ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގައި ރަޙުމެއް ނެތި ޝަހީދު ކުރަމުންދާ މީހުންގެ ޢަދަދު އެތަކެއް ހާހަކަށް އަރަމުންދާތީ، ޙަމަލާތައް މަދުކޮށް، ޢާންމުން ދިރިއުޅޭ ސަރަޙައްދުތަކަށް ބޮންއެޅުން ހުއްޓުވަން އެމެރިކާއިން ބާރުއަޅަން ފަށައިފިއެވެ. އެމެރިކާގެ ޤައުމީ ސަލާމަތާ ބެހޭ މުޝީރު ޖޭކް ސަލިވަން ޔަހޫދީ ދަޢުލަތަށް ކުރައްވަމުން ގެންދަވާ ދަތުރުފުޅާ ގުޅޭ ގޮތުން ވާހަކަފުޅު ދައްކަަވަމުން ރައީސް ޖޯ ބައިޑަން ވިދާޅުވީ ޣައްޒާގެ ޢާންމު ރައްޔިތުންގެ ފުރާނަ ސަލާމަތް ކުރުމަށް ޔަހޫދީންނަށް ބާރު އަޅަމުންދާ ކަމުގައެވެ.
އޭނާ ވިދާޅުވީ، ޙަމާސްއާ ދެކޮޅަށް ކަމަށް ބުނެ ޔަހޫދީ ފަށާފައިވާ ޢުދުވާން ހުއްޓައިލަން އޭނާ ގޮވައިލައްވާފައި ނުވާނެ ކަމުގައެވެ. ނަމަވެސް، ޢުދުވާނުގެ ސަބަބުން ޝަހީދުވަމުންދާ ޢާންމުންގެ ޢަދަދު މަދު ކުރަން ބާރު އަޅަމުންދާ ކަމުގައެވެ. އޭނާ މިހެން ވިދާޅުވެފައިވާއިރު، ސަލިވަން ވަނީ ޔަހޫދީންގެ ޖައްބާރު ބޮޑުވަޒީރު ބުންޔާމިން ނަތަންޔާހޫއާ ބައްދަލުކުރައްވައި، ޣައްޒާގައި ޔަހޫދީ ފައުޖުން ހިންގަމުންދާ ޢުދުވާނަށް އެހީތެރިކަން ފޯރުކޮށްދެވޭނެ އިތުރު ގޮތްތައް ހޯދަން މަޝްވަރާ ކުރައްވާފައެވެ.
ޣައްޒާގެ އުދުވާނާ ގުޅިގެން ޔަހޫދީންނަށް ބައިނަލްއަޤުވާމީ މުޖުތަމަޢުން ކުރާ އިޙުތިރާމާއި ތާޢީދު ގެއްލެމުންދާ ކަމުގައި ވެސް ބައިޑަން ދާދިފަހުން ވިދާޅުވެފައިވެއެވެ. މި ކަމާ ގުޅިގެން ޔަހޫދީން ބުނީ ބައިނަލްއަޤުވާމީ މުޖުތަމަޢުން ޔަހޫދީން އެކަހެރިކޮށްލި ނަމަވެސް ޙަމާސްއާ ދެކޮޅަށް ފަށާފައިވާ ޢުދުވާން ހުއްޓައިނުލާނެ ކަމުގައެވެ.
ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ލާއިންސާނީ ޢުދުވާން ހިންގަމުން ދަނީ އެމެރިކާގެ އެހީތެރިކަމާ އެކުގައެވެ. އެމެރިކާއިން ފޯރުކޮށްދީފައިވާ ވައިޓް ފޮސްފޮރަސް އެކުލެވިގެންވާ ނުރައްކާތެރި ހަތިޔާރެއް ބޭނުންކޮށްގެން ޔަހޫދީން ދާދި ފަހުން ލުބްނާނުގެ ޢާންމު ރައްޔިތުންނަށް ޙަމަލާ ދީފައިވާ ކަން ވެސް ދާދިފަހުން ވަނީ ބޭޒާރުވެފައެވެ. ޣައްޒާގައި ހިންގަމުންދާ ޢުދުވާނުގައި އެމެރިކާއިން ފޮނުވާފައިވާ 22,000 އަށްވުރެ ގިނަ ބޮން ޔަހޫދީ ފައުޖުން ބޭނުން ކޮށްފައިވާ ކަން ވެސް އެ ނޫހުން ވަނީ ހާމަކޮށްފައެވެ.
ޔަހޫދީންގެ ޢުދުވާނަށް އެމެރިކާއިން އެހީތެރިކަން ފޯރުކޮށްދެމުން ދިޔަ ނަމަވެސް، ވައިޓް ހައުސްގެ ތަރުޖަމާނު ޖޯން ކަރބީ ވިދާޅުވީ، ޔަހޫދީންގެ ޢުދުވާންތައް ވީއެންމެ އަވަހަކަށް ނިމުމަކަށް ގެންނަން ވޮޝިންޓަނުން ބޭނުންވާ ކަމުގައެވެ. އަދި، ތަނެއްދޮރު ބެލުމެއް ނެތި ޣައްޒާއަށް ދެމުންދާ ޙަމަލާތައް މަދު ކުރުމަށް ސަލިވަންގެ ދަތުރުފުޅުގައި ބާރުއަޅާފައިވާ ކަމުގައި ވެސް އޭނާ ވިދާޅުވިއެވެ.
ނަމަވެސް، އެ ގޮވައިލުމަށް ޔަހޫދީން އިޙުތިރާމު ކުރާނެ ކަމެއް ނުވަތަ ނޫން ކަމެއް ސާފު ނުވާ ކަމުގައި ވެސް އޭނާ ވިދާޅުވިއެވެ. އޭނާ މިހެން ވިދާޅުވެފައިވީ ނަމަވެސް، ޔަހޫދީންގެ ޢުދުވާންތައް ހުއްޓުވަން އދގެ ސަލާމަތީ މަޖިލީހަށް ހުށަހަޅާފައިވާ ހުރިހާ ޤަރާރަކަށް ހުރަސްއެޅުމުގެ ފަހަތުގައި އޮތީ އެމެރިކާއެވެ.
އޮކްޓޫބަރު 7 ވަނަ ދުވަހުން ފެށިގެން ޔަހޫދީ ފައުޖުން ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު މިހާރު ވަނީ 18,700 އަށް އުފުލިފައެވެ. އޭގެ ތެރޭގައި 6,000 އަށްވުރެ ގިނަ ޢަދަދަކަށް ކުޑަކުދިން ވެސް ހިމެނެއެވެ. އަދި، ޒަޚަމު ކޮށްލާފައިވާ މީހުންގެ ޢަދަދު 50,000 އަށްވުރެ މައްޗަށް އަރައެވެ.