ކޮމިޝަނަރ އޮފް ޕޮލިސްގެ މަޤާމަށް ކުރިމަތިލެއްވީ އޭސީޕީ ޝުޖާޢުއާއި، ނަވީން

ކޮމިޝަނަރ އޮފް ޕޮލިސްގެ މަޤާމަށް އެސިސްޓަންޓް ކޮމިޝަނަރގެ މަޤާމުގައި ތިއްބެވި ދެ ބޭފުޅަކު ކުރިމަތިލައްވައިފިއެވެ.

ޕޮލިސް ކޮމިޝަނަރގެ މަޤާމަށް ބޭފުޅަކު އައްޔަން ކުރެއްވުމަށް ހުޅުވާލީ މިމަހުގެ 15ވަނަ ދުވަހުއެވެ. މި މުއްދަތު އިއްޔެ މެންދުރު 12:00އާއި ހަމައަށް ހަމަވިއިރު، މި މަޤާމަށް ކުރިމަތިލެއްވި ދެ ބޭފުޅުންނަކީ، މިވަގުތު އެސިސްޓަންޓް ކޮމިޝަނަރ އޮފް ޕޮލިސްގެ މަޤާމުގައި ތިއްބެވި އަލީ ޝުޖާއުއާއި އިސްމާޢީލް ނަވީންއެވެ.

2021 ވަނަ އަހަރުގެ މާރިޗު މަހު ޢަމަލުކުރަން ފެށި ފުލުހުންގެ ޚިދުމަތުގެ ޤާނޫނުގައި ބަޔާންކުރާގޮތުން ކޮމިޝަނަރ އޮފް ޕޮލިސްގެ މަޤާމަށް ބޭފުޅަކު އައްޔަންކުރަންޖެހޭނީ އެސިސްޓެންޓް ކޮމިޝަނަރުގެ ރޭންކުން ފެށިގެން މަތީގެ ރޭންކުގެ ބޭފުޅެކެވެ. އަދި އެ މަޤާމަށް ބޭފުޅަކު އައްޔަންކުރަންވާނީ އެމަގާމަށް ކުރިމަތިލައްވާ ބޭފުޅުންނާ ޕޮލިސް ބޯޑުން އިންޓަވިއުކޮށް، ގާބިލްކަން ވަޒަން ކުރުމަށް ފަހު ކަމަށްވެސް ޤާނޫނު ބަޔާންކުރެއެވެ. އަދި ކޮމިޝަނަރ ޢައްޔަންކުރާނީ ޕޮލިސް ބޯޑުން ވަޒަންކޮށް ވަޒީރަށް ހުށަހަޅާ ނަންތަކުގެ ތެރެއިން، ވަޒީރުގެ ލަފާގެމަތިން ރައީސުލްޖުމްހޫރިއްޔާކަމަށްވެސް ޤާނޫނުގައި ބުނެފައިވެއެވެ.

ޕޮލިސް ކޮމިޝަނަރުގެ މަޤާމު ހުސްވީ، ކުރިން އެ މަޤާމުގައި ހުންނެވި މުޙައްމަދު ޙަމީދު މިދިޔަ ނޮވެމްބަރު މަހުގެ 15 ވަނަ ދުވަހު ރިޓަޔަރ ކުރެއްވުމުންނެވެ. އެހެންކަމުން އެކްޓިންގ ޕޮލިސް ކޮމިޝަނަރުގެ މަޤާމު ފުރުއްވަނީ އެސިސްޓެންޓް ކޮމިޝަނަރ އޮފް ޕޮލިސް ފަރުހާދު ފިކުރީއެވެ.

ފުލުހުންގެ ޚިދުމަތުގެ ޤާނުނުގައިވާ ގޮތުން ކޮމިޝަނަރު އޮފް ޕޮލިސްގެ މަގާމު ހުސްވެއްޖެނަމަ، އެ ތާރީޚުން ފެށިގެން 45 ދުވަހުގެ ތެރޭގައި މަގާމަށް ބޭފުޅަކު އައްޔަންކުރަންޖެހެއެވެ.