ޔަހޫދީ ދަޢުލަތާއި ޣައްޒާއާ ދެމެދު އޮންނަ ކަރީމް އަބޫ ސާލިމް ހުރަސް މެދުވެރިކޮށް ހަނގުރާމަ ފެށުނު ފަހުން ފުރަތަމަ ފަހަރަށް ޣައްޒާއަށް އެހީ އެތެރެކޮށްފިއެވެ.
އޮކްޓޯބަރު ހަތް ވަނަ ދުވަހު ޔަހޫދީ ފައުޖުތަކާއި ޣައްޒާގެ ވެރިކަން ކުރާ ޙަމާސްއާ ދެމެދު ހަނގުރާމަ ފެށިފަހުން ކަރީމް އަބޫ ސާލިމް ހުރަސް އޮތީ ބަންދުކޮށްފައެވެ. ޣައްޒާއަށް ބޭނުންވާ އިންސާނީ އެހީތެރިކަން މިހާތަނަށް ފޯރުކޮށްދީފައި ވަނީ ޣައްޒާއާއި މިޞްރު ގުޅޭ ރަފަޙް ހުރަސް މެދުވެރިކޮށެވެ. ނަމަވެސް ރަފަޙް މެދުވެރިކޮށް ޣައްޒާއަށް ދުވާލަކު އެތެރެކުރެވެނީ އެންމެ 100 އެހީގެ ގާފިލާއެވެ. މިއީ ޣައްޒާގެ ޢާންމުންނަށް ބޭނުންވާ އިންސާނީ އެހީގެ ވަރަށް މަދު މިންވަރެކެވެ.
ކަރީމް އަބޫ ސާލިމް މެދުވެރިކޮށް ޣައްޒާއަށް ވަންނަން ތައްޔާރުވެފައިވާ 79 އެހީގެ ޣާފިލާ އެބައޮތެވެ. އޭގެއިތުރުން ތެޔޮ ބަރުކޮށްފައި އޮތް 4 ގާފިލާއި އެހެނިހެން އެހީގެ ސާމާނު ހުރި 6 ގާފިލާއެއް ރަފަޙް ހުރަސްކޮށް ޣައްޒާއަށް ވަދެފައިވެއެވެ.
މިޞްރާއި ޔަހޫދީ ދަޢުލަތް އަދި ޣައްޒާގެ ސަރަޙައްދީ ރޮނގުގައި އޮންނަ ކަރީމް އަބޫ ސާލިމަކީ ޣައްޒާއަށް ވަންނަ އަދި ބޭރުކުރާ މުދާ އުފުލާ މައިގަނޑު އެއް މަގެވެ. ކަރީމް އަބޫ ސާލިމުން ޣައްޒާއަށް ވަންނަ އެހީގެ ޣާފިލާތައް ޔަހޫދީން ބަލައި ފާސްކުރުމަށްފަހު ސީދާ ޣައްޒާއަށް ވަދެވޭނެ އިންތިޒާމު ވެސް ވަނީ ހަމަޖައްސައިފައެވެ. މީގެ ކުރިން ހަމަޖައްސައިފައިވާ ގޮތުން ކަރީމް އަބޫ ސާލިމުން ޔަހޫދީން ބަލައި ފާސްކުރާ ގާފިލާތައް ޣައްޒާއަށް ވަންނަން ޖެހޭނީ ރަފަޙް ހުރަހުންނެވެ.
ޔަހުދީ ފައުޖުތަކުން ޣައްޒާގައި ހިންގަމުންދާ ޢުދުވާނީ ޙަމަލާތަކުގެ ސަބަބުން އެ ސަރަޙައްދު ވަނީ އިންސާނީ ކާރިޘާއަކާ ކުރިމަތިލާންޖެހިފައެވެ. ޣައްޒާގެ އާންމުނަށް ބޭނުންވާ ކާނާއާއި ސާފު ބޯފެނާއި ބޭސް ފަރުވާއަށް ބޭނުންވާ ސާމާނުގެ ދަތިކަންވެސް ވަނީ ވަރަށް ބޮޑުވެފައެވެ.