ލީބިއާއިން ފުރައިގެންދިޔަ ބޯޓެއް މެޑިޓެރޭނިއަން ކަނޑަށް ބަނޑުންޖަހާލުމުގެ ސަބަބުން އަންހެނުންނާއި ކުޑަކުދިން ހިމެނޭ ގޮތަށް 61 ރެފިއުޖީން ގެބިގެން މަރުވެއްޖެއެވެ.
ހިޖްރަ ކުރާ މީހުންނާބެހޭ ބައިނަލްއަޤުވާމީ ޖަމުޢިއްޔާއިން ބުނި ގޮތުގައި އެ ބޯޓުން ގާތްގަޑަކަށް 86 މީހުން ދަތުރުކޮށްފައިވެއެވެ. އެ ޖަމުޢިއްޔާގެ ލީބިޔާ އޮފީހުން ނެރުނު ބަޔާނެއްގައި ބުނެފައި ވަނީ ހިޖުރަކުރަން މަސައްކަތް ކުރި ގިނަ ޢަދަދެއްގެ މީހުން މަރުވެފައިވަނީ ކަނޑުގެ ބިޔަ ރަޅުތަކުގެ ސަބަބުން ބޯޓު ބަންޑުންޖަހައިލައިގެނެވެ. އެ ބޯޓަކީ ލީބިޔާގެ ހުޅަނގު އުތުރު އައްސޭރީގައި އޮންނަ ޒުވާރާއިން ފުރައިގެން ދަތުރުކުރަމުންދިޔަ ބޯޓެކެވެ.
އެ ހަދިޘާގައި ގެއްލުން ލިބުނު ގިނަ މީހުންނަކީ ނައިޖީރިއާ، ގެމްބިއާ އަދި އެފްރިކާގެ އެހެން ޤައުމުތަކުގެ މީހުންނެވެ. އެ ބޯޓުން ގާތްގަނޑަކަށް 25 މީހުން ސަލާމަތްކޮށް ލީބިޔާއަށް ވަނީ ގެންގޮސްފައެވެ. އަދި އެ މީހުން ޙާލު ރަނގަޅު ކަމަށް ހިޖުރަކުރާ މީހުންނާބެހޭ އިދާރާއިން ބުނެއެވެ.
މެޑިޓެރޭނިއަން ކަނޑަކީ ހިޖުރަ ކުރާ މީހުން ދަތުރުކުރާ އެންމެ ނުރައްކާތެރި މަގެވެ. އެ ގޮތުން އެ މަގުން ދަތުކުރި މީހުންގެ ތެރެއިން 2،250 މީހުން މި އަހަރު ވަނީ އެކި ހާދިޘާތަކުގައި މަރުވެފައެވެ. މެޑިޓެރޭނިއަން ކަނޑަކީ އެފްރިކާގެ ޤައުމުތަކުގެ ރެފިއުޖީން އިޓަލީވިލާތް މެދުވެރިކޮށް ވިލާތަށް ދިއުމަށް ދަތުރުކުރާ މައިގަނޑު މަގެވެ. ކަނޑުމަގުން އިޓަލީވިލާތަށް ދަތުރުކުރި މީހުންގެ ޢަދަދު ވަނީ މިދިޔަ އަހަރަށްވުރެ ދެ ގުނަ އިތުރުވެފައެވެ. އެ ގޮތުން ޓިއުނީޝިއާއާއި ލީބިޔާއިން މި އަހަރު 153،000އަށްވުރެ ގިނަ ރެފިއުޖީންނާއި ޙިމާޔަތް ހޯދުމަށް އިޓަލީވިލާތުށް ހިޖުރަކޮށްފައިވާ ކަމަށް އދން ބުނެއެވެ.
ލީބިއާ ހަލަބޮލިކަމުގެ ތެރެއަށް ވެއްޓިފައިވަނީ 2011 ވަނަ އަހަރު ނޭޓޯގެ ތާއީދާއެކު ހިންގި ބަޣާވާތެއްގައި ގިނަ ދުވަސްތަކެއް ވަންދެން އެ ޤައުމުގެ ވެރިކަން ކުރެއްވި މުޢައްމަރު ޤައްޒާފީ ވެރިކަމުން ވައްޓާލި ފަހުންނެވެ.