ޔޫކްރެއިންގައި ކުރަމުންދާ ހަނގުރާމަ ކާމިޔާބު ކުރެވުނު ނަމަވެސް ނޭޓޯގެ އެއްވެސް ޤައުމަކަށް ޙަމަލަ ދިނުމުގެ ވިސްނުމެއް ނެތް ކަމުގައި ރަޝިޔާގެ ރައީސް ވްލަޑިމިޔަރ ޕުޓިން ވިދާޅުވެއްޖެއެވެ. އޭނާ މިހެން ވިދާޅުވެފައި ވަނީ، ރަޝިޔާއިން ނޭޓޯގެ މެންބަރު ޤައުމުތަކަށް ޙަމަލަ ދޭން ތައްޔާރުވަމުންދާ ކަމުގައި އެމެރިކާގެ ރައީސް ޖޯ ބައިޑަން ތުހުމަތު ކުރެއްވުމުން އެ ކަމަށް ރައްދު ދިނުމުގެ ގޮތުންނެވެ. ޕުޓިން ވިދާޅުވީ، ނޭޓޯގެ މެންބަރު ޤައުމުތަކާ ދެކޮޅަށް ހަނގުރާމައެއް ފެށުމުގެ އެއްވެސް ބޭނުމެއް ނެތް ކަމުގައެވެ.
ރަޝިޔާއިން ޔޫކްރެއިންގައި ކުރަމުންދާ ހަނގުރާމައިގެ ސަބަބުން އެ ޤައުމާއި ހުޅަނގާ ދެމެދު އޮތް ގުޅުންތައް ވަނީ ހީނަރުވެފައެވެ. މަސްރަޙު ދިރާސާ ކުރާ ފަރާތްތަކުން ބުނީ، 1962 ވަނަ އަހަރު ރަޝިޔާއިން ކިޔުބާއަށް މިސައިލްތަކެއް ފޮނުވަން މަސައްކަތް ކުރުމުން މަސްރަޙު ހޫނުވި މިންވަރަށް ވުރެ ބޮޑަށް ރަޝިޔާއާއި ހުޅަނގުގެ ބާރުތަކާ ދެމެދު ނުތަނަވަސްކަން ބޮޑުވެފައިވާ ކަމުގައެވެ. ރަޝިޔާއިން ނޭޓޯގެ މެންބަރު ޤައުމަކަށް ޙަމަލަދީފި ނަމަ، ތިންވަނަ ބޮޑު ހަނގުރާމަ ފެށޭނެ ކަމުގެ އިންޒާރު ހުސްވި އަހަރު ބައިޑަން ދެއްވާފައިވެއެވެ.
ރަޝިޔާއިން ނޭޓޯއަށް ޙަމަލަދޭން ތައްޔާރުވަމުންދާ ކަމުގައި ބައިޑަން ތުހުމަތު ކުރައްވާފައި ވަނީ، ޔޫކްރެއިނަށް މާލީ އެހީތެރިކަން ފޯރުކޮށްދޭން އެމެރިކާއިން ކުރަމުންދާ މަސައްކަތްތަކަށް ހުރަސް އެޅުން ހުއްޓައިލުމަށް އިދިކޮޅު ރިޕަބްލިކަން ޕާޓީއަށް ގޮވައިލައްވަމުންނެވެ. އޭނާ ވިދާޅުވީ، ޕުޓިންއަށް ޔޫކްރެއިންގެ މައްޗަށް ކާމިޔާބު ހޯދިއްޖެ ނަމަ، އޭނާގެ އަމުރަށް ނޭޓޯގެ މެންބަރު ޤައުމުތަކަށް ދީފާނެ ޙަމަލައެއް ހުއްޓުވޭނެ ގޮތެއް ނޯންނާނެ ކަމުގައެވެ.
"ބައިޑަން ވިދާޅުވެފައި ވަނީ އެއްވެސް ހަމަޖެހޭ ވާހަކައެއް ނޫން. އޮއްޓަރެއް ހުރި ވާހަކައެއް ނޫން. އެ ކަން އޭނާ ވެސް އެނގިވަޑައިގަންނަވާނެ. ރަޝިޔާއިން ނޭޓޯއާ ހަނގުރާމަ ކުރަން ޖެހޭ އެއްވެސް ސަބަބެއް، އެއްވެސް ޝައުޤެއް ނެތް. އެ ކަމުން ރަޝިޔާއަށް ލިބެނޭ އިޤުތިޞާދީ، ސިޔާސީ، ޖިޔޯޕޮލިޓިކަލް ނުވަތަ އަސްކަރީ ފައިދާއެއް ވެސް ނެތް،" ޕުޓިން ވިދާޅުވިއެވެ. ރަޝިޔާއޭ ކިޔައިގެން ބައިޑަން ވާހަކަފުޅު ދައްކަވާފައި ވަނީ އޭނާއަށް އަމިއްލައަށް ހެދިފައިވާ ގޯސްތަކެއް ފޫބައްދަން ކަމުގައި ވެސް ޕުޓިން ވިދާޅުވިއެވެ.
ނޭޓޯއަކީ ކުރީގެ ރޫސީވިލާތުގެ ކިބައިން ރައްކާތެރި ކަން ހޯދުމަށް އެމެރިކާއިން އިސްވެ 1949 ވަނަ އަހަރު އުފައްދާފައިވާ އިއްތިހާދެކެވެ. 1991 ވަނަ އަހަރު ރޫސީވިލާތް ރޫޅުމާ އެކު އުފެދުނު ބައެއް ޤައުމުތަކުން ވެސް ވަނީ ނޭޓޯއާ ގުޅިފައެވެ. ފިނި ހަނގުރާމަ ނިމުނު ފަހުން ވެސް ނޭޓޯއިން މެންބަރުން އިތުރު ކުރަން މަސައްކަތް ކުރަމުންދާތީ، މީގެ ކުރިން ވެސް އެތަކެއް ފަހަރެއް މަތިން ޕުޓިން ވަނީ އެ ކަމާ މެދު ކަންބޮޑުވުން ފާޅު ކުރައްވާފައެވެ.
ނޭޓޯގެ ޗާޓަރުގައިވާ ގޮތުން، އެ އިއްތިހާދުގެ އެއްވެސް މެންބަރު ޤައުމަކާ ދެކޮޅަށް ހަނގުރާމައެއް ފެށުމަކީ، މުޅި އިއްތިހާދާ ދެކޮޅަށް ހަނގުރާމަ ފެށުމާ އެއްފަދަ ކަމެކެވެ. އެ އިއްތިހާދާ އެންމެ ފަހުން ގުޅިފައި ވަނީ ފިންލެންޑުންނެވެ. އެއީ، މި އަހަރުގެ އޭޕްރިލް މަހުއެވެ. މި ކަމާ ގުޅިގެން ރަޝިޔާއިން ވަނީ، އެ ޤައުމުގެ އުތުރު ފަރާތުގެ ސަރަޙައްދީ ރޮނގު ކައިރީގައި ސަލާމަތީ އަދި އަސްކަރީ ފިޔަވަޅުތައް ވަރުގަދަ ކޮށްފައެވެ.
ރަޝިޔާގެ އިސްތިޢުމާރީ ފައުޖާ ދެކޮޅަށް ޔޫކްރެއިނުން ރައްދު ޙަމަލާގެ އަސްކަރީ ޙަރަކާތެއް ފަށާފައިވާއިރު، އެ ކަމުގައި ޔޫކްރެއިނަށް އެންމެ ބޮޑު އެހީތެރިކަމެއް ފޯރުކޮށްދެމުން ދަނީ އެމެރިކާއިންނެވެ. އަދި، ނޭޓޯގެ މެންބަރު ޤައުމުތަކުންނެވެ. އެމެރިކާއިން ޔޫކްރެއިނަށް ފޮނުވަމުންދާ ހަތިޔާރުގެ އަގު އެތަކެއް ބިލިޔަން ޑޮލަރަކަށް އަރައެވެ. ނޭޓޯއިން ދެކޭ ގޮތުގައި، ރަޝިޔާ-ޔޫކްރެއިން ހަނގުރާމައަކީ އެ އިއްތިހާދުގެ ސަލާމަތާއި ރައްކާތެރިކަމަށް، އަދި ކުރިމަގަށް އޮތް ނުރައްކަލެކެވެ.