ހަނގުރާމައިގެ ސަބަބުން ބަނޑުހައިހޫނުކަމާއި މާޔޫސްކަން ފެތުރި ފަލަސްޠީނުގެ ޣައްޒާގެ އާބާދީ އޮތީ ބޮޑު ނުރައްކަލެއްގެ ތެރޭގައި ކަމަށް ދުނިޔޭގެ ސިއްޙަތު ޖަމުޢިއްޔާއިން ބުނެފިއެވެ.
ޣައްޒާގެ އާބާދީއަށް ކުރިމަތިވެފައިވާ ބޮޑު ނުރައްކަލަށް ލުއި ދިނުމަށާއި ބަނޑުހައިހޫނުކަމުގައި ތިބި ޢާންމުންނަށާއި ބަލިތަކުގެ ނުރައްކާ ބޮޑު މީހުންނަށް އަދި އަނިޔާ ލިބިފައިވާ މީހުންނަށް އެހީތެރިވުމުގެ މަގުފަހިކޮށްދިނުމަށް ސިއްޙަތު ޖަމުޢިއްޔާގެ އެންމެ އިސްވެރިޔާ ޓެޑްރޯސް އަދަނޮމް ގެބްރިޔޭސުސް ވަނީ ބައިނަލްއަޤުވާމީ މުޖުތަމަޢުއަށް ގޮވައިލައްވައިފައެވެ.
ބަނޑުހައިހޫނުކަންމަތީގައި ތިބޭ ޣައްޒާގެ އާންމުން އަންނަނީ ކާބޯތަކެތި ހޯދުމަށް ޣައްޒާއަށް އެތެރެވާ އެހީ ގާފިލާތައް ވެސް ހުއްޓުވަމުންނެވެ. "އަޅުގަނޑުމެން ހޮސްޕިޓަލްތަކަށް ފޯރުކޮށްދޭ ބޭހާއި ސިއްޙީ ފަރުވާދޭ ސާމާނާއި ތެޔޮ ފޯރުކޮށްދޭން ދާ މަގުމަތީގައި ބަނޑުހައިހޫނުކަމުގައި ތިބޭ ޣައްޒާގެ ޢާންމުން އަންނަނީ އެހީގެ ގާފިލާތައް ހުއްޓުވަމުން." ސިއްޙަތު ޖަމުޢިއްޔާއިން ނެރުނު ބަޔާނެއްގައިވެއެވެ.
ބަނޑުހައިހޫނުކަމުގެ އިތުރުން ޣައްޒާގެ ސިއްޙީ ޙާލަތު ވެސް އޮތީ ވަރަށް ބޮޑަށް ގޯސްވެފައެވެ. ސިއްޙަތު ޖަމުޢިއްޔާ އިން ބުނީ ސިއްޙީ ފަރުވާދޭ ސާމާނު ޣައްޒާގެ ދެ ހަސްތަފާލަކަށް ފޯރުކޮށްދީފައިވާނެ ކަމަށާއި ޣައްޒާގެ 36 ހަސްފަތާލުގެ ތެރެއިން 21 ހަސްފަތާލަކަށް އެއްވެސް ޚިދުމަތެއް ނުދެވޭ ކަމަށެވެ.
ޣައްޒާގައި މިހާރު އޮތް ޙާލަތާ ގުޅިގެން އދގެ ސަލާމަތީ މަޖިލީހުން މިދިޔަ ހަފުތާގައި ހުށަހެޅި ޤަރާރުގައި ގޮވާލައިފައި ވަނީ ޣައްޒާއަށް ބޭނުންވާ އިންސާނީ އެހީތެރިކަން ރައްކާތެރިކަމާއެކު އެއްވެސް ހުރަހެއްނެތި ފޯރުކޮށްދިނުމަށެވެ. ނަމަވެސް މިހާރުން މިހާރަށް ހަނގުރާމަ ހުއްޓައިލާކަށް ގޮވައިލައިފައެއް ނުވެއެވެ. އެ ޤަރާރަކީ ޣައްޒާއަށް އިންސާނީ އެހީތެރިކަން ފޯރުކޮށްދިނުން މިހާރަށްވުރެ ހަރުދަނާވާނެ ކަމުގެ އުންމީދެއް ލިބުނު ޤަރާރެކެވެ. ނަމަވެސް ޢައްޒާގެ ޢާންމުންނަށް ލިބެމުންދާ އަނިޔާއިން ސަލާމަތްކުރުމަށް މިވަގުތު އެންމެ މުހިންމީ ހަނގުރާމަ ހުއްޓައިލުން ކަމަށް ސިއްޙަތު ޖަމުޢިއްޔާއިން ބުނެއެވެ.