ތުރުކީވިލާތުގެ އަސްކަރިއްޔާއިން ސޫރިޔާއާއި ޢިރާޤުގައި ކުރުދީ ހަނގުރާމަވެރިން ޙަރަކާތްތެރިވާ އަމާޒުތަކަށް ވަރުގަދަ ވައިގެ ޙަމަލަތަކެއް ދީ ގިނަ ޢަދަދެއްގެ ބަޔަކު މަރައިލައިފިއެވެ. މިއީ، ޢިރާޤުގެ އުތުރުގައި ތުރުކީވިލާތުގެ އަސްކަރިއްޔާއާއި ކުރުދީ ހަނގުރާމަވެރިންނާ ދެމެދު ހިނގި ކުރިމަތިލުންތަކެއްގައި ތުރުކީވިލާތުގެ ސިފައިންގެ 12 މީހުން މަރުވުމުން ދީފައިވާ ޙަމަލަތަކެކެވެ.
ތުރުކީވިލާތުގެ ދިފާޢީ ވަޒީރު ޔަޝާރް ގުލާރް ވިދާޅުވީ، އެ ޙާދިޘާއަށް ރައްދު ދިނުމުގެ ގޮތުން ތުރުކީވިލާތުގެ އަސްކަރިއްޔާއިން ހިންގި ޙަރަކާތުގައި ކުރުދިސްތާން ވަރކަސް ޕާޓީ (ޕީކޭކޭ)އަށް ނިސްބަތްވާ 56 މީހުން މަރައިލާފައިވާ ކަމުގައެވެ. އޭގެ ތެރެއިން 26 މީހުން މަރައިލާފައި ވަނީ ތުރުކީވިލާތުގެ އަސްކަރިއްޔާއިން ދިން ވައިގެ ޙަމަލަތަކެއްގައެވެ. ޢިރާޤުގެ އުތުރުގެ ސަރަޙައްދުގައި ތުރުކީވިލާތުގެ ސިފައިން ހިންގި ޙަރަކާތެއްގައި ކުރުދީ ހަނގުރާމަވެރިންގެ އިތުރު 30 މީހުން މަރުވި ކަމުގައި ވެސް ގުލާރް ވިދާޅުވިއެވެ.
ތުރުކީވިލާތާއި އެމެރިކާގެ އިތުރުން ވިލާތުގެ އިއްތިޙާދުން ވެސް ވަނީ ޕީކޭކޭއަކީ ޓެރެރިސްޓު ޖަމާޢަތެއް ކަމަށް ކަނޑައަޅައިފައެވެ. އެ ޖަމާޢަތުން ތުރުކީވިލާތުގެ ސަރުކާރާ ދެކޮޅަށް ހަތިޔާރު އުފުލާފައި ވަނީ 1984 ވަނަ އަހަރުއެވެ. އެ ޖަމާޢަތުގެ ހަނގުރާމަވެރިންނާ ދެކޮޅަށް ތުރުކީވިލާތުގެ އަސްކަރިއްޔާއިން ދަނީ މެދުކެނޑުމެއް ނެތި ޙަރަކާތްތައް ހިންގަމުންނެވެ. އަދި، އެ ޙަރަކާތްތަކުގެ ދަށުން ތުރުކީވިލާތުގެ ސިފައިން ޢިރާޤުގެ ސަރަޙައްދުތަކަށް އަރައި ވެސް ޙަމަލަތައް ދީފައިވާ ކަން ފާހަގަ ކޮށްލަން ޖެހެއެވެ.
މީގެ އިތުރުން، ތުރުކީވިލާތުގެ އިރުދެކުނުގައިވާ ދިޔާރްބަކިރްގައި ބޭއްވި އެއްވުމެއްގައި ބައިވެރިވި މީހުންގެ ތެރެއިން 52 މީހުން ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. އެ އެއްވުން އިންތިޒާމު ކޮށްފައި ވަނީ ކުރުދީންނަށް ތާޢީދުކުރާ ޕީޕަލްސް އެކުއަލިޓީ އެންޑް ޑިމޮކްރެސީ ޕާޓީ (ޑީއީއެމު)ންނެވެ. ތުރުކީވިލާތުގެ ޝަރުޢީ ދާއިރާގެ ވަޒީރު ޔިލްމާޒް ތުންޗް ވިދާޅުވީ، އެއްވުމުގެ ބައިވެރިން ހައްޔަރު ކޮށްފައި ވަނީ ޓެރެރިސްޓުންނަށް ތާޢީދުކޮށް އަޑުއުފުލުމުގެ ކުށުގައި ކަމުގައެވެ.
ޑީއީއެމަކީ ތުރުކީވިލާތުގެ ޤާނޫނު ހަދާ މަޖިލީހުގައި ތަމްސީލު ކުރެވިފައިވާ ޕާޓީތަކުގެ ތެރެއިން ތިންވަނައަށް އެންމެ ބޮޑު ޕާޓީއެވެ. ޑީއީއެމްގެ ގިނަ ޢަދަދެއްގެ މެންބަރުންތަކެއް ހައްޔަރު ކުރުމުން އެ ޕާޓީން ވަނީ ކަންބޮޑުވުން ފާޅު ކޮށްފައެވެ. އަދި، އެއީ ސިޔާސީ ބޭނުމެއްގައި ހިންގާފައިވާ ދަށު ދަރަޖައިގެ އަމަލެއްގެ ގޮތުގައި ސިފަކޮށް، އެ މީހުން މިނިވަން ކުރުމަށް ގޮވައިލައިފައެވެ.
ޑީއީއެމަކީ ޕީކޭކޭ ހަނގުރާމަވެރިންނާ ގުޅިފައިވާ، އަދި ހަނގުރާމަވެރިންނަށް ވާގިވެރިވާ ޕާޓީއެއް ކަމުގައި ރައީސް ޠައްޔިބް ރަޖަބް އުރުޣާންގެ ސަރުކާރުން ދަނީ ތުޙުމަތު ކުރަމުންނެވެ. މި ތުޙުމަތުތަކާ ގުޅުވައި އެ ޕާޓީގެ ގިނަ ޢަދަދެއްގެ މެންބަރުން މީގެ ކުރިން ވެސް ހައްޔަރު ކޮށްފައިވާ ކަން ފާހަގަ ކޮށްލަން ޖެހެއެވެ. ނަމަވެސް، ސަރުކާރުގެ ތުޙުމަތުތައް އެ ޕާޓީން ދޮގު ކުރެއެވެ.