ޙަމާސް ޖަމާޢަތާ ދެކޮޅަށް ކުރަމުންދާ ހަނގުރާމާގައި ބޮޑެތި ނާކާމިޔާބީތަކަކާ ކުރިމަތިލާން ޖެހި ޔަހޫދީންގެ މަޝްހޫރު ގޯލާނީ ބްރިގޭޑުގެ 13 ވަނަ ލަޝްކަރުގެ ސިފައިން ފަލަސްޠީނުގެ ޣައްޒާއިން ފައިބައިފިއެވެ.
ފާއިތުވި ދުވަސްތަކުގައި ގޯލާނީ ބްރިގޭޑުގެ ސިފައިން ޙަރަކާތްތެރިވީ ޣައްޒާގެ އަލްޝުޖައިޔާ އަވަށުގައެވެ. އެ ސަރަޙައްދުގައި ހަރަކާތްތެރިވަމުންދިޔަ ޔަހޫދީ ސިފައިންނާ ދެކޮޅަށް ޙަމާސް ޖަމާޢަތުން ދެމުންދާ ޙަމަލާތަކުގައި ގޯލާނީ ބްރިގޭޑުގެ 80 ސިފައިންނާއި ދެ ކޮމާންޑަރުން ވަނީ މަރުވެފައެވެ.
ޣައްޒާގައި 60 ދުވަސް ވަންދެން ހަނގުރާމަ ކުރުމަށް ފަހު ގޯލާނީ ބްރިގޭޑުގެ ސިފައިން އެ ސަރަޙައްދުން ފޭބީ އަރާމު ކުރުމަށް ކަމަށް ބުނެއެވެ. އަދި ފާއިތުވި ދުވަސްތަކުގައި ހަމަނިދި ނުލިބުމުގު ސަބަބުން ޔަހޫދީ ސިފައިން ވަރުބަލިވެފައިވާކަމަށް ވެސް ޔަހޫދީ ނޫސްތަކުން ބުނެފައިވެއެވެ. އަދި 48 ގަޑިއިރަށް ފަހު ގޯލާނީ ބްރިގޭޑުގެ ސިފައިން އަލުން ހަނގުރާމާގައި ބައިވެރިވާނެކަމަށް ޔަހޫދީ އަސްކަރިއްޔާއިން ބުނެފައިވެއެވެ.
ޣައްޒާގައި ކުރަމުންދާ ހަނގުރާމާގައި ޔަހޫދީ އަސްކަރިއްޔާއިން އެންމެ ބޮޑަށް ބަރޯސާވަނީ ގޯލާނީ ބްރިގޭޑުގެ ސިފައިންނަށެވެ. ނަމަވެސް ޙަމާސްގެ ހަނގުރާމަވެރިންނާ ދެކޮޅަށް ޔަހޫދީ ލަޝްކަރަށް އެދެވޭ ކާމިޔާބެއް ހޯދިފައެއް ނުވެއެވެ. އަދި އެ ލަޝްކަރުގެ ގިނަ ޢަދަދެއްގެ ސިފައިން މަރުވުމުގެ އިތުރުން ބަރުހަތިޔާރުތަކަށް ވެސް ވަނީ ބޮޑެތި ގެއްލުންތަކެއް ލިބިފައެވެ. އެއާއެކު ހަނގުރާމަ ދިގުލައިގެން ގޮސް ޔަހޫދީ ސިފައިންގެ ޢާއިލާތަކުގެ ނުރުހުމާއި ހިތްހަމަނުޖެހުން ބޮޑުވެ ޔަހޫދީ ސަރުކާރަށް ބޮޑެތި ފާޑުކިއުންތައް ވަނީ އަމާޒުވެފައެވެ.
2014ވަނަ އަހަރުގެ ތެރޭގައި ޔަހޫދީ އިސްތިޢުމާރީ ސިފައިންނާއި ޙަމާސް ޖަމާޢަތާ ދެމެދު ކުރި ހަނގުރާމާގައި ވެސް ގޯލާނީ ބްރިގޭޑުގެ ސިފައިންނަށް ބޮޑެތި ގެއްލުންތަކަކާއި ނާކާމިޔާބީއާ ކުރިމަތިލާން ޖެހުނެވެ.