ޔަމަނުގައި ޙަރަކާތްތެރިވާ ހަތިޔާރުއެޅި ޖަމާޢަތް، ހޫޘީންގެ ޙަމަލާތަކުން ރަތް ކަނޑުގައި ދަތުކުރާ އާގު ބޯޓުތައް ރައްކާތެރިކުރުމުގެ މަސައްކަތް އެމެރިކާ އިން ފަށަން ތައްޔާރުވެއްޖެއެވެ. ރަތް ކަނޑުގެ ދެކުނުގައާއި ޚަލީޖް ޢަދުންގައި ފަށައި އެ މަސައްކަތުގައި ބައެއް އެހެން ޤައުމުތަކުންވެސް ބައިވެރިވާނެއެވެ.
އެކަން ޢިއުލާނުކުރައްވައިފައިވަނީ ބަޙްރެއިންއަށް ކުރެއްވި ދަތުރުފުޅެއްގައި އެމެރިކާގެ ދިފާޢީ ވަޒީރު ލޮއިޑް އޮސްޓިންއެވެ. އޭނާ ނެރުއްވި ބަޔާނެއްގައި އެމެރިކާއިން އިސް ނަގައިގެން ކުރާ ބައިނަލްއަޤުވާމީ އެ މަސައްކަތުގައި ބައެއް ޤައުމުތަކުން ބައިވެރިވާކަން ފާހަގަކުރައްވައިފައިވެއެވެ. ނަމަވެސް ޙޫޘީންގެ ޢަމަލުތަކާ ގުޅިގެން އެމެރިކާއިން މީގެ ކުރިން ކަންތައް ކޮށްފައިވާ ގޮތަށް ކުރަން ޤައުމުތަކުން އެއްބަސްވެފައިވާ ކަމެއް ސާފެއްނުވެއެވެ. މީގެ ކުރިން އެމެރިކާއިން ވަނީ ޙޫޘީންގެ އެފަދަ މިސައިލްތަކާއި ޑްރޯންތައް ވައްޓައިލައި ޙަމަލާއަމާޒުވާ ބޯޓުތަކަށް އެހީތެރިވެފައެވެ. އެމެރިކާއިން އިސްނަގައިގެން ކުރާ އެ މަސައްކަތުގައި ބައިވެރިވާ ޤައުމުތަކަކީ އިނގިރޭސިވިލާތް، ބަޙްރެއިން، ކެނެޑާ، ފަރަންސޭސިވިލާތް، އިޓަލީވިލާތް، ނެދަރލޭންޑްސް، ނޯވޭ، ސޭޝެލްސް އަދި ސްޕެއިންއެވެ.
ޔަހޫދީ ފައުޖުތަކާއި ޣައްޒާގައި ވެރިކަންކުރާ ޙަމާސް ޖަމާޢަތާއި ދެމެދު އޮކްޓޫބަރު މަހުގެ ހަތް ވަނަ ދުވަހުން ފެށިގެން ކުރާ ހަނގުރާމައިގައި ފަލަސްޠީނަށް ތާޢީދުކުރުމުގެ ގޮތުން ޙޫޘީން އަންނަނީ ރަތް ކަނޑުން ޔަހޫދީ ދަޢުލަތަށް ދަތުރުތައްކުރާ ބޯޓުތަކަށް ޙަމަލާތައް ދެމުންނެވެ. އެ ގޮތުން ޙޫޘީން އެންމެ ފަހުން ޙަމަލާދީފައި ވަނީ އެ ސަރަޙައްދުން ދަތުރުކުރަމުންދިޔަ މުދާ އުފުލާ ދެ ބޯޓަކަށެވެ. ރަތް ކަނޑުން ޔަހޫދީ ދަޢުލަތަށް ދަތުރުކުރާ ހުރިހާ ބޯޓުތަކަކަށްވެސް ޙަމަލާ ދޭނެ ކަމަށް ޙޫޘީން ވަނީ ބުނެފައެވެ.