ޚަރަދަށް ޒިންމާވުމުގެ ޤާނޫނުން އިސްތިސްނާކުރެވިފައިވާ މާއްދާތައް އިޢާދަކޮށްދިނުމަށް އެދިއްޖެ

ދައުލަތުގެ ޚަރަދަށް ޒިންމާވުމުގެ ޤާނޫނަށް އަމަލުކުރުމަށް ރައްޔިތުންގެ މަޖިލީހުން ދެއްވާފައިވާ އިސްތިސްނާ ނިމުމަކަށް ގެނެސް، އިސްތިސްނާ ކުރެވިފައިވާ މާއްދާތައް އަލުން އިޢާދަކޮށްދިނުމަށް އެދި މާލީ ވުޒާރާއިން މަޖިލީހަށް ހުށަހަޅައިފިއެވެ.

ދައުލަތުގެ ޚަރަދަށް ޒިންމާވުމުގެ ޤާނޫނުގެ މާއްދާތަކެއް އިސްތިންނާކޮށްފައި އޮތް އޮތުން ނިމުމަކަށް ގެނެސް، އެ ޤާނޫނު އެކީގައި އިޢާދަކޮށްދިނުމަށް އެދި ރައްޔިތުންގެ މަޖިލީހަށް ހުށަހުމަކީ ސަރުކާރުގެ ' ހަފްތާ 14 ' މަގުޗާޓުގައި ހިމަނާފައިވާ މުހިންމު ލަނޑުދަނޑިއެކެވެ.

ދައުލަތުގެ ޚަރަދަށް ޒިންމާވުމުގެ ޤާނޫނުގެ ބައެއް މާއްދާތައް އިސްތިސްނާކުރުމަށް އެދި 2020ވަނަ އަހަރުގެ އޭޕްރިލްމަހުގެ 26ވަނަ ދުވަހު ރައްޔިތުންގެ މަޖިލީހުގައި މާލީ ވުޒާރާގެ ފަރާތުން އެދުނީ، އެ ޤާނޫނުގެ 36ވަނަ މާއްދާގައި ބަޔާންކޮށްފައިވާ ފަދަ ޤުދުރަތީ ކާރިސާއެއްކަމުގައިވާ ކޯވިޑުގެ ބަލިމަޑުކަން ރާއްޖެއަށް ކުރިމަތިވުމުގެ ސަބަބުންނެވެ.

އަދި އެ ބަލިމަޑުކަމާ ގުޅިގެން ކުރިމަތިވި އިޤްތިސާދީ ހީނަރުކަން ފިލައިގޮސްފައިނުވާތީ، ދެ ފަހަރެއްގެ މަތިން މި އިސްތިސްނާގެ މުއްދަތު ރައްޔިތުންގެ މަޖިލީހުގެ ފަރާތުންވަނީ އިތުރުކޮށްދެއްވާފައެވެ.

އިޤްތިސާދީ ހިސާބުތަކަށް ބަލާއިރު މިދިޔަ އަހަރު ރާއްޖޭގެ ރިއަލް ޖީ.ޑީ.ޕީވަނީ ކޯވިޑުގެ ކުރިން ހުރި މިންވަރު ފަހަނައަޅައި ގޮސްފައެވެ. އަދި އެ އަހަރު ދައުލަތަށް ލިބުނު އާމްދަނީވަނީ، 2019ވަނަ އަހަރު ލިބުނު އާމްދަނީއަށްވުރެ އިތުރުވެފައެވެ.

މިކަމާއި ގުޅިގެން މާލީ ވުޒާރާއިން ނެރެފައިވާ ނޫސްބަޔާނެއްގައި ބުނެފައިވަނީ، ދައުލަތުގެ ޚަރަދަށް ޒިންމާވުމުގެ ޤާނޫނުގެ 36ވަނަ މާއްދާގައި ބަޔާންކޮށްފައިވާ ފަދަ ހާލަތެއް މިހާރު ނެތުމުން، އަންނަ މަހުގެ އެއްވަނަ ދުވަހުންފެށިގެން މި ޤާނޫނުގެ 32ވަނަ މާއްދާގެ ހ،ރ އަދި ބ އިސްތިސްނާކުރުން ނިމުމަކަށް ގެނެސް އެޤާނޫނަށް އިޢާދަކޮށްދިނުމަށް އެދި ރައްޔިތުންގެ މަޖިލީހަށް މާލީ ވުޒާރާއިން ހުށަހަޅާފައިވާ ކަމަށެވެ.