އެމެރިކާއާއި ޖަޕާނާއި އޮސްޓްރޭލިޔާ ގުޅިގެން ހިންގާ އަސްކަރީ ތަމްރީނުތަކަކީ ނުރައްކަލެއް: ރަޝިޔާ
އެމެރިކާއާއި ޖަޕާނާއި އޮސްޓްރޭލިޔާ ގުޅިގެން ހިންގާ އަސްކަރީ ތަމްރީނުތަކަކީ ރަޝިޔާގެ ސަލާމަތަށް ހުރި ނުރައްކަލެއް ކަމަށް އެ ޤައުމުން ބުނެފިއެވެ. ޖަޕާނުގެ ޖަޒީރާއެއް ކަމަށްވާ ހޮކައިޑޯ ކައިރީގައި އަސްކަރީ ތަމްރީނުތަކެއް ބޭއްވުމުން ރަޝިޔާގެ ދިފާޢީ ޤާބިލުކަން ވަރުގަދަ ކުރާނެ ކަމަށް އެ ޤައުމުން ވަނީ ބުނެފައެވެ.
2022 ވަނަ އަހަރު ޔޫކްރެއިންނަށް ޙަމަލާ ދިނުމުން ހުޅަނގުގެ ޤައުމުތަކާ ގުޅިގެން ރަޝިޔާއަށް ދަތިކުރުމުގެ ފިޔަވަޅު އެޅުމަށް ޖަޕާނުން ތާޢީދުކުރުމުން ރަޝިޔާއާއި ޖަޕާނުގެ ގުޅުން ވަނީ ގޯސްވެފައެވެ. ރަޝިޔާގެ ޚާރިޖީ ވުޒާރާއިން ނެރުނު ބަޔާނެއްގައި ބުނެފައި ވަނީ އަސްކަރީ ތަމްރީނުތައް ބާއްވާފައިވަނީ ރަޝިޔާގެ ސަރަޙައްދީ ރޮނގު ކައިރީގައި ކަމަށާއި އެއީ ހަމަނުޖެހުން އިތުރުކުރުމަށް ޖަޕާނުން ގަސްދުގައި ކުރި ކަމެއް ކަމަށެވެ.
"އަޅުގަނޑުމެން ބަލަނީ ސަރަޙައްދީ ދަޢުލަތްތައް ނޫން ދަޢުލަތްތައް ހިމެނޭ މިފަދަ ޙަރަކާތްތަކަކީ ސަލާމަތީ ނުރައްކަލެއް ކުރިމަތިވެދާނެ ކަމެއް ކަމަށް." އެ ބަޔާނުގައިވެއެވެ.
ޖަޕާނުގެ އެފަދަ ޒިންމާދާރުކަން ކުޑަ ސިޔާސަތުތަކުގެ ސަބަބުން އުތުރު އިރުމަތީ އޭޝިޔާއާއި މުޅި އޭޝިޔާ ޕެސިފިކް ސަރަޙައްދުގައި ހަމަނުޖެހުން އިތުރުވުމުގެ މައިގަނޑު ސަބަބަކަށް ޖަޕާނު ވެދާނެ ކަމަށްވެސް ރަޝިޔާއިން ވަނީ ބުނެފައެވެ. ރަޝިޔާގެ ދިފާޢީ ޤާބިލުކަން އިތުރަށް ވަރުގަދަ ކުރުމަށް އެކަށީގެންވާ ފިޔަވަޅުތައް އަޅާނެ ކަމަށް ވެސް އެ ޤައުމުން ވަނީ ބުނެފައެވެ.