ދީފައި ވަނީ ބާބް އަލް-މަންދަބީ ކަނޑުއޮޅިން ދަތުރު ކުރަމުންދިޔަ ލައިބީރިޔާގެ ދިދަ ނަގާފައި އޮތް އާގުބޯޓަކަށެވެ. ޔަމަނުގެ ބަނދަރުމަތީ ރަށެއް ކަމުގައިވާ އަލް-މަޚާގެ އުތުރުން ދަތުރު ކުރަނިކޮށް އެ ބޯޓަށް ދިން ޙަމަލާގައި އޭގެ ޑެކުގައި އަލިފާން ރޯވެ، ގެއްލުންތަކެއް ލިބުނެވެ.
ޔަމަން ކައިރިން ދަތުރު ކުރަމުންދާ އާގުބޯޓުތަކަށް ހޫޘީން ޙަމަލަ ދޭން ފަށާފައި ވަނީ ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ޢުދުވާން ހުއްޓުމަކަށް ގެނައުމަށް ބާރުއެޅުމުގެ ގޮތުންނެވެ. އެ ޖަމާޢަތުގެ ޙަމަލާތައް އަމާޒު ކުރަމުން ދަނީ މުދާ ބަރުކޮށްގެން ޔަހޫދީ ދަޢުލަތަށް ދަތުރު ކުރާ އުޅަނދުފަހަރަށެވެ.
ހޫޘީންގެ ޙަމަލާގައި އަލް-ޖިސްރާ ނަން ދީފައިވާ އުޅަނދަށް ގެއްލުންތަކެއް ލިބިފައިވާ ކަމަށާއި، އުޅަނދުގެ ޑެކުގައި އަލިފާނުގެ ހާދިސާއެއް ހިނގާފައިވާ ކަން އެމެރިކާގެ ދިފާޢީ ވުޒާރާއިން ވެސް ވަނީ ކަށަވަރު ކޮށްދީފައެވެ. އަލް-ޖިސްރާއަކީ 370 މީޓަރު ދިގު މުދާއުފުލާ އާގުބޯޓެކެވެ. މި ޙަމަލައާ ގުޅޭ ގޮތުން ވާހަކަފުޅު ދައްކަވަމުން އެމެރިކާގެ ޤައުމީ ސަލާމަތާ ބެހޭ މުޝީރު ޖޭކް ސަލިވަން ވަނީ ހޫޘީންގެ ޙަމަލާތަކުގެ ފަހަތުގައި އޮތީ އީރާން ކަމަށް ތުހުމަތު ކުރައްވާފައެވެ.
ޔަމަން ކައިރިން ދަތުރު ކުރަމުންދާ ހުރިހާ އާގުބޯޓަކަށް ޙަމަލާ ދޭނެ ކަމުގެ އިންޒާރު ހޫޘީން ދީފައިވާއިރު، އަލް-ޖިސްރާއަށް ޙަމަލާ ދީފައި ވަނީ ގްރީސުން ފުރައިގެން ސިންގަޕޫރަށް ދަތުރު ކުރަމުން ދިޔަ މަގުމަތީގައެވެ. މި ކަމާ ގުޅޭ ގޮތުން ސަލިވަން ވިދާޅުވީ، ހޫޘީންގެ ޢަމަލުތަކުގެ ސަބަބުން ސަރަޙައްދީ ހަމަޖެހުމަށް ނުރައްކާވެފައިވާ ކަމުގައެވެ.
ކަނޑުމަގުން އުފުލާ މުދަލުގެ 40 އިންސައްތައަކީ ބާބް އަލް-މަންދަބީ ކަނޑުއޮޅިން ގެންދާ މުދަލެވެ. އެ ސަރަޙައްދު ހުރަސްކޮށް ދަތުރު ކުރާ އުޅަނދުފަހަރުގެ ތެރޭގައި ތެޔޮ އުފުލާ އުޅަނދުފަހަރު ވެސް ހިމެނެއެވެ. އެ ސަރަޙައްދުން ދަތުރުކުރާ އުޅަނދުފަހަރަށް އަމާޒުކޮށް ހޫޘީން ދެމުންދާ ޙަމަލަތައް އިތުރުކުރުމާ ގުޅިގެން، އެ ސަރަޙައްދުން ދަތުރު ކުރާ އުޅަނދުފަހަރުގެ އިންޝިޔުރެންސް ޚަރަދުތައް ބޮޑުތަނުން އިތުރުވެފައިވާ ކަމުގައި މަސްރަޙު ދިރާސާކުރާ ފަރާތްތަކުން ބުނެއެވެ.
އެ ސަރަޙައްދުން ދަތުރު ކުރަމުންދާ އުޅަނދުފަހަރަށް ހޫޘީން ޙަމަލާ ދެނީ، ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނާ ގުޅިގެންނެވެ. އޮކްޓޫބަރު 7 ވަނަ ދުވަހު ފެށި އެ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 18,700 އަށް އުފުލިފައެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 50,000 އަށްވުރެ މައްޗަށް އަރައެވެ.