ހުޅަނގު އައްސޭރީގެ ވަޒަންވެރިންގެ އަނިޔާވެރިކަން ހުއްޓުވުމަށް ވިލާތުގެ އިއްތިޙާދުން ގޮވައިލައިފި
ހުޅަނގު އައްސޭރީގައި ދިރިއުޅޭ ޔަހޫދީ ވަޒަންވެރިން އެ ސަރަޙައްދުގައި ދިރިއުޅޭ ފަލަސްޠީނު ރައްޔިތުންނަށް ދެމުންގެންދާ އަނިޔާތައް ހުއްޓުވުމަށް އަވަސް ފިޔަވަޅުތަކެއް އެޅުމަށް ވިލާތުގެ އިއްތިޙާދުން ގޮވައިލައިފިއެވެ. ވިލާތުގެ އިއްތިޙާދުގެ އިތުރުން އިނގިރޭސިވިލާތާއި އޮސްޓްރޭލިޔާއާއި ކެނެޑާ ހިމެނޭހެން އިތުރު ދިހަ ޤައުމަކުންވެސް ވަނީ ފިޔަވަޅުތައް އަވަސް ކުރުމަށް ގޮވައިލައިފައެވެ.
ޤައުމުތަކުން އެ ގޮތަށް ގޮވައިލައިފައި ވަނީ އެ ޤައުމުތަކުން ގުޅިގެން ނެރުނު ބަޔާނެއްގައެވެ. ހުޅަނގު އައްސޭރީގައި ދިރިއުޅޭ ފަލަސްޠީނު ރައްޔިތުންނަށް ޔަހޫދީ ވަޒަވެރިންގެ ފަރާތުން ލިބޭ އަނިޔާތައް އިތުރުވަމުން އަންނަ ކަމަށާއި އެކަމުން ފަލަސްޠީނުގެ ރައްޔިތުން ޙިމާޔަތްކުރުމަށް އަވަސް ފިޔަވަޅުތަކެއް އަޅަން ޖެހޭ ކަމަށް އެ ބަޔާނުގައިވެއެވެ.
އިނގިރޭސިވިލާތުގެ ޚާރިޖީ ސެކްރެޓަރީ ޑޭވިޑް ކެމަރަން ވަނީ ފަލަސްޠީނު ރައްޔިތުންނަށް އެ ގޮތަށް އަނިޔާދޭ ޔަހޫދީ ވަޒަންވެރިން އިނގިރޭސިވިލާތަށް އެތެރެވުން މަނާ ކުރާނެ ކަމަށް ވިދާޅުވެފައެވެ.
އޮކްޓޯބަރު މަސް ފެށުނު ފަހުން ޔަހޫދީ ވަޒަންވެރިންގެ ފަރާތުން 343އަށްވުރެ ގިނަ އަނިޔާވެރި ޙަމަލާއާ ފަލަސްތީނުގެ އާންމުންނަށް ވަނީ ކުރިމަތިލާންޖެހިފައިވާ ކަމަށް އެ ބަޔާނުގައިވެއެވެ. އެ ޙަމަލާތަކުގައި 8 މީހުން މަރުވެ 83އަށްވުރެ ގިނަ މީހުން ޒަޚަމްވެފައިވާ ކަމަށާއި ފަލަސްޠީނުގެ 1،026 މީހުންނަށް އެ މީހުންގެ ގެދޮރު ދޫކޮށްދާން މަޖުބޫރުކޮށްފައިވާ ކަމަށްވެސް އެ ބަޔާނުގައިވެއެވެ.